DWIZ 882

Nanindigan ang Senate Impeachment Court na impartial ito sa pagpili ng apat na retiradong mahistrado ng Korte Suprema bilang mga amici curiae o “friends of the court” sa usapin ng interpretasyon ng two-thirds voting rule ng Senado sa isang impeachment trial.

Nauna nang inanunsyo ng naturang korte na hihingin nito ang legal expertise nina dating Supreme Court Chief Justices Artemio Panganiban, Reynato Puno, at Hilario Davide, at retiradong Associate Justice Rodolfo Azcuna tungkol sa isyu.

Ayon kay Senate Impeachment Court spokesman Reginald Tongol, nagsilbing chairman ng Consultative Committee na nagsuri sa 1987 Constitution noong administrasyong Duterte; habang naging bahagi naman sina Davide at Azcuna ng 1986 Constitutional Commission na nagbalangkas ng kasalukuyang Saligang Batas.

Nag-ugat ang isyu matapos unti-unting nalagas ang mga senador na dumadalo sa pagdinig ng Impeachment Court dahil sa pagkakakulong, medical leave, personal na dahilan, at pagtatago sa batas.—sa panulat ni Anjo Riñon

Inaasahang tataas ang singil ng mga water concessionaire sa Metro Manila sa susunod na buwan.

Ito’y matapos kumpirmahin ng Metropolitan Waterworks and Sewerage System Regulatory Office na inotorisa nito ang Foreign Currency Differential Adjustment para sa Maynilad at Manila Water sa ikaapat na quarter ng 2026.

Walong sentimos ang idaragdag sa kada cubic meter na konsumo para sa mga customer ng Manila Water.

Nangangahulugan ito ng dagdag na 34 centavos para sa mga kumokonsumo ng 10 cubic meters pababa; dagdag na 75 centavos para sa 20 cubic meters na konsumo; at piso-singkuwenta’y-tres para sa 30 cubic meters na konsumo.

Samantala, bente-kwatro sentimos naman ang idaragdag ng Maynilad sa kada cubic meter ng konsumo.

Ibig sabihin nito, madaragdagan ng 67 centavos ang mga kumokonsumo ng 10 cubic meters pababa; 2 pesos, 54 centavos para sa 20 cubic meters na konsumo; at singko-disi-nwebe para sa 30 cubic meters na konsumo. | Sa panulat ni Anjo Riñon

Ipinag-utos ng Sandiganbayan Third Division ang paglipat kay dating House Speaker Martin Romualdez sa Philippine General Hospital ngayong araw upang doon ito suriin.

Ayon sa direktiba ng anti-graft court, ibeberipika ng mga doktor ng PGH ang resulta ng mga doktor ni Romualdez sa Cardinal Santos Medical Center matapos dinggin ang testimonya mula sa mga ito.

Matatandaang inaresto si Romualdez at tatlo pang iba dahil sa pagkakadawit ng mga ito sa ₱7.4-bilyong plunder case kaugnay sa flood control scandal.

Inaasahang ililipat si Romualdez mula Cardinal Santos patungong PGH mamayang 10 ng umaga. | Sa panulat ni Anjo Riñon

Itinutulak ni DILG Secretary Jonvic Remulla ang pagbalik ng age requirement sa Sangguniang Kabataan (SK) candidates na 15 hanggang 19 anyos.

Giit ni Remulla, ito’y para mas mapalapit ang mga kabataan batay sa kanilang edad at karanasan sa sektor na kanilang nirerepresenta.

Sa ilalim ng kasalukuyang batas, dapat ay 18 hanggang 24 anyos ang mga SK official sa araw ng halalan.

“My recommendation is to bring it back to 15 to 19 years old, so that they would still be staying in the community,” ani DILG Sec. Jonvic Remulla.

Nanghihinayang si Ombudsman Jesus Crispin Remulla na umaapela pa si dating House Speaker Martin Romualdez na ipa-hospital arrest ito.

Ayon kay Remulla, matagal na niyang kilala si Romualdez, kaya nanghihinayang siya na humiling ito ng hospital arrest.

Kaya payo ng Tanodbayan: dapat harapin ng dating lider ng Kamara ang mga kaso nito.

Samantala, mainam din anya na ilipat si Romualdez sa isang pampublikong pasilidad gaya ng Philippine General Hospital matapos ipag-utos ng Sandiganbayan na ilipat ito mula sa Cardinal Santos Medical Center.—sa panulat ni Anjo Riñon

Tinawag na “mapanlinlang” ng ilang grupo ng manggagawa ang proseso sa likod ng bagong wage order sa Metro Manila na nagkakaloob ng 60 pesos dagdag-sahod araw-araw.

Ayon sa National Wage Coalition, kabilang ang Trade Union Congress of the Philippines, hindi anila napaliwanag nang maayos sa mga manggagawa na ang isinagawang konsultasyon noong Setyembre 2 ay gagamiting batayan para sa bagong wage order.

Kinuwestiyon din ng mga labor group kung bakit naglabas ng Wage Order Number NCR-28 ang Regional Tripartite Wages and Productivity Board-NCR, na nagtatakda ng 60 pesos na dagdag-sahod, habang nakapailalim pa sa court injunction ang naunang Wage Order Number NCR-27 na nagkakaloob ng 85 pesos increase.

Samantala, iginiit ni Labor Secretary Francis Tolentino na hindi dapat ituring na bawas sa 85 pesos ang 60 pesos increase dahil hindi pa naipatutupad ang naunang wage order.

Kung maaprubahan, posibleng mag-epekto ang bagong wage order sa September 26 o 27.—sa panulat ni Reianne Antiquina

Naniniwala si House Impeachment Spokesperson Zia Alonto Adiong na may conflict of interest ang panibagong panawagan ni Vice President Sara Duterte na umalis sa puwesto si Pangulong Ferdinand Marcos Jr.

Ayon kay Adiong, maaaring direktang makikinabang ang Bise Presidente sakaling bumaba sa puwesto ang Pangulo dahil siya ang constitutional successor o hahalili sa pagkapangulo.

Aniya, ang mga hindi pagkakasundo sa pagitan ng Pangulo at Bise Presidente ay dapat idaan sa mga prosesong naaayon sa Konstitusyon at batas sa halip na basta na lamang hilingin na magbitiw sa puwesto si Pangulong Marcos.

Matatandaang muling binatikos ni VP Sara si PBBM at tinawag itong sinungaling at mapang-abuso sa isang talumpati sa kaniyang mga tagasuporta.

Samantala, nagpapatuloy ang impeachment trial laban sa Bise Presidente sa Senado kaugnay ng mga alegasyon ng maling paggamit ng confidential funds, unexplained wealth, bribery, at pagbabanta sa Pangulo at pamilya nito. | via Geli Mendez (Patrol 30)

Para kay House Impeachment Adviser at Spokesperson Robert Ace Barbers, malaya si Vice President Sara Duterte na sabihin ang anumang nais nitong sabihin sa publiko at social media.

Kasunod ito ng panibagong batikos ni VP Sara laban kay Pangulong Ferdinand Marcos Jr. kung saan, hiniling pa nito na bumaba sa puwesto si PBBM.

Tinawag din ng Bise Presidente si Pangulong Marcos na sinungaling at mapang-abuso.

Sa halip na patulan ang mga pahayag ni Duterte, sinabi ni Barbers na nakatuon ang House Prosecution sa impeachment case na dinidinig sa Senado.

Kung mababatid, natapos na ng House Prosecution ang presentasyon ng ebidensiya sa Article 1 na may kinalaman sa umano’y maling paggamit ng confidential funds ng OVP at DepEd.

Habang magsisimula naman sa Lunes, September 14, ang presentasyon ng ebidensiya para sa Article 2, na tumatalakay sa umano’y unexplained wealth o hindi maipaliwanag na yaman ni VP Sara. | via Geli Mendez (Patrol 30)

Iginiit ni Ako Bicol Party-list Rep. Alfredo Garbin Jr. na ang Saligang Batas pa rin ang pinaka-maaasahang batayan at kaibigan ng hukuman sa pagtukoy ng voting threshold para sa conviction sa impeachment trial.

Kasunod ito ng nais ng Senate Impeachment Court na imbitahan sa paglilitis ang apat na retiradong mahistrado bilang amici curiae upang magbigay-linaw sa usapin ng kinakailangang boto para sa conviction.

Bilang abogado at vice chairperson ng House Committee on Justice, sinabi ni Garbin, na bagamat mahalagang marinig ang pananaw ng mga amici curiae, higit na dapat manaig ang malinaw na probisyon ng Konstitusyon.

Batay sa Article 11, Section 3 ng Saligang Batas, kailangan ang two-thirds requirement ng lahat ng miyembro ng Senado para ma-convict ang isang pinai-impeach na opisyal.

Dahil 24 ang miyembro ng Senado, sinabi ni Garbin na 16 na boto ang kailangan para sa conviction at hindi kailangan ng calculator, legal doctrine, o kahit opinyon ng ibang tao.

Aniya, kung nais baguhin ang two-thirds requirement, dapat amyendahan muna ang Konstitusyon sa prosesong itinakda nito at hindi dapat baguhin sa pamamagitan lamang ng isang ruling. | via Geli Mendez (Patrol 30)