DWIZ 882

Tumaas sa 4.7% ang unemployment rate sa bansa noong April 2026.

Ayon sa Philippine Statistics Authority, katumbas ito ng 2.41 milyong Pilipinong walang trabaho, mas mataas kumpara sa 2.06 milyon noong Abril 2025.

Sa kabila nito, umabot pa rin sa 48.89 milyon ang bilang ng mga Pilipinong may trabaho noong Abril.

Bukod dito, naitala din ang pagtaas ng bilang ng mga underemployed o mga manggagawang naghahanap pa ng dagdag na oras o mas maayos na trabaho, kung saan umabot ito sa 7.41 milyon, na may underemployment rate na 15.2%.

Ipinapakita sa datos ng PSA na mas maraming Pilipino ang naghahanap ng mas magandang oportunidad sa trabaho habang nananatiling hamon ang paghahanap ng sapat at de-kalidad na hanapbuhay sa bansa.—sa panulat ni Reabelle Medina

Nagpaabot ng simpatya at suporta ang ilang world leaders sa Pilipinas at nagpahayag ng kahandaang tumulong matapos ang magnitude 7.8 na lindol na tumama sa Mindanao.

Kabilang sa mga nag-alok ng tulong si Japanese Prime Minister Sanae Takaichi at Taiwanese President Lai Ching-te.

Nakiramay naman sina Indian Prime Minister Narendra Modi at Australian Ambassador to the Philippines Marc Innes-Brown, maging ang German at French embassies.

Sa panig ng U.S. Embassy, patuloy nitong minomonitor ang sitwasyon at nakikipag-ugnayan sa mga otoridad habang nakikipagtulungan na rin ang United Nations sa gobyerno ng Pilipinas upang i-assess ang epekto ng lindol.

Abiso mula sa Maynilad

Magkakaroon ng scheduled water service interruption sa ilang bahagi ng Caloocan City, Quezon City, Valenzuela City, at Obando, Bulacan simula alas-11 ng gabi ng June 10 hanggang June 11, 2026.

Ito ay dahil sa preventive maintenance at system improvement works sa La Mesa Pumping Stations ng Maynilad.

Pinapayuhan ang mga apektadong customer na mag-ipon ng sapat na tubig bago magsimula ang interruption. Magkakaiba ang oras ng pagbabalik ng serbisyo depende sa lugar.

Para sa kumpletong listahan ng mga apektadong lugar at interruption schedules, bisitahin ang Maynilad website at official Facebook page, o tumawag sa hotline 1626.—sa panulat ni Reabelle Medina

Kinumpirma ni Acting Senate President at Senate Pro Tempore Sherwin Gatchalian na mayroong banta sa seguridad ng Senado.

Ito’y matapos nilang matanggap ang impormasyon mula sa mga otoridad ng National Bureau of Investigation.

Gayunman, sinabi ni Acting SP Gatchalian na hindi niya maaaring isiwalat ang detalye ng intelligence information na kanyang natanggap.

Samantala, tiniyak niya na magpapatupad sila ng mas mahigpit na seguridad sa institusyon.

Matatandaang simula nang magpalit ng liderato sa Senado noong May 11, maraming bilang ng otoridad ang naka-deploy sa paligid ng Senado, bunsod ng sunod-sunod na mga rally gaya ng mga supporter ng Duterte administration.—sa panulat ni Reabelle Medina

Posibleng maantala ang impeachment trial laban kay Vice President Sara Duterte na itinakda sa Hulyo 6.

Ibinabala ito ng legal expert na si Atty. Jayvee Gorospe kung hindi pa magkasundo ang mga senador at maipa-plantsa ang hidwaan sa pagitan ng kampo nina Senator Alan Peter Cayetano at Acting Senate President Sherwin Gatchalian.

Kinuwestyon din ni Atty. Gorospe ang balasahan ng mga committee chairmanship sa Senado kasabay ng pagbibigay-diin na nananatiling bahagi ng mataas na kapulungan ang mga senador na may kinahaharap na kaso o pansamantalang hindi nakadalo sa sesyon.

Samantala, iginiit ni Atty. Gorospe na tanging Korte Suprema ang may kapangyarihang makapagbigay ng pinal na desisyon sa isyung kinahaharap ng Senado.—sa panulat ni Reabelle Medina