Nanawagan si Philippine Red Cross Chairman Richard Gordon sa mga senador na unahin ang kapakanan ng bayan.
Sinabi ito ni Gordon, na isang dating senador, sa gitna ng nagpapatuloy na alitan sa kapangyarihan sa Mataas na Kapulungan.
Hiling ni Gordon sa mga kasalukuyang senador na isantabi muna ang tensyon sa pulitika upang makatulong sa mga naapektuhan ng magnitude 7.8 na lindol sa Mindanao.—sa panulat ni Anjo Riñon
Handa nang isuko ni Senate President Alan Peter Cayetano ang kanyang posisyon bilang presiding officer ng impeachment court kung makakakuha si Acting Senate President Sherwin Gatchalian ng suporta mula 13 senador.
Ayon kay Senate President Cayetano, wala siyang magiging pagtutol kung malinaw nang mayorya ang kampo ni Acting SP Gatchalian.
Iginiit ni Senate President Cayetano na hindi nakasentro sa kanyang personal na ambisyon ang usapin kundi sa kalayaan ng Senado bilang isang institusyon.
Mahalaga anya na mapanatili ang pagiging independent ng Senado at hindi ito dapat maging “rubber stamp” ng Malacañang sa mga mahahalagang usapin. —sa panulat ni Jordan Gutierrez
Sa isang Facebook post, naglabas ng pahayag si Senator Alan Peter Cayetano kung saan kinuwestiyon niya ang umano’y security threat sa Senado na iniulat ng National Bureau of Investigation (NBI).
Ayon kay Cayetano, kung lehitimo ang banta, dapat itong naipaalam sa lahat ng senador at hindi lamang sa piling mga miyembro ng kapulungan. Hiniling din niya ang paglilinaw sa pinagmulan at batayan ng naturang impormasyon.
Kasabay nito, iginiit ng senador na hindi dapat mailihis ng isyu ang atensyon ng publiko mula sa mga alegasyon ng anomalya sa flood control projects na patuloy na inuusisa.
#dwiz #dwiznews #aliw23
Iginiit ni House impeachment prosecutor at Manila Representative Joel Chua na wala pang itinatakdang petsa para sa arraignment ni Vice President Sara Duterte kaugnay ng kasalukuyang iskedyul ng impeachment proceedings sa Senado.
Ayon kay Rep. Chua, mahalagang bahagi ng paglilitis ang arraignment, dahil dito pormal na naghahain ng plea ang inirereklamo.
Anya, inaasahan nilang agad na lilinawin ng impeachment court kung kailan isasagawa ang nakatakdang arraignment.
Binigyang-diin din ni Rep. Chua na kinakailangang personal na humarap ni VP Sara upang ihayag kung guilty o not guilty sa mga paratang na inihain laban sa kanya.—sa panulat ni Reabelle Medina
Patuloy ang pag-angat ng karera ng Filipina tennis star na si Alex Eala matapos siyang umakyat sa No. 33 sa pinakabagong Women’s Tennis Association (WTA) rankings.
Mas mataas ito ng apat na puwesto mula sa dating No. 37, kasunod ng kanyang kamakailang tagumpay sa Birmingham Open sa United Kingdom, kung saan nasungkit niya ang kanyang ikalawang WTA 125 title ngayong taon.
Muling itinampok ng Marikina City ang iconic na World’s Largest Shoes matapos itong maibalik at maayos mula sa mga pinsalang dulot ng paglipas ng panahon at kalamidad.
Ayon sa lungsod, higit pa sa restoration project ang pagbuhay sa higanteng sapatos dahil simbolo rin ito ng mayamang kasaysayan ng industriya ng sapatos sa Marikina at ng katatagan ng mga Marikenyo sa harap ng mga hamon.
Sinabi ni Sen. Bam Aquino na maaaring umabot na sa 13 miyembro ang grupo ni Sen. Sherwin Gatchalian, na kinakailangan upang pormal na mahalal itong Senate President.
Ayon kay Aquino, may posibilidad na madagdagan pa ang kanilang hanay sa mga susunod na araw, bagama’t hindi niya pinangalanan kung sino ang senador na maaaring sumama sa kanilang bloc.
Patuloy ang hidwaan sa liderato ng Senado sa pagitan ng kampo nina Gatchalian at Sen. Alan Peter Cayetano matapos ang kontrobersyal na reorganisasyon noong Hunyo 3.
Kinumpirma ng National Task Force for the West Philippine Sea (NTF-WPS) ang pagkakaroon ng isang floating structure sa Bajo de Masinloc matapos itong mamataan sa isinagawang aerial at maritime monitoring.
Ayon sa NTF-WPS, ang istruktura ay may sukat na humigit-kumulang 6×6 metro at may nakikitang antenna, habang may mga tao ring namataan sa ibabaw nito. Kaugnay nito, nagsagawa na ng diplomatic action ang Department of Foreign Affairs laban sa ilegal na presensya ng naturang pasilidad.
Iginiit ng NTF-WPS na nananatiling bahagi ng Pilipinas ang Bajo de Masinloc at patuloy na ipagtatanggol ng pamahalaan ang soberanya at karapatan ng bansa sa West Philippine Sea.
Karaniwang ginagamit ng maraming Pilipino ang monosodium glutamate o M.S.G., na mas kilala bilang vetsin, na ginagawang pampalasa sa mga nilulutong pagkain.
Ayon sa World Health Organization at U.S. Food and Drug Administration, ligtas ang M.S.G. kapag ginagamit sa tamang dami.
Hindi rin anila ito itinuturing na sanhi ng kanser batay sa mga kasalukuyang pag-aaral.
Gayunman, maaaring makaranas ang ilang taong sensitibo sa vetsin ng pananakit ng ulo, pagkahilo, pamamanhid, o paninikip ng dibdib kapag naparami ang konsumo.
Kaya’t inirerekomenda ng mga eksperto ang paggamit ng natural na pampalasa tulad ng bawang, sibuyas, luya, at kamatis, upang mabawasan ang sobrang sodium sa pagkain.
Winalis ng Alas Pilipinas ang Kyrgyzstan Women’s National Volleyball Team sa 2026 AVC Women’s Volleyball Cup sa scores na 25-9, 25-11, 25-17.
Nasungkit ng Alas ang ikalawang panalo sa tatlong laro upang umangat sa 2-1 record sa Pool A, habang bumagsak ang Kyrgyzstan sa 0-3.
Pinamunuan nina Thea Gagate at Jovelyn Gonzaga ang opensa ng Pilipinas, kung saan kumamada si Gagate ng 11 points habang pumalo si Gonzaga ng 10 points.
Target ngayon ng Alas Pilipinas na mapalakas pa ang kampanya para sa semifinals sa pagsagupa sa South Korea Women’s National Volleyball Team, na kasalukuyang nangunguna sa Pool A na may malinis na 2-0 record.