DWIZ 882

Aabot sa 25 testigo ang posibleng iharap ng House prosecution panel para patunayan ang mga alegasyon ng unexplained wealth laban kay Vice President Sara Duterte.

Ayon kay House Prosecutor Joel Chua, maaaring bumaba sa sampu ang mga testigo kung papayag ang depensa sa stipulation sa authenticity ng libu-libong bank at iba pang financial records.

Kung walang stipulation, anya, posibleng umabot sa dalawampu’t lima ang testigo, kabilang ang mga opisyal ng Anti-Money Laundering Council, Bureau of Internal Revenue, Securities and Exchange Commission, at mga bangko.

Inaasahan din ni Cong. Chua na tetestigo si dating Senador Antonio Trillanes the Fourth na siya anyang unang naglabas ng mga ebidensya kaugnay sa finances ng pamilyang Duterte.

Nakatakdang simulan sa susunod na linggo ang pagtalakay sa Article 2 o unexplained wealth matapos ang pagdinig sa Article 1 o maling paggamit ng bise presidente sa confidential funds. | Sa panulat ni Jordan Gutierrez

Nanawagan ang Malacañang na bigyan muna ng benefit of the doubt ang mga doktor na sumusuri sa kondisyon ng kalusugan ni dating House Speaker Martin Romualdez.

Ayon kay Palace Press Officer Claire Castro, umaasa silang nagsasabi ng totoo ang mga doktor hinggil sa tunay na kalagayan ng kalusugan ng mambabatas mula Leyte.

Sinabi ni Castro na agad namang nagtungo sa Cardinal Santos Medical Center ang mga tauhan ng Philippine National Police at Department of Interior and Local Government upang isilbi kay Romualdez ang warrant of arrest.

Gayunman, matapos suriin ng mga doktor ang kanyang kondisyon at matukoy na hindi maayos ang kanyang kalusugan, isinagawa na lamang sa ospital ang pagkuha ng mugshot at iba pang booking procedures.

Sa ngayon, hinihintay muna anya ng PNP at DILG ang susunod na medical assessment bago tuluyang maiprisenta si Romualdez sa Sandiganbayan para sa return of warrant.

Nakasalalay rin sa magiging desisyon ng korte kung saang pasilidad dapat i-commit o manatili sa kustodiya si Romualdez.

Hindi nakatutok si Pangulong Ferdinand Marcos Jr. sa impeachment trial ni Vice President Sara Duterte.

Ngunit sinabi ni Palace Press Officer Claire Castro na updated ang Pangulo sa mga nangyayari sa bansa, pero hindi niya binabantayan ang takbo ng paglilitis.

Ani Castro, hayaan na lamang ang prosekusyon at depensa na maglatag ng kani-kanilang estratehiya.

Nasa Impeachment Court na rin aniya ang desisyon kung ipapatawag o i-subpoena si VP Duterte.

Nasa kamay naman ng depensa kung hihilingin nilang humarap o tumestigo ang Bise Presidente sa paglilitis.

Binigyang-katwiran ng Malacañang ang pagtatatalaga kay Secretary Manny Pacquiao bilang bagong lead convenor ng National Anti-Poverty Commission.

Ayon kay Palace Press Officer Claire Castro, nakikita ni Pangulong Ferdinand Marcos Jr. kay Pacquiao ang taos-pusong hangarin nitong tumulong sa mga Pilipinong nangangailangan.

Sinabi ni Castro na matagal nang nakikita ng Pangulo ang paraan ng pakikisalamuha ni Pacquiao sa mga ordinaryong Pilipino, lalo na sa mga mahihirap at nangangailangan ng tulong.

Dahil dito, naniniwala ang Malacañang na makatutulong ang karanasan at malasakit ni dating senador at retiradong boksingero sa pagsusulong ng mga programa laban sa kahirapan.

Kumpirmadong tumugma sa mga record na inilahan ng Anti-Money Laundering Council ang labinlimang bank account na iniuugnay kay Vice President Sara Duterte at sa kanyang asawang si Atty. Manases Carpio.

Ayon kay Manila 3rd District Representative Joel Chua, nais ng House prosecution panel na gamitin ang mga dokumento bilang ebidensya sa impeachment trial.

Inaasahang sisimulan ng prosecution panel sa September 14 ang paglalahad ng kaso ukol sa sinasabing hindi maipaliwanag na yaman ng mag-asawang Duterte.

Pangungunahan ito ni Public Prosecutor at Akbayan Party-list Representative Chel Diokno, kasabay ng paghahanda sa mahigit isang libo’t walong daang dokumentong inihanda para sa paglilitis.

Giit ng prosecution, inaasahang kuwestiyunin ng depensa ang credibility ni dating Senador Antonio Trillanes at ang mga dokumentong iniharap nito, dahil sa anya’y pagkiling laban sa pamilya Duterte.

Gayunman, iginiit ng prosecution na malaki ang kanilang pag-asa sa authenticity ng mga dokumentong galing sa AMLC. | Sa panulat ni Reabelle Medina

Naniniwala ang House prosecution panel na maaaring ma-disbar bilang abogado si Vice President Sara Duterte dahil sa sunod-sunod na pahayag nito laban sa Senate Impeachment Court.

Patuloy kasi ang pagpapalabas ng statement ng bise presidente, kabilang ang tahasang pag-amin na wala na siyang tiwala sa mga korte.

Ayon kay House Prosecutor Joel Chua, “very unbecoming” bilang abogado at bilang ikalawang pinakamataas na opisyal ng bansa ang mga pahayag ni VP Sara.

Aniya, kung may magsasampa ng disciplinary action laban sa bise presidente, posible itong humantong sa pagka-disbar, lalo’t ang mga abogado, sila ay “officers of the court” na dapat gumagalang sa mahistrado at mga korte.

Naguuguluhan si Chua kung bakit walang tiwala ang bise presidente sa mga korte gayong sila rin ang nagsabi na gumagana ang local courts at dito dapat litisin si dating Pangulong Rodrigo Duterte noong panahong ipinadala ito sa The Hague, Netherlands.

Sa kabila nito, nilinaw ni Chua na dalawang Articles na lamang ang tatalakayin ng prosecution sa impeachment trial. | Sa panulat ni Geli Mendez

Patuloy na magdudulot ng malakas na pag-ulan ang Habagat sa ilang bahagi ng bansa ngayong araw, September 10, hanggang Sabado, September 12.

Ayon sa PAGASA, pinakamalakas na pag-ulan na nasa 100 hanggang 200 millimeters ang inaasahan sa Occidental Mindoro ngayong araw.

Habang 50 hanggang 100 millimeters naman ang posibleng maranasan sa ilang lugar sa Luzon at Visayas, kabilang ang Metro Manila, Batangas, Laguna, Quezon, Palawan, at ilang lugar sa Bicol at Western Visayas.

Mula mamayang gabi hanggang Biyernes ng gabi, inaasahan ang 50 hanggang 100 millimeters na pag-ulan sa Pangasinan, La Union, Benguet, Zambales, Bataan, Tarlac, Pampanga, at Occidental Mindoro.

Parehong antas ng pag-ulan ang posible naman sa Pangasinan, Zambales, at Bataan mula Biyernes ng gabi hanggang Sabado ng gabi.

Payo ng PAGASA sa mga Local Disaster Risk Reduction and Management Office na maghanda at gumawa ng mga kinakailangang hakbang para sa kaligtasan ng publiko. | Sa panulat ni Reabelle Medina