Nagbabala si Tanauan City, Batangas Mayor Sweet Halili na puputulin ang suplay ng tubig at kuryente kung magmamatigas pa rin ang mga taga doon na hindi lumikas.
Ayon sa alkalde, nagbigay na siya ng 24 oras na ultimatum para sa mga ayaw sumama sa mandatory evacution.
Aniya, kailangan ding isipin ang kapakanan ng mga rescuers na sasakripisyo sa kabila ng panganib na dala ng pagputok ng bulkang Taal.
Sa ngayon ay nagpapatupad pa rin ng mandatory force evacuation sa 21 barangay ng Tanuan City.
Kinumpirma ng Department of Foreign Affairs (DFA) na mayroong mga Pilipino mula sa Haiti ang kumuha ng repatriation assistant.
Ayon sa ahensya, inasistehan ng Embahada ng Pilipinas sa Washigton D.C. sa Amerika ang 30 Pilipino.
Anila, nagpetisyon ang mga Pilipino sa Haiti ng repatriation dahil sa hindi magandang lagay ng ekonomiya at seguridad sa naturang bansa.
Samantala, 9 mula sa kabuuang bilang ang mga menor de edad na ipagpapatuloy ang kanilang pag aaral sa Pilipinas.
Mas paiigtingin pa ng lokal na pamahalaan ng Quezon City ang kanilang kampanya kontra polio.
Ito ay matapos makapagtala ng bagong kaso ng sakit sa barangay Batasan Hills na sakop ng lungsod.
Base sa imbestigasyon ng Quezon City Health Department, kumpleto ang polio vaccine ng batang nakitaan ng sakit.
Sa ngayon nagkikipag ugnayan na ang LGU sa Department of Health para sa mas mahigpit na kampanya at panibagong round ng polio vaccination.
Inilabas na ng Philippine Overseas Employment Administration (POEA) ang listahan ng mga trabahong sakop ng deployment ban sa Kuwait.
Ayon sa pahayag ng ahensya, ang mga household workers at mga bagong hired na skilled at professional workers ang sakop ng ban.
Anila, tanging mga skilled at professionals na nagbakasyon lamang ang papayagang makabalik ng Kuwait.
Magugunitang unang nagpatupad ng partial deployment ban sa Kuwait ang Pilipinas matapos ang pagpatay sa OFW na si Jeanelyn Villavende ng kanyang mga amo.
Mura nang ibinebenta ng mga residente ng isla ng Taal volcano ang mga alaga nilang kabayo.
Ito anila ay para lang mailikas at hindi mamatay ang mga hayop sa gitna ng pag-aalburoto ng bulkang Taal.
Bahagi ng kabuhayan ng mga residente duon ang kabayo kung saan kadalasan ay sinasakyan sa mga turista.
Ngunit ngayon ay nasa P3,500 na lamang ibinebenta ang isang kabayo.
Ang naturang mga kabayo ay nailigtas ng animal rescue group na People for the Ethical Treatment of Animals (PETA).
Ayon sa PETA, karamihan sa mga alagang hayop na kanilang nailikas mula sa isla ay dadalhin sa isang farm sa Tagaytay at duon muna aalagaan.
Nagpadala na rin ng tulong ang Philippine Coast Guard (PCG) sa mga biktima ng pag aalburoto ng bulkang Taal.
Kahapon, tumulak ang BRP Tubbataha sakay ang nasa 100 tauhan ng PCG.
Inaasahang tutulong ang mga tauhan ng PCG sa disaster response at rescue operations sa mga apektadong pamilya.
Bukod sa dagdag pwersa, dala-dala rin ng PCG ang mga donasyon mula sa Chinese government gaya ng kahon-kahong face mask, mga sako ng bigas, asukal at food packs.
Inihayag ng Department of Labor and Employment (DOLE) ang pagha-hire sa 6,000 government interns mula sa Batangas na apektado ng pag-aalburoto ng bulkang Taal.
Ayon kay Labor Secretary Silvestre Bello III, layon ng naturang hakbang na madagdagan ang pwersa na tutulong sa mga komunidad na lubos na naapektuhan ng bulkan.
Bukod dito, mabibigyan din aniya ng pansamantalang trabaho ang mga apektadong residente kung saan sila ay makakatulong pa sa kanilang lokal na pamahalaan sa relief at rehabilitation efforts.
Partikular umanong ipadadala ang mga intern sa mga bayan ng Lemery, Mataas na Kahoy, Agoncillo, Laurel, Talisay, Taal, San Nicolas, Balete, San Jose at Sta. Teresita sa Batangas.
Ang matatanggap na mga intern ay magta-trabaho sa loob ng 30 araw at makatatanggap ng P12,000 sahod.
Sa mga nais mag-apply kailangan lang umano ay 18 taong gulang pataas, may karanasan man o wala sa pagtatrabaho, atleast high school o senior high school graduate o anomang katumbas sa ilalim ng alternative learning system, o graduate ng technical vocational courses.
Inihayag ni Pangulong Rodrigo Duterte na isa si Atty. Harry Roque ang kaniyang napili na tumayong abogado ng gobyerno kaugnay sa kontrobersyal na kontrata ng Maynilad at Manila Water.
Sa kaniyang talumpati sa anibersaryo ng isang religious group, sinabi ng pangulo na isa sa mga kakatawang abogado si Roque sa sandaling makarating sa Korte ang usapin hinggil sa kontratang pinakinabangan umano ng dalawang water concessionaire.
Giit pa ng pangulo, masyado nang napagsamantalahan ng mahabang panahon ng mga may ari ng dalawang kumpanya ang mga Pilipino.
Kasabay nito, ibinilin ng pangulo sa taumbayan na huwag pababayaan ang kaso sa kwestyunableng kontrata sakaling maabutan ng pagtatapos ng kaniyang termino at hindi pa nareresolba ito.
Hindi pinaboran ni Albay Representative Joey Salceda ang pag-iimbestiga ng Kamara sa Phivolcs kaugnay sa pagsabog ng bulkang Taal.
Ayon kay Salceda, hindi ito ang tamang panahon para magsagawa ng mga imbestigasyon dahil magiging sagabal lamang ito para matulungan ang mga residenteng apektado ng pag aaluburoto ng bulkang Taal.
Giit ni Salceda, ang dapat bigyan ng prayoridad ngayon ay ang paggawa ng hakbang para matulungan ang mga distrito na maibangon ang kanilang lugar sa oras na matapos na ang pag aalburoto ng bulkan.
Dagdag pa ng kongresista, hindi dapat pinagdududahan ang kakayahan ng mga otoridad dahil lahat ay apektado ng pinsalang dulot ng bulkan Taal.
Kasabay nito, muling ipinanawagan ng kongresista na madaliin ang pag apruba sa pagkakaroon ng Department of Disaster Resilience.
Magugunitang ipinanukala ni Cavite Representative Elpidio Barzaga na imbestigahan ang Phivolcs dahil sa umano’y kakulangan ng pagpapakalat ng impormasyon kaugnay sa bulkang Taal.
Hindi umano dapat makampante ang mga residenteng malapit sa bulkan Taal sa tila pagkalma nito ngayon.
Ito ang inihayag ng Phivolcs sa patuloy na ginagawang pag obserba sa pag-aalburoto ng bulkan Taal.
Ayon kay Ma. Antonia Bornas, pinuno ng Phivolcs Volcano Monitoring and Earthquake Eruption Division, posible pa ring pumutok ang bulkan anomang oras o araw sa kabila ng pananahimik nito.
Dahil dito, nananatili pa rin aniya ang rekomendasyon ng ahensya na huwag munang pabalikin ang mga residente sa loob ng 14 kilometer danger zone.
Sa ngayon ay nananatili pa rin nakataas sa Alert Level 4 ang bulkang Taal.
Sinabi ng Phivolcs na nakapagtala rin sila ng 9 na discrete weak explosions sa nakalipas na walong oras sa bulkan Taal.
Umabot umano sa 800 metro ang taas ng ibinubugang abo nito mula sa bunganga ng bulkan.
Patuloy din anila ang nararamdamang volcanic earthquakes na umabot sa halos 600 kada araw.