Binigyan ni Transportation Secretary Giovanni Lopez ng isang buwan ang LTFRB o Land Transportation Franchising and Regulatory Board para maghain ng rekomendasyon sa mga nakabinbing petisyon para sa fare hike, habang patuloy ang pagtaas ng presyo ng langis.
Ipinag-utos ni Secretary Lopez na ituloy ang mga pagdinig habang tinitingnan ng gobyerno ang iba pang paraan para matulungan ang mga transport group.
Ipinunto ng kalihim na kailangang tulungan ang mga operator at driver nang hindi agad ipapasa sa mga pasahero ang dagdag-gastos, dahil maaari rin itong magpataas sa inflation.
Iginiit ni Secretary Lopez na hindi pa tuluyang inaalis ang posibilidad ng taas-pasahe dahil pinag-aaralan pa ang iba pang programa ng gobyerno, kabilang ang pagpapalawak ng fuel assistance sa iba pang public utility vehicles, tulad ng mga tricycle driver. | Sa panulat ni Jordan Gutierrez
