Hindi pa maaaring tukuyin kung sino ang “nakapuntos” o lamang sa unang bahagi ng impeachment trial ni Vice President Sara Duterte, ayon kay political analyst Atty. Edward Chico.
Sa panayam, sinabi ni Atty. Chico na wala pang malinaw na panalo ang panig ng prosecution o defense team matapos ang unang tatlong araw ng paglilitis, dahil nasa paunang yugto pa lamang ito.
Aniya, hindi dapat ikumpara ang impeachment trial sa isang boxing match kung saan agad tinutukoy kung sino ang nakapuntos. Sa ngayon, aniya, nagsisimula pa lamang ang pagtalakay sa mga ebidensya, kabilang ang pagpapatibay sa mga dokumento na inihaharap sa impeachment court.
Binigyang-diin din ni Atty. Chico na may lumilitaw nang magkakaibang naratibo mula sa magkabilang panig na maaaring makaapekto sa pananaw ng publiko sa paglilitis.
Dagdag pa niya, mahalagang maging mapanuri ang publiko sa mga impormasyong kumakalat lalo na sa social media, kung saan maaaring gamitin ang iba’t ibang pahayag upang impluwensiyahan ang opinyon ng mga mamamayan.
Mahaba pa umano ang proseso ng impeachment trial dahil mayroon pang natitirang 89 araw para sa paglilitis, kaya’t masyado pang maaga upang magbigay ng konklusyon sa magiging resulta nito.
