DWIZ 882

Iginiit ng Malacañang na walang kredibilidad ang testimonya ng tinaguriang 18 “maleta boys.”

Ayon kay Communications Undersecretary Claire Castro, pabago-bago umano ang mga pahayag ng dating mga bodyguard ng pugante na si Zaldy Co.

Dahil dito, sinabi ni Castro na malabong mapatunayan ang kanilang mga alegasyon sa legal na pagsusuri ng korte.

Tiniyak ng Malacañang na seryosong tinutugunan ng pamahalaan ang ulat ng United States Trade Representative na nagsasabing kulang ang safeguards ng Pilipinas laban sa forced labor-related imports o mga produktong may kaugnayan sa forced labor.

Ayon kay Palace Press Officer Claire Castro, mahigpit na tinututulan ng bansa ang anumang uri ng forced labor, at kasalukuyang sinusuri ang ulat ng USTR upang maipakita na sumusunod ang Pilipinas sa umiiral na mga batas sa paggawa.

Sinabi ni Castro na makikipag-ugnayan ang pamahalaan ng Pilipinas sa mga opisyal ng Estados Unidos upang ipagtanggol ang posisyon ng bansa, lalo na kaugnay ng panukalang karagdagang 12.5% na taripa sa ilang produktong Pilipino.

Iginiit din ng Palace official na may mga umiiral nang batas at hakbang ang pamahalaan laban sa forced labor at human trafficking, at handa itong patunayan na hindi lumalabag ang bansa sa mga pandaigdigang pamantayan sa paggawa.—sa panulat ni Anjo Riñon

Kinumpirma ng Palasyo ng Malacañang na kasalukuyan nang pinagmi-meetingan kung magpapatawag ba ng special session o personal na pupulungin ni Pangulong Ferdinand R. Marcos Jr. ang mga senador kasunod ng patuloy na sigalot sa Senado.

Ito ang inihayag ni Palace Press Officer Claire Castro nang tanungin ukol sa posibleng hakbang o interbensyon ng ehekutibo sa kasalukuyang sitwasyon sa Mataas na Kapulungan.

Sinabi ni Castro na inaasahang maglalabas ng pinal na ulat at mga karagdagang detalye ang Palasyo sa oras na matapos ang pormal na diskusyon hinggil sa kung anong partikular na aksyon ang gagawin ng Pangulo upang matugunan ang usapin sa pagitan ng mga mambabatas.—sa panulat ni Anjo Riñon

Maituturing nang “the big one” ng Department of Science and Technology ang nangyaring magnitude 7.8 na lindol sa Mindanao.

Ayon kay DOST Secretary Renato Solidum, may trench o fault line ang bawat lugar sa Pilipinas na may kakayahang magpakawala ng malakas na lindol.

Dagdag pa ni Solidum, posibleng lumagpas sa magnitude 8 ang kayang pakawalang lindol ng mga major tectonic trenches na nakapalibot sa buong bansa, tulad ng Manila Trench.

Kinumpirma rin ni Phivolcs Director Teresito Bacolcol na kayang umabot sa magnitude 8 ang mga naturang trench, at kung nasa ilalim ng dagat, kaya ring maglikha ng tsunami.—sa panulat ni Anjo Riñon

Nanawagan si Philippine Red Cross Chairman Richard Gordon sa mga senador na unahin ang kapakanan ng bayan.

Sinabi ito ni Gordon, na isang dating senador, sa gitna ng nagpapatuloy na alitan sa kapangyarihan sa Mataas na Kapulungan.

Hiling ni Gordon sa mga kasalukuyang senador na isantabi muna ang tensyon sa pulitika upang makatulong sa mga naapektuhan ng magnitude 7.8 na lindol sa Mindanao.—sa panulat ni Anjo Riñon

Handa nang isuko ni Senate President Alan Peter Cayetano ang kanyang posisyon bilang presiding officer ng impeachment court kung makakakuha si Acting Senate President Sherwin Gatchalian ng suporta mula 13 senador.

Ayon kay Senate President Cayetano, wala siyang magiging pagtutol kung malinaw nang mayorya ang kampo ni Acting SP Gatchalian.

Iginiit ni Senate President Cayetano na hindi nakasentro sa kanyang personal na ambisyon ang usapin kundi sa kalayaan ng Senado bilang isang institusyon.

Mahalaga anya na mapanatili ang pagiging independent ng Senado at hindi ito dapat maging “rubber stamp” ng Malacañang sa mga mahahalagang usapin. —sa panulat ni Jordan Gutierrez

Iginiit ni House impeachment prosecutor at Manila Representative Joel Chua na wala pang itinatakdang petsa para sa arraignment ni Vice President Sara Duterte kaugnay ng kasalukuyang iskedyul ng impeachment proceedings sa Senado.

Ayon kay Rep. Chua, mahalagang bahagi ng paglilitis ang arraignment, dahil dito pormal na naghahain ng plea ang inirereklamo.

Anya, inaasahan nilang agad na lilinawin ng impeachment court kung kailan isasagawa ang nakatakdang arraignment.

Binigyang-diin din ni Rep. Chua na kinakailangang personal na humarap ni VP Sara upang ihayag kung guilty o not guilty sa mga paratang na inihain laban sa kanya.—sa panulat ni Reabelle Medina