DWIZ 882

Binigyang-diin ni House Prosecution Spokesperson Zia Alonto Adiong, na dapat maging pamantayan sa mga susunod na impeachment case ang magiging desisyon ng Senado sa voting threshold sa kaso ni Vice President Sara Duterte.

Ayon kay Adiong, hindi lamang dapat pagdesisyunan ng Senado kung ilang boto ang kailangan para sa kasalukuyang impeachment trial, kundi dapat ding magtakda ng malinaw na pamantayan para sa mga susunod na kaso.

Aniya, nakasaad sa 1987 Constitution na kailangan ang two-thirds requirement ng lahat ng senador para mahatulan ang isang impeachable official.

Sinabi ni Adiong, na ang kailangang linawin ay kung paano ito isasalin sa aktuwal na pagboto, na nakadepende sa magiging pasya ng Impeachment Court.

Iginiit ng mambabatas, dapat manaig sa desisyon ang public interest at ang prinsipyo na ang public office ay isang public trust.

Bukod pa dito, dapat ding isaalang-alang sa magiging desisyon ang mandato ng Impeachment Court at ang layunin nitong magtakda ng malinaw na paraan kung paano pananagutin ang mga opisyal ng gobyerno, habang inuuna ang pampublikong interes. | via Geli Mendez (Patrol 30)

Nakaumang na ang Immigration Lookout Bulletin Order laban kay Batangas First District Representative Leandro Leviste.

Ayon kay Justice Secretary Fredderick Vida, anumang araw ay posibleng mag-isyu na ng ILBO ang Bureau of Immigration sakaling tumanggi itong humarap at sagutin ang alegasyon ng qualified human trafficking laban sa kanya at sa iba pa.

Bahagi ng evaluation ng DOJ ang rekomendasyon ng National Bureau of Immigration na maglabas ng ILBO laban kay Leviste at iba pang personalidad na iniuugnay sa umano’y “honey trap” scheme laban kay Executive Secretary Ralph Recto.

Ipinaliwanag ni Vida na maaaring maglabas ng ILBO laban sa isang taong nahaharap sa isang kasong kriminal, alinsunod sa proseso.

Kumpiyansa si Department of the Interior and Local Government Secretary Jonvic Remulla na mahuhuli na sa France si dating Congressman Zaldy Co sa loob lamang ng dalawang linggo.

Ayon kay Secretary Remulla, personal siyang magtutungo sa nasabing bansa upang tumulong sa paghahanap at pagpapauwi kay Co, na nahaharap sa kasong pandarambong sa Sandiganbayan.

Nais anya ni Pangulong Ferdinand Marcos Jr. na maaresto si Co sa anumang paraang kinakailangan.

Iginiit din ng kalihim na may address na sila ng bahay na tinutuluyan ng dating kongresista.

Nilinaw rin ni Secretary Remulla na hindi hawak ng mga awtoridad sa France si Co at nagtatago lamang ito sa likod ng mga sistema ng Europe. | sSa panulat ni Reianne Antiquina

Target ng Pilipinas na maging pangunahing lugar para sa negosyo at manufacturing.

Ito ang sinabi ni Pangulong Ferdinand Marcos Junior sa 2026 Luzon Economic Corridor Investment Forum sa Taguig City.

Ayon sa Pangulo, naghahanap ngayon ang mga negosyo ng mga bansang ligtas at maaasahan para sa pangmatagalang pamumuhunan.

Kabilang sa mga puhunan ng Pilipinas ang malaking domestic market, batang workforce, at magandang ugnayan sa ibang bansa.

Patuloy rin anya ang pagpapahusay sa transportasyon, enerhiya, at digital infrastructure para suportahan ang mga negosyo.

Nag-uugnay ang Luzon Economic Corridor sa Subic, Clark, Manila, at Batangas at tinatayang kumakatawan sa kalahati ng gross domestic product ng bansa.

Target ng House Prosecution Panel na matapos sa una o ikalawang linggo ng Oktubre ang presentasyon para sa Article 2, o alegasyong hindi maipaliwanag na yaman ni Vice President Sara Duterte.

Ito ang sinabi ni House Prosecutor Terry Ridon, na kasama sa timeline ang posibilidad na hindi tanggapin ng depensa ang mahigit isandaang requests for admission ng prosecution.

Nabatid na binigyan lamang ng labinlimang araw ang defense team para tumugon sa naturang request.

Ayon kay Ridon, maaari ring huwag nang ipatawag ang lahat ng nasa witness list kung sapat na ang mga naiharap na ebidensiya sa impeachment trial.

Kabilang naman sa mga dokumentong inihanda ng prosecution ang mga bank at tax record na may kaugnayan kay V-P Sara, sa kanyang asawang si Atty. Manases Carpio, at sa kanilang mga kompanya, na nakuha sa pamamagitan ng subpoena ng Senate Impeachment Court.

Suportado ni Parañaque 2nd District Rep. Brian Yamsuan ang pagpapalakas ng senior high school curriculum upang mas maging handa sa trabaho at sa kanilang buhay ang mga kabataan.

Sa pagdinig ng House Appropriations Committee para sa 2027 budget ng DepEd, sinabi ni Yamsuan na mahalagang bigyan ng sapat na skills ang mga estudyanteng hindi agad makakapagkolehiyo dahil sa kakulangan sa pera.

Kabilang sa mga pagbabago ang pagpapahaba ng work immersion o training ng senior high school learners sa 640 oras, mula sa dating 80 hanggang 160 oras.

Target ding gawing core subject ang life and career skills sa curriculum upang matulungan silang maging handa sa trabaho kahit hindi pa nakakapagkolehiyo.

Ayon kay Education Secretary Sonny Angara, layunin ng hakbang na matiyak na hindi “hilaw” ang mga SHS graduate pagpasok sa trabaho.

Naniniwala si Yamsuan na ang pag-upgrade sa K-12 curriculum ay maaaring maging susi sa pagpapababa ng unemployment rate sa bansa.

Nagpahayag si Yamsuan ng buong suporta sa pagpapatibay at posibleng pagdagdag sa pondo ng DepEd sa ilalim ng 2027 national budget.

Sinuportahan din ni Yamsuan ang pagpapalakas ng Good Manners and Right Conduct o GMRC at Values Education, gayundin ang mental health support sa mga pampublikong paaralan. | Sa panulat ni Geli Mendez

Hinimok ni House Impeachment Spokesperson Zia Alonto Adiong si Vice President Sara Duterte na humarap sa witness stand at ipaliwanag ang mga isyu sa paggamit ng confidential funds.

Ayon kay Alonto Adiong, kung naniniwala ang bise presidente na siya ay inosente at walang nilabag na anumang krimen, dapat niyang gamitin ang impeachment trial para personal na ipaliwanag ang mga transaksyon at maling paggamit ng pondo ng OVP at DepEd.

Iginiit ni Adiong na may mga tanong pa tungkol sa paglilipat at paggamit ng confidential funds na hindi lubusang nasagot ng iba pang mga testigo.

Para sa mambabatas, si VP Sara mismo ang tanging makakasagot sa tanong kung bakit niya iniutos ang paglilipat ng pondo at kung paano ito ginamit.

Aniya, mayroon nang mga ebidensyang nagpapakita ng mga paglabag sa paghawak at liquidation ng confidential funds, pero mas mainam kung si VP Sara ang magpaliwanag nito.

Gayunman, hindi pa hinihiling ng prosecution na agad siyang humarap sa witness stand at nakatakdang pag-usapan ito sakaling matapos na ang presentasyon sa iba pang articles of impeachment. | Sa panulat ni Geli Mendez

Umabot na sa halos 10,000 ang mga pulis na itinalaga ng Philippine National Police para sa Bangsamoro Parliamentary Elections sa Setyembre 14.

Kabilang dito ang nasa 4,000 tauhan mula sa Police Regional Office BARMM at mahigit 5,000 augmentation forces mula sa ibang regional offices at specialized units.

Pangunahing babantayan ng mga pulis ang nasa apatnalibong voting centers, bukod sa COMELEC offices, checkpoints, at iba pang election areas.

Mayroon ding mahigit 2,000 Quick Reaction Force personnel na nakaantabay para sa agarang pagtugon sa anumang insidente.

Sinabi ni Atty. Domingo Cayosa, dating national president ng Integrated Bar of the Philippines na napapanahon ang panawagan ni Senador Erwin Tulfo na pormal na pagpasiyahan ng Senado bilang impeachment court ang voting threshold sa impeachment trial ni Vice President Sara Duterte.

Ayon kay Cayosa, may pinagtatalunang interpretasyon sa probisyon ng ng 1987 Constitution na nagsasabing kailangan ang two-thirds vote ng lahat ng miyembro ng Senado para sa conviction.

Inaasahan ni Cayosa na magiging mahalagang gabay sa mga senador ang opinyon ng mga retired Supreme Court justices at iba pang eminent jurists na inimbitahang maging amici curiae o “friend of the court.”

Maaari ring makapagtanong ang prosecution at defense sa mga inimbitahang resource persons bago tuluyang magpasya ang mga senador.

Pinaghahandaan na ng House prosecution panel ang presentasyon ng mga ebidensya at testigo matapos hilingin sa Senate Impeachment Court na ipatawag ang unang tatlong testigo para sa pagtalakay sa Article 2 o alegasyon ng hindi maipaliwanag na yaman ni Vice President Sara Duterte.

Kabilang sa mga nais ipatawag ng prosecution sina retired Sandiganbayan Presiding Justice Amparo Cabotaje-Tang, Ombudsman Records Division OIC Karen Batu, at SEC Company Registration and Monitoring Department Director Gerardo Del Rosario para patunayan ang mga alegasyon sa bise presidente.

Ayon kay House Prosecutor Terry Ridon, inaasahang tatalakayin ni Cabotaje-Tang ang pananagutan at integridad ng mga opisyal ng gobyerno at ang hindi idineklarang yaman at mga ipinagbabawal na interes sa negosyo.

Si Batu naman ang magpapaliwanag tungkol sa mga SALN ng bise presidente, habang si Del Rosario ang magpapatunay sa mga rekord ng mga kumpanya ng mag-asawang Duterte-Carpio.

Sisimulan ang Article II hearings sa September 14 o Lunes ng susunod na linggo at target ng prosecution na matapos ang paglalahad ng ebidensya sa unang bahagi o kalagitnaan ng Oktubre. | Sa panulat ni Geli Mendez