Kinumpirma ng House prosecution panel na isa si Prosecutor Terry Ridon sa mga pinatawan ng show cause order ng Senate Impeachment Court dahil sa posibleng paglabag sa sub judice rule.
Sa press conference ngayong araw, sinabi ni House Trial Spokesperson Zia Alonto Adiong na bukod kay Ridon, may isa pang miyembro ng private prosecutors ang nakatanggap ng show cause order.
Aniya, hindi pa nababasa ng prosecution ang detalye ng show cause order at pag-uusapan pa nila ang kanilang susunod na hakbang.
Pinuna naman ni Adiong ang mabagal na aksiyon ng Impeachment Court sa mga pahayag na inilalabas online at maging sa publiko ni Vice President Sara Duterte.
Aniya, kung susuriin ang mga pahayag ng prosecution panel, wala pa silang nababanggit o natalakay sa takbo ng paglilitis.
Malayo aniya ito kay VP Sara na dapat ay magtakda ng pantay na pamantayan sa lahat hinggil sa pagtalima sa sub judice rule.
Nanawagan din si Adiong sa defense panel na payuhan si VP Sara na iwasang atakihin ang integridad ng Impeachment Court matapos nitong kuwestiyunin ang kredibilidad ng mga senator-judge. | Sa panulat ni Geli Mendez
