DWIZ 882

Pumalo na sa mahigit 27,000 pamilya o 125,107 na indibwal ang nanunuluyan ngayon sa mga evacuation centers dahil sa panganib na dulot ng Bulkang Taal.

Ayon kay Batangas Provincial Disaster Risk Reduction Management Office Head Lito Castro, ang mga ito ay nanunuluyan sa 393 na mga evacuation areas sa probinsiya.

Mayroon ding naitalang mga evacuees sa labas ng Batangas partikular sa Quezon Province at Calamba, Laguna.

Samantala, nagpapatuloy naman ang forced evacuation sa mga 2 syudad at 12 munisipalidad na pasok sa 14 kilometer radius na danger zone sa paligid ng Bulkang Taal.

Patuloy na nadaragdagan ang bilang ng mga evacuees sa bayan ng Bauan, Batangas.

Ayon kay Bauan Vice Mayor Julian Casapao, pumalo na sa mahigit 4,000 pamilya o 16,000 mga indibwal ang kanilang kinakalinga sa mga evacuation centers sa kanilang bayan.

Sapat naman aniya ang kanilang tinatanggap na tulong mula sa national government gayundin sa mga pribadong inbidwal, mga probinsiya at iba’t ibang grupo ngunit hindi anila alam kung hanggang kailan kakayanin na isustain ito.

Isa pang problema nila sa ngayon ay okupado ang lahat ng mga paaralan sa kanilang bayan kaya naman hindi rin nila malaman kung kailan magbabalik eskwela ang mga estudyante.

Samantala, nilinaw naman ni Casapao na 1 lamang at hindi 3 ang namatay na evacuee sa kanilang lugar.

Inirekumenda na ng DOJ Panel of Prosecutors na kasuhan sa Korte ang 12 sa 13 na mga pulis sa pangunguna ni Police Major Rodney Baloyo na tumatayong respondents sa isinampang kaso ng PNP-CIDG laban sa mga tinaguriang ninja cops ng Pampanga.

Sa inilabas na resolution ng DOJ kabilang sa mga pinakakasuhan si dating PNP Chief Oscar Albayalde nang paglabag sa Anti-graft and Corrupt Practices Act na isusumite naman sa Office of the Ombudsman alinsunod narin sa itinatadhana ng Ombudsman act.

Ayon sa DOJ, ito ay dahil sa pag impluwensiya ni Albayalde sa ibang opisyal ng gobyerno para protektahan ang kanyang mga tauhan at dahil na rin sa hindi pagpapatupad ng kautusan na masuspinde ang kanyang mga dating tauhan sa Pampanga na kasama sa anti-drug operation noong 2013.

Pinakakasuhan din ng DOJ ang 12 sa 13 dati nitong tauhan na inirereklamo ng CIDG kabilang na si P/Maj. Rodney Baloyo.

Ayon sa DOJ, mayroong probable cause para asuntuhin sina Baloyo at 11 tauhan  nito dahil sa paglabag sa paglabag sa Sec. 27, 29 Art II ng Republic Act 9165 dahil narin sa di pagdedeklara ng tama sa kanilang nakumpiskang ilegal na droga, at planting of evidence kabilang na ang paglabag sa Sec. 3 at 92 Art XI ng RA 9165 o Comprehensive Dangerous Drugs Act of 2002.

Sinabi ng DOJ, nagkaroon ng misappropriations ang grupo ni Baloyo nang 36.60 kilos lamang ng nasabat nilang droga ang isinama nila sa kanilang report kahit pa lumabas sa imbestigasyon na mayroon talagang halos 200 kilo ng iligal na droga ang kanilang nakumpiska sa operasyon.

P300,000 lang din ang idineklara ng grupo ni Baloyo na nakumpiska nila sa operasyon sa kabila nang aabot talaga ito sa P10M.

Ibinasura naman ng DOJ Panel ang reklamo laban kay PO2 Anthony Lacsamana dahil sa kawalan ng sapat na ebidensiya. Ayon sa DOJ, base sa mga ebidensiya, hindi bahagi ng anti-drug operation si Lacsamana.

Nagkakanakawan na sa ilang bayan sa Batangas na apektado ng pag aalburoto ng Bulkang Taal.

Nagreklamo ang ilang residente ng Laurel at Agoncillo na mayroong mga magnanakaw na sumasalakay sa kanilang iniwang mga tahanan kapag wala na ang mga bantay dito.

Isa sa mga napaulat na nawawala ay ang isang television set.

Una nang binawalan na manatili at bumalik sa kanilang tahanan ang mga residente partikular sa mga bayan na inilagay sa lock down para na rin sa kaligtasan ng mga ito.

Istrikto mang nagbabantay dito ang mga otoridad ay nakakapuslit pa rin ang ilan para masilip ang kanilang mga iniwang tahanan.

Uubrang makapagpasa ang Kongreso ng P10B supplemental funds para sa mga biktima ng pagsabog ng Taal Volcano.

Ayon kay Senator Sherwin Gatchalian, posible kasing kulangin ang 27 billion calamity fund na hawak ng gobyerno mula sa 2020 national budget at tirang budget nuong 2019.

Batay kasi sa pag-aanalisa ng mga eksperto, maaring pumalo sa 35 billion ang damages na naiwan ng pagsabog ng bulkan at posible pa itong tumaas.

Pansamantalang isasara ang US Embassy sa Maynila sa Lunes, January 20.

Sa abiso ng Embahada, ito ay upang magbigay daan sa pag gunita ng Dr. Martin Luther King Jr. Day na isang holiday sa Amerika.

Sarado rin ang iba pang affiliated offices ng embahada sa nasabing petsa.

Balik normal naman ang operasyon nito kinabukasan, Martes January 21.

Nagbigay ng donasyon ang lokal na pamahalaan ng Maynila sa mga biktima ng pagsabog ng Bulkang Taal.

Ayon kay Manila Mayor Isko Moreno, naglaan ang Manila City Government ng P2.5M na paghahatian ng mga bayan ng Talisay, Taal, Agoncillo, Lemery at Laurel.

Kasabay nito ay hinikayat naman ng Alkalde na patuloy na manalangin sa diyos upang maging maayos ang kalagayan ng mga nasalanta.

Nadagdagan pa ang mga nagkakasakit ng polio sa bansa.

Ito ay matapos na maitala ng Research Institute of Tropical Medicine ang 4 na bagong kaso ng polio.

2 ang naitalang may sakit na polio sa Maguindanao isang lalaki at babae may edad 2 at 3.

Isang bagong kaso sa Sultan Kudarat edad 2 taong gulang na batang lalaki at 3 taong gulang na batang lalaki naman mula sa Quezon City.

Dahil dito, sumampa na sa 16 ang kaso ng polio sa bansa.

Kaugnay nito, muling umapela ang DOH sa mga magulang na samantalahin ang vaccination drive ng ahensiya laban sa polio.