DWIZ 882

Pinabulaanan ni Vice President Leni Robredo na may kinalaman ang Liberal party sa inihaing reklamo laban kay Pangulong Rodrigo Duterte sa International Criminal Court.

Kasunod ito ng pag urong ni Atty. Jude Sabio ng kanyang inihaing reklamo dahil isinantabi lamang ito ng ICC sa paniniwalang bahagi ito ng political propaganda ng ilang miyembro ng LP.

Ayon kay Robredo, dapat na pangalanan ni Sabio ang mga miyembro ng LP na kausap nya o nagtulak sa kanya na maghain ng reklamo.

Sa kabila nito iginiit ni Robredo na nagsisinungaling si Sabio dahil wala namang kamay ang LP sa paghahain ng kaso laban sa Pangulo.

Mas marami pang gulay ang maipadadala ng mga magsasaka mula sa Northern Luzon para sa mga biktima ng Bulkang Taal.

Ayon kay Agot Balanoy ng League of Associations in the La Trinidad Vegetable Trading, nakaipon na sila ng 3,000 kilo ng mga gulay mula sa kanilang mga miyembro.

Sa tulong ng Department of Agriculture sa Cordillera na magpapahiram ng kanilang truck ay maiba-byahe ang naturang mga gulay at inaasahang matatatanggap ng mga biktima sa Linggo.

Una nang nag padala ang mga magsasaka mula sa mountain province ng kilo–kilong mga sayote, carrots, repolyo at iba pa para sa mga residente sa apketadong lugar sa Batangas.

Matapos ang halos 20 taon, ibinaba na rin ng Quezon City Regional Trial Court ang hatol sa kasong may kinalaman sa pagguho ng basura sa Payatas dumpsite na pumatay ng 300 daan.

Sa desisyong inilabas ni Quezon City Judge Marilou Runes-Tamang, sinabi nitong ang kapabayaan ng Quezon City Government ang dahilan ng pagkamatay ng mga mamamayan ng syudad.

Binigyang diin sa resolusyon ni Judge Runes-Tamang na ang bundok ng basura sa Payatas ang isang malaking katunayan at testamento ng kapabayaan ng Quezon City Government.

Dahil dito, inatasan ng Korte ang Quezon City Government na magbayad ng tig-50,000 piso sa kaanak ng bawat biktima at dagdag na tig-10,000 piso bilang danyos.

Ang mga respondents sa kaso ay sina dating Mayor Ismael Mathay Jr, dating MMDA Chairman Jejomar Binay, Tofemi Realty Corporation, Meteor Company Inc. at Ren Transport Corporation.

Matatandaan na isa sa itinuturing na pinakamalalang kalamidad na gawa ng tao  sa kasaysayan ang pagguho ng bundok ng mga basura sa Barangay Lupang Pangako sa Payatas dumpsite nuong July 10, 2000.

Aminado ang Philippine Navy na kulang ang kakayahan nilang protektahan ang mga teritoryo ng Pilipinas sa karagatan.

Inihalimbawa ni Philippine Navy Chief, Vice Admiral Robert Empedrad, ang anya’y namomonitor nilang poachers na galing ng Vietnam at iba pang mga bansa sa Southeast Asia.

Ayon kay Empedrad, bilyon-bilyong pisong halaga ng isda ang nawawala sa mga mangingisdang Pilipino dahil hindi nila kayang itaboy ang napakaraming poachers.

Subalit kung sapat lamang sana anya ang barko ng Philippine Navy ay kaya nilang habulin at pananagutin ang mga nangunguha ng isda sa teritoryo ng Pilipinas.

Empedrad wala pang alok na gov’t position

Wala pang alok na puwesto sa gobyerno kay Flag officer-in-command Vice Admiral Robert Empedrad pagkatapos nitong magretiro sa February 3.

Ayon ito kay Empedrad bagamat handa pa rin siyang maglingkod sa ilalim ng Duterte administration sakaling alukin ng puwesto.

Sinabi ni Empedrad na handa siyang tulungan ang Pangulong Rodrigo Duterte dahil naniniwala siya sa tamang direksyon ng pamamahala na tinatahak nito. —sa panulat ni Judith Estrada-Larino

Nanindigan si dating senador Antonio Trillanes na hindi nya naging abogado si Atty. Jude Sabio –ang umurong na complainant sa kaso laban kay Pangulong Rodrigo Duterte sa International Criminal Court (ICC).

Aminado si Trillanes na nagkaroon ng pagkakataon na binigyan nya ng allowance si Sabio na mula P75,000 hanggang P100,000 subalit hindi na nya ito kinayang i-maintain matapos ang termino nya bilang senador.

Ito anya ay bilang tulong lamang nya kay Sabio subalit hindi bilang bayad sa pagiging abogado nito.

Malabo rin anya ang sinisingil sa kanya ni Sabio na legal fees para sa pag-aabogado kay Edgar Matobato, isa sa mga nangumpisal na miyembro ng Davao Death Squad dahil hindi naman sya ang kumuha sa serbisyo nito.

Binalaan ni Trillanes si Sabio na hindi sya mangingiming kasuhan ito kung magpapatuloy ito sa pagpapakalat ng mga kasiraan laban sa kanya.

Kumbinsido si Trillanes na ang mga problema ni Sabio sa pera ang dahilan kaya’t nakuha sya ng administrasyon at binawi ang reklamo nya sa ICC laban sa pangulo.

Malinaw naman anya na si Atty. Larry Gadon, na kilalang supporter ng administrasyon, ang kasama ni Sabio nang iurong nya ang kaso sa ICC.

Patay ang anim katao matapos sumiklab ang sunog sa Yuseco Street, Tondo, Maynila.

Kabilang sa mga nasawi ang dalawang bata kasama ang kanilang nanay na nakulong sa kanilang tahanan.

Ayon sa Bureau of Fire Protection (BFP), may anim katao rin silang naitalang sugatan samantalang 40 pamilya ang nawalan ng tirahan.

Dakong alas-3 ng madaling araw nang sumiklab ang sunog sa bahay ng isang kinilalang si Evangeline Lutero at nadamay ang kahilera nitong mga bahay.

Inabot ng ikatlong alarma ang sunog at nakontrol lamang ito makalipas ang isang oras.