DWIZ 882

Tiniyak ni Philippine National Police (PNP) chief General Archie Gamboa na walang sasantuhin ang kanyang kampanya laban sa ilegal na sugal.

Sa panayam ng DWIZ, sinabi ni Gamboa na lahat ng uri ng ilegal na sugal lalo na ang jueteng ay target ng kanilang kampanya.

Binalaan ni Gamboa ang mga opisyal ng PNP sa rehiyon at lalawigan na mabiilegalbigong mapatigil ang ilegal na sugal sa kanilang nasasakupan.

Kahit relieve lang, masakit sa isang opisyal. Na-relieve ka for cause, nasa record mo na ‘yan, that once in your life time as a police officer, you were relieved for cause at negatibo na marka ‘yan sa record mo,” ani Gamboa. —sa panayam ng Ratsada Balita

Hinikayat ng iba’t ibang mga militanteng grupo ang lahat ng mga Pilipino na ipagpatuloy ang paglaban para sa kalayaan at pagtakwil sa panibagong diktaturya sa bansa.

Kasabay ito ng paggunita sa ika-34 na anibersaryo ng 1986 EDSA People Power Revolution.

Ayon sa grupong Kilusang Masa, hindi man nila nakikita ang pagkakaroon ng panibagong people power revolution na tulad noong 1986 sa malapit na hinarap.

Mas mapatataas pa rin anila ang tiyansa ng pagkakaroon ng katulad na pagkilos dahil sa anila’y plano ng Administrasyong Duterte para sa panibagong diktaturya.

Kaugnay nito, ilang mga grupo tulad ng Alyansang Tigil Mina, Kilos Maralita, Sentro ng Nagkakaisa at Progresibong Manggagawa at Coalition Against Trafficking of Women in Asia Pacific ang magsasagawa ng protesta para sa patuloy na panawagan sa kalayaan.

Inaasahan namang makikiisa rin sa mga pagkilos ang mga miyembro ng unyon ng ABS-CBN Network.

Posibleng mapatapon palabas ng Pilipinas ang libu-libong mga Chinese nationals na nagtatrabaho sa mga Philippine Offshore Gaming Operator (POGO).

Ito ang inihayag ng Bureau of Immigration (BI) kasunod ng ulat hinggil sa umano’y pagkakansela ng China sa pasaporte ng kanilang mga mamamayang nasasangkot sa mga krimen na may kaugnayan sa telecommunication.

Ayon kay Immigration spokesperson Dana Sandoval, kanila pang beniberipika sa Chinese Embassy kung kinansela na nila ang pasaporte ng ilan sa kanilang mga mamamayan na nagtatrabaho sa mga POGO.

Paliwanag ni Sandoval, oras na mapatunayang kanselado na nga ang pasaporte ng mga ito, maituturing na silang mga undocumented foreigner kahit pa may hawak silang working permit.

Dagdag ni Sandoval, kinakailangan ding ipagbigay alam ng Chinese Embassy sa Bureau of Immigration kung mga mamamayan silang kanselado na ng mga pasaporte.

Aniya, oras na matanggap na nila ang listahan, agad na makikipag-ugnayan ang BI sa iba pang ahensiya para matunton ang kinaroroonan ng mga itinuturing nang undocumented alien at maiproseso ang pagpapadeport sa mga ito.

Isa pang resoluyon na naglalayong palawigin pa ang validity ng prangkisa ng ABS-CBN Corporation ang inihain sa Mababang Kapulungan ng Kongreso.

Batay sa house joint resolution 28 ni Cebu City Representative Raul Del Mar, hiniling nito na ma-extend hanggang July 30, 2022 ang legislative franchise ng network.

Ayon kay Del Mar, kanyang inihain ang resolusyon matapos na mabatid na nagsumite rin ng kaparehong panukala si Senador Franklin Drilon.

Layon nitong mabigyan ng sapat na panahon ang kongreso para matalakay ang renewal ng prangkisa ng ABS-CBN.

Sa kasalukuyan, meron nang 12 panukalang batas na humihiling sa pagbibigay ng panibagong prangkisa sa nabanggit na network ang nakabinbin pa sa house committee on legislative franchise.

Ginugunita ngayong araw, ika-25 ng Pebrero, ang ika-34 na anibersaryo ng 1986 EDSA People Power Revolution na itinuturing na pinakamapayapang pag-aaklas.

Ito ang nagbigay daan para sa pagbagsak ng diktaturya sa ilalim ni dating pangulong Ferdinand Marcos, gayundin ang pagbabalik ng demokrasya sa bansa.

Ngayong taon, may tema ang selebrasyon ng EDSA People Power anniversary na “Pamilyang Matatag, Sandigan sa Pag-unlad”.

Ayon sa Department of Interior and Local Government (DILG), nakatutok ito sa pagbibigay seguridad sa bawat pamilyang Pilipino laban sa pagkasira bunsod ng komunista at teroristang grupo.

Gayundin anila ang kahalagahan ng tungkulin ng mga pamilya para sa pagbibigay proteksyon sa mga kabataan at iba pang mahihinang grupo.

Kaugnay nito, ilang mga aktibidad ang nakatakdang isagawa ngayong araw para sa EDSA family day na kinabibilangan ng fun run, medical mission, mini concert at bazaars.

Inaasahan din ang isang programa sa EDSA People Power monument na gaganapin mula alas-7 hanggang alas-10 ng umaga.

Ipinababasura ng ABS-CBN Network sa Korte Suprema ang inihaing quo warranto petition ng Office of the Solicitor General (OSG).

Sa 58 pahinang komento, iginiit ng ABS-CBN Corporation at ABS-CBN Convergence Inc. na tanging ang kongreso lamang ang may kapangyarihan para bawiin ang kanilang prangkisa.

Ayon sa network, posibleng malabag ang prinsipiyo ng separation of powers kung pagbibigyan ng Korte Suprema ang petisyon ng OSG.

Nilalabag din anila nito ang hierarchy of courts.

Naniniwala rin ang ABS-CBN na walang merito ang inihaing quo warranto petisyon ng OSG dahil wala naman silang nilalabag sa kanilang legislative franchise.

Kahapon, ika-24 ng Pebrero, isinumite ng nabanggit na network sa Korte Suprema ang kanilang komento sa inihaing quo warranto at gag order petition na inihain ng OSG laban sa kanila.

Tiwala ang Malacañang na maliit lamang ang magiging epekto ng banta ng 2019 coronavirus disease (COVID-19) sa remittance o ipinapadalang pera ng mga Oversease Filipino Workers (OFWs).

Ayon kay Cabinet Secretary Karlo Nograles, posibleng bumaba ng 0.8% ang kabuuang cash remittance growth ngayong taon dahil sa COVID-19 outbreak.

Dahil dito, ibinaba nila sa 2.2% mula sa 3% ang kanilang projection o pagtaya sa paglago ng cash remittance ng mga OFWs ngayong taon.

Sa kabila naman nito, kumpiyansa pa rin si Nograles na makapagtatala muli ng bagong record-high sa OFW remittance ngayong 2020.

Magugunitang noong nakaraang taon, pumalo sa 33.5-bilyong dolyar ang remittance ng mga OFWs na siyang naitalang pinakamataas.

Mabibigo lamang ang sinumang nagpapaplano na pabagsakin ang Administrasyong Duterte.

Ito ang inihayag ni Philippine National Police (PNP) chief General Archie Gamboa kasunod ng mga ulat na sasamantalahin ng ilang mga krtiko ni Pangulong Rodrigo Duterte ang anibersaryo ng EDSA People Power Revolution para patalsikin ito sa puwesto.

Ayon kay Gamboa, hindi magtatagumpay ang anumang destabilisasyon laban sa pangulon kung wala naman aniya itong makukuhang suporta mula sa mga security forces ng pamahalaan.

Dagdag ni Gamboa, sa kabila rin aniya ng mga natatanggap na kritisismo ng pangulo, nananatili pa ring mataas ang trust at satisfaction rating nito.

Tiniyak naman ni Gamboa na malaya pa rin ang lahat na magsagawa ng mga kilos protesta bilang bahagi ng paggunita sa ika-34 na anibersaryo ng EDSA People Power Revolution. —ulat mula kay Jaymark Dagala (Patrol 9)