Drew Nacino

Hinikayat naman ng Philippine Rural Reconstruction Movement (PRRM) si incoming President Bongbong Marcos na i-prayoridad ang food security sa gitna ng mahinang global environment.

Ipinunto ng PRRM Na ang pagtutok sa pagkamit sa food security sa bansa ay mahalaga habang patuloy na humaharap ang mundo sa mga problemang nakasasagabal sa ekonomiya.

Umaasa si PRRM President Edicio Dela Torre na i-pa-prayoridad ng susunod na adminsitrasyon ang pagsuporta sa local producers upang mapatatag ang supply ng pagkain.

Ang lumalala anyang climate change, lumolobong populasyon, tumataas na presyo ng pagkain at giyera sa pagitan ng Russia at Ukraine ang ilan lamang sa mga hamong kinakaharap ngayon ng mundo.

Hindi umano i-aatras ng security guard na si Christian Floralde ang kaso laban sa suv driver na sumagasa at nang-hit-and run sa kanya sa Mandaluyong City.

Ito ang binigyang-diin ni Floralde matapos siyang makalabas ng ospital, kahapon.

Aminado si Floralde na masama pa rin ang kanyang loob sa ginawa ng driver at kanya nang ipauubaya sa Diyos anuman ang kahihinatnan ng kasong isasampa.

Ilang araw nanatili sa intensive care unit si Floralde matapos ang insidente sa kanto ng Saint Francis Street at Julia Vargas avenue, noong Linggo.

Samantala, itinakda na ng Land Transportation Office ang final hearing ngayong araw.

Hinikayat ng isang Public Transport at Commuter Advocacy Group ang incoming administration na magtalaga ng transport officials na “may pagdamay at concern sa basic transportation needs” ng mga pilipino.

Sa gitna ito ng mga ugong na i-re-re-appoint ni president-elect Bongbong Marcos si outgoing Transportation Secretary Arthur Tugade.

Ayon sa altmobility ph, kailangan ng mga leader na babasag sa nakasanayang pagtutok sa infrastructure projects na tanging mga private vehicle ang higit na nakikinabang sa halip na mga commuter at pedestrian.

Kailangan din anila ng aktibong mga leader na susuporta at tutugon sa lahat ng transport-related crises gaya ng public transport supply shortages at pagtaas ng presyo ng oil products.

Hanggang ngayon ay hindi pa nagtatalaga ng kanyang transportation secretary si Marcos.

Pinakamagandang sagot o solusyon sa tumataas na inflation ay pataasin ang ating produksyon.

Ito ang inihayag ni Senate Committee on Trade and Industry Chairman Koko Pimentel sa harap ng hindi maawat na pagtaas ng presyo ng mga bilihin.

Ayon kay Pimentel, dapat simulan na ang pagpapataas ng produksyon ng mga food items na madalas kainin ng mga pinoy araw-araw.

Dapat na rin anyang palakasin ang produksyon ng mga items o goods na maaaring bilhin sa atin ng ibang bansa.

Iginiit ni Pimentel na hindi dapat habang buhay na maging consumer ang mga pilipino bagkus ay dapat maging supplier.

Una nang hinimok ni outgoing DTI Secretary Ramon Lopez si incoming Secretary Alfred Pascual na pababain ang presyo ng mga bilihin sa bansa sa pamamagitan pagpapataas sa produksyon sa gitna ng nagbabadyang food crisis.

Hindi dapat ipalit sa hirit ng mga jeepney operator na gawing katorse pesos ang minimum fare sa pisong provisional increase sa pasahe na una nang ipinatupad ng LTFRB Sa NCR, Regions 3 at 4-A.

Ayon kay Senator Risa Hontiveros, ang ipinatupad na P10 minimum fare ay provisional increase lamang, na rate pa noong 2018 kung saan nasa P40 pa ang presyo ng kada litro ng diesel.

Gayunman, na-doble na ang presyo nito dahil sa walang prenong oil price hike na pinalala ng giyera sa pagitan ng Ukraine at Russia.

Kung nais anyang patuloy na tumakbo o mag-operate ang public transportation ay dapat mas palawakin o palawigin ang service contracting program.

Iginiit ng senador na dapat gamitin na rin ang nakokolektang excise tax upang mapalakas at mapahusay ang public transportation sa bansa.

Bahagya muling tumaas ang mga panibagong kaso ng Covid-19 sa bansa.

Sa datos ng Department of Health kahapon, umabot sa 252 ang additional Covid-19 cases kaya’t umakyat na sa 2,529 ang aktibong kaso kumpara sa 2,440 cases noong Miyerkules.

Sumampa naman sa 3,692,336 ang total cases, kabilang ang 3,629,351 ang nakarekober habang nananatili sa 60,456 ang mga namatay.

Nangunguna pa rin ang National Capital Region sa mga rehiyon na may pinaka-mataas na new cases sa nakalipas na dalawang linggo na 1,246; Calabarzon, 373, Central Luzon, 201 at Western Visayas, 154.

Muling nag-file ng diplomatic protest ang Pilipinas laban sa China makaraang magbalikan noong Abril a –4 sa Julian Felipe Reef ang nasa isandaang Chinese vessels.

Iprinotesta ng Pilipinas ang nasabing aktibidad, isang taon matapos mamataan ang mga nasabing barko sa naturang lugar at isang linggo makaraang iprotesta rin ng Department of Foreign Affairs ang iligal na fishing moratorium ng China sa West Philippine Sea.

Ang Julian Felipe Reef ay bahagi ng exclusive economic zone ng Pilipinas.

Ayon sa DFA, dapat tumalima ang Tsina sa responsibilidad nito sa ilalim ng international law, itigil ang mga iligal at iresponsableng aktibidad, iwasang sumiklab ang tensyon at agad paalisin ang mga barko sa exclusive economic zone ng Pilipinas.

Ang hindi anila otorisadong presensya ng mga Chinese fishing at maritime vessels ay hindi lamang iligal kundi nagiging ugat din ng sigalot sa Asya.

Ipamamahagi na ng Department of Social Welfare and Development ang P500 na buwanang subsidiya sa mga mahirap na pamilya bago matapos ang termino ni Pangulong Rodrigo Duterte sa Hunyo 30.

Ayon kay DSWD Spokesperson Irene Dumlao, isinasaayos na ng kagawaran ang mga kailangang dokumento upang maumpisahan na ang pamimigay ng ayuda.

Tinatayang 12.4 milyong pamilya ang kwalipikado na makatanggap ng nasabing government subsidy.

Magugunitang ipinag-utos ni Pangulong Duterte noong Marso ang pamamahagi ng ayuda upang maka-agapay sa walang prenong pagtaas ng presyo ng mga bilihin.