DWIZ 882

Bukod kay Senador Ronald “Bato” Dela Rosa, malapit na rin umanong arestuhin si dating Congressman Zaldy Co.

Ito’y ayon kay Interior Secretary Jonvic Remulla, alinsunod sa marching orders ni Pangulong Ferdinand Marcos Jr. na kunin si Co sa anumang paraan.

Nabatid na nasa France ang dating mambabatas at nag-a-apply umano ng political asylum.

Nagpahayag din ng kumpiyansa si Remulla na makukuha ang dating kongresista at maibabalik sa bansa kahit anya nagtatago sa sistema ng Europa.

Mapatutunayan anya nila na in-order ang warrant of arrest laban kay Co, at nasa panig nila ang katotohanan at batas.

Dagdag pa ni Sec. Remulla, pupunta siya sa France sa susunod na dalawang linggo para kunin si Co dahil alam na ng mga otoridad ang kinaroroonan nito, partikular ang kanyang address.

Gayunman, iginiit niyang bukod ang kanyang lakad sa balak ding pagpunta ng kapatid na si Ombudsman Jesus Crispin Remulla sa France. | Sa panulat ni Anjo Riñon

Iginiit ni House Senior Deputy Minority Leader at Mamamayang Liberal Party-list Rep. Leila De Lima na hindi dapat umakto na parang biktima si KOJC leader Pastor Apollo Quiboloy.

Ito’y kasunod ng libel at cyberlibel cases na isinampa ni Quiboloy laban kina De Lima, Senator Risa Hontiveros, at Akbayan Party-list Rep. Perci Cendaña.

Ayon kay De Lima, sa halip na sayangin ang resources ng gobyerno, mas mainam na harapin at ipagtanggol ni Quiboloy ang sarili sa mga kasong kinakaharap nito, kabilang ang mga alegasyon ng panggagahasa at pang-aabuso sa mga kababaihan.

Samantala, sinabi ni Cendaña na isang karangalan na mapabilang sa mga taong may prinsipyo at tapang na humaharap sa panggigipit ni Quiboloy.

Tiniyak naman ni Cendaña na hindi sila titigil sa paghahanap ng hustisya para sa mga biktima at hinikayat si Quiboloy na ituon ang oras at lakas sa pagharap sa mga kaso nito sa korte. | Sa panulat ni Geli Mendez

Isang nakalulunos na kuwento ang ibinahagi ni ng isang survivor hinggil sa sinapit ng kaniyang pamilya sa nasunog na MV June Aster sa karagatan ng Coron, Palawan nitong Setyembre 9.

Ayon kay Meynard Indic, base sa kuwento ng kaniyang tiyuhin, nasa itaas na bahagi sila ng barko nang mapansin ang sunog. Mabilis umanong kumalat ang apoy at napuno ng makapal na usok ang barko.

Sa gitna ng dilim at kapal ng usok, gumapang umano ang kaniyang tiyuhin hanggang sa makakita ng maliit na butas kung saan siya nakatalon palabas ng barko.

Hindi na rin umano nito nailigtas ang labi ng kaniyang misis na nakatakda sana niyang iuwi sa Coron mula Maynila.

Nakaligtas naman ang kasintahan ng kaniyang anak na kasamang bumiyahe, ngunit kasalukuyang nasa kritikal na kondisyon sa Culion Hospital.

Patuloy naman ang paghahanap sa kaniyang anak habang nagpapatuloy ang search and rescue operations ng mga awtoridad.

Nagsampa ng criminal at libel complaints ang kampo ni Pastor Apollo Quiboloy laban kay Senador Risa Hontiveros, ML Party-list Representative Leila De Lima, at Akbayan Representative Perci Cendaña.

Ayon sa abogado ni Quiboloy na si Ferdinand Topacio, iniharap nila ang mga reklamo sa Pasig Regional Trial Court kaugnay ng mga pahayag ng tatlong mambabatas na tumutukoy kay Quiboloy bilang “sex offender” at “sex trafficker.”

Iginiit ni Atty. Topacio na hindi pa napagpapasyahan sa korte ang mga paratang laban sa kaniyang kliyente.

Kasalukuyang humaharap si Quiboloy sa mga kasong qualified human trafficking at child abuse sa Pasig Court, habang may extradition request din mula sa U.S. kaugnay ng federal charges.

Samantala, giit ng Department of Justice na layon nitong makumpleto ang pagsusuri sa extradition request sa loob ng dalawang linggo. | Sa panulat ni Reabelle Medina

Inamin ng political analyst na si Atty. Jesus Falcis na siya ang naglabas ng balita na lumipad ang magkapatid na senador na sina Alan Peter at Pia Cayetano patungong Singapore.

Ayon kay Falcis, kuha mula sa Changi Airport sa Singapore ang mga kumalat na litrato na ibinahagi niya sa social media Miyerkules ng gabi.

Naniniwala ang abogado at political analyst na posibleng senyales ng pagkakasala ang pag-alis ng bansa ng mga lingkod-bayan dahil iniiwasan ng mga ito ang mga kasong isasampa, lalo na kung wala itong inire-rekomendang piyansa.

Humahanga rin si Falcis sa political will ni Ombudsman Jesus Crispin Remulla na habulin ang mga may kaso ng katiwalian, ngunit hindi rin niya maiwasang mangamba dahil sa reputasyon nito bilang isang dating mambabatas.—sa panulat ni Anjo Riñon

Umaasa si Manila Rep. Benny Abante na babalik sa bansa sina Senators Alan Peter Cayetano at Pia Cayetano matapos makumpirma ng Bureau of Immigration na nasa Singapore nga ang magkapatid.

Ayon kay Abante, dapat isaalang-alang ang tanong ni Senator-Judge Erwin Tulfo kung dapat bang bumoto sa impeachment case ni Vice President Sara Duterte ang mga senador na hindi nakadadalo sa mga paglilitis.

Aniya, bagama’t nakasaad sa Konstitusyon ang two-thirds of vote o 16 na boto mula sa 24 na senador ang kailangan para sa conviction ni VP Sara, hindi dapat isama sa botohan ang mga Senator-Judge na hindi lumalahok sa paglilitis.

Iginiit ni Abante na maging sa tanggapan ng piskal o sa korte, hindi maaaring magsagawa ng panunumpa kung wala ang piskal o hukom at dapat tularan ito ng Senate Impeachment Court.

Nabatid na apat sa mga senador ang hindi aktibong nakadadalo sa paglilitis kabilang na sina Sen. Jinggoy Estrada at Sen. Rodante Marcoleta na parehong nakadetine kaugnay ng kasong plunder.

Habang si Sen. Ronald “Bato” dela Rosa naman ay nagtatago dahil sa warrant of arrest ng International Criminal Court o ICC at naka-extended medical leave naman si Sen. Loren Legarda.

Asahan naman sa susunod na linggo ang pakikiisa ng mga legal experts upang magbigay ng kaalaman, pananaw, reaksiyon, at payo sa mga Senator-Judges habang nakatakda naman sa September 23 ang oral arguments at ang magiging botohan para malaman kung convicted o acquitted si VP Sara. | via Geli Mendez (Patrol 30)

Pinag-aaralan na ng House Prosecution Panel na ipatawag bilang hostile witness sa impeachment trial ni Vice Presidente Sara Duterte ang kanyang asawa na si Atty. Manases Carpio.

Ito ang kinumpirma ni House Prosecutor Terry Ridon, na pinag-aaralan na ng prosecution kung magiging mahalaga ang testimonya ni Carpio para sa Article II ng impeachment complaint na tumutukoy sa hindi maipaliwanag na yaman ng Bise Presidente.

Ayon kay Ridon, maaaring ipatawag si Carpio kung lumabas ang pangalan nito sa mga financial record o bank accounts at mga dokumentong may kaugnayan sa mga alegasyon kay VP Sara.

Nilinaw ni Ridon na hindi pa kasama si Carpio sa kasalukuyang listahan ng mga testigo ng prosecution at wala pa silang pinal na desisyon sa usapin.

Nabatid na kabilang sa mga listahang isinama bilang witness stand ang mga opisyal at kinatawan mula sa mga bangko, Office of the Ombudsman, Bureau of Internal Revenue, at Securities and Exchange Commission.

Inaasahang magbibigay ang mga ito ng mga record tungkol sa financial transactions, tax payments, at mga registered businesses ni VP Sara at ng kanyang asawa.

Sa ngayon, hawak na ng prosecution ang mga record sa mga bank accounts; corporate registration; at ang AMLC report na may kaugnayan sa financial transactions ng Bise Presidente. | via Geli Mendez

Tila tinuldukan na ni DOJ Secretary Fredderick Vida ang isyung bawal umanong kasuhan ang isang impeachable officer.

Ayon kay Vida, si Pangulong Ferdinand Marcos Jr. lamang, at hindi si VP Sara Duterte, ang may immunity from suit o proteksyon laban sa pagkakaso.

Kasunod ito ng paglalabas ng warrant of arrest laban kay VP Sara kaugnay ng kasong grave threats.

“Consistent po ang Department of Justice. Sa umiiral po na batas at sistemang legal sa Pilipinas. Ang meron lang pong immunity from suit habang nakaupo ay ang ating mahal na pangulo. Ang Vice President po sa partikular na bagay na ito ay wala pong immunity from suit” — DOJ Sec. Vida