Drew Nacino

Isang babae ang patay matapos pagsasaksakin ng live-in partner nito sa Binondo, Maynila.

Kinilala ang biktimang si Aileen Risarosa, 28-anyos habang nagpatiwakal ang suspek na si Christian Jorel Burgos, 35-anyos.

Ayon sa Manila Police District-Homicide Section, tadtad ng saksak ang katawan ni Risarosa nang matagpuan sa kanilang bahay sa Old Matadero Street.

Batay sa imbestigasyon, matapos mag-inuman ang dalawa ay natulog na katabi ang kanilang mga anak, subalit nang magising si Burgos ay inundayan nito ng saksak ang live-in partner.

Matapos naman nito ay uminom ng silver cleaner ang suspek na naging dahilan din ng kanyang kamatayan.

Selos ang motibo sa pamamaslang dahil sa hinala ni Burgos na may ibang karelasyon ang biktima.

Pinag-aaralan na ng Land Transportation and Franchising Regulatory Board (LTFRB) ang mga pangunahing petisyon ng transport groups na itaas pa ang minimum na pasahe sa jeep.

Kabilang sa tinukoy ng LTFRB ang mga petisyon ng 1-Utak, Pasang Masda, Altodap at Acto na itaas hanggang 14 pesos at LTOP na itaas naman sa 15 pesos ang pasahe.

Ayon kay LTFRB Executive director Tina Cassion, magkakaroon ng huling pagdinig ang ahensya sa nasabing mga petisyon sa Hunyo 28.

Bukod anya sa pagtaas ng minimum na pasahe sa jeep, ang mga grupo ay naghahangad ding itaas ang pasahe sa bawat susunod na kilometro sa P2.50.

Samantala, inihayag ni Cassion na nagsasagawa na ng pinal na pagdinig para naman sa petisyon ng transport network vehicle services na dagdagan ang kanilang flagdown rate at pamasahe kada kilometro at minuto.

Nilalaman ng petisyon ang hirit na dagdag 40 hanggang 55 pesos flagdown rate sa Sedan; 50 hanggang 70 pesos sa AUV at SUV habang 30 hanggang 40 pesos sa hatchback.

Tumaas ang demand para sa mga Filipino seafarer sa ibang bansa.

Ito, ayon sa Maritime Industry Authority (MARINA), ay sa kabila ng giyera sa pagitan ng Ukraine at Russia.

Ayon kay Capt. Jeffrey Solon, Deputy Executive Director ng MARINA-standard of trainings, certification and watchkeeping office, nasa kalahating milyong Pinoy seafarer na ang kasalukuyang nakasakay.

Sa katunayan anya ay tumataas ang demand lalo sa bahagi ng ukraine kahit may digmaan.

Tiniyak naman ni Solon na tinutulungan na nila ang manning industry na mapabilis ang kanilang applications para mabigyang-tugon ang pangangailangan sa pagpapalit ng mga Ukrainian at Russian seafarer.

Ang mga interesadong Marino ay kinakailangan lamang na magsumite ng kanilang mga aplikasyon sa pamamagitan ng Marina integrated seafarers management online system.

Gayunman, binalaan ni Solon ang mga Marinong mamemeke ng kanilang sertipikasyon o dokumento ay mahaharap sa posibleng multa o suspensyon.

Bahagya pang lumundag sa 2,918 ang aktibong kaso ng COVID-19 sa Pilipinas.

Sa datos ng Department of Health kahapon, umabot sa 308 ang karagdagang COVID-19 cases sa bansa.

Ito na sa ngayon ang pinaka-mataas na daily tally sa halos nakalipas na dalawang buwan o simula noong April 20.

Mula sa nabanggit na bilang, 153 cases ay mula sa Metro Manila.

Umakyat naman sa 3,693,222 ang kabuuang kaso kabilang ang 3,629,843 recoveries at 60,461 death toll.

Wala pang dapat ikabahala sa bahagyang pagtaas ng mga bagong COVID-19 cases sa bansa, partikular sa National Capital Region.

Nilinaw ni health undersecretary Maria Rosario Vergeire na hindi naman dapat ika-alarma ng publiko ang naitalang 1.6% na pagtaas sa positivity rate habang 14 sa 17 lugar sa bansa ay mayroon ding positive growth rate.

Ayon kay Vergeire, nasa low-risk pa naman ang bansa, indikasyon na hindi pa nasu-sustain ang pagtaas ng mga kaso.

Hindi pa rin naman anya tumataas ang hospital admissions at ang severe at critical cases ay hindi pa mataas.

Ang bahagyang paglundag ng mga bagong kaso ng virus ay dahil sa presensya ng mas nakahahawang subvariants ng Omicron sa bansa, maging ang nababawasang proteksiyon laban sa virus.

Hindi pa handa ang bansa na magtanggal na ng face mask ang publiko dahil wala pang sapat na gamot, equipment o medical technique kontra COVID-19.

Ito ang inihayag ng isang infectious disease expert at government vaccine expert panel member sa gitna ng kontrobersyal na face mask policy na ipinatupad ni Cebu Governor Gwendolyn Garcia.

Ayon kay Dr. Rontgene Solante, head ng San Lazaro Hospital-Adult Infectious Diseases and Tropical Medicine Unit, hindi pa panahon para alisin ang mandato sa pagsusuot ng face mask kahit sa outdoor area.

Kahit anya bumaba na ang mga kaso ng COVID-19, may mga parameter na dapat suriin, tulad ng vaccination rates at paglutang ng bagong variants.

Ipinunto ni Solante na ang pagkadiskubre sa mas nakahahawang Omicron subvariants B.A.4 at B.A.5 sa bansa ay naka­babahala dahil may posibilidad na maabutan nito ang B.A.2.12.1.

Iginiit ni Dr. Solante na kung mayroong sapat na gamot gaya ng Paxlovid, equipment o medical technique ang gobyerno ay maaaring alisin na ang face mask.

Sa Pilipinas aniya, generic version lamang ng Paxlovid ang available na nagkakahalaga ng 8,000 hanggang 10,000 pesos per course at hindi naman ito available sa lahat ng ospital.

Nanindigan ang hepe ng Concepcion Municipal Police Station sa Tarlac na ligal at hindi naabuso ang mga inarestong magsasaka at land reform advocates na tinaguriang ‘Tinang 92’.

Magugunitang hinuli ang mga nasabing magsasaka at land reform advocates sa isang bukid sa barangay Tinang noong Huwebes.

Ayon kay Concepcion Municipal Police Chief, Lt. Col. Reynold Macabitas, kinausap nila nang maayos ang mga naaresto at nagkaroon din ng ilang negosasyon upang pakiusapang itigil na nila ang paninira sa tubuhan.

Gayunman, hindi anya itinigil sa halip ay nagmatigas pa ang mga magsasaka at sinira ang property ng complainant.

Walo sa 91 ang napalaya na para sa karagdagang imbestigasyon at ang nalalabing 83 ay mananatili sa kustodiya ng PNP habang hindi pa nakakapagpiyansa.

Samantala, 12 lamang mula sa 83 na sinampahan ng kaso ang lehitimong magsasaka at karamihan sa mga nahuli ay galing sa ibang lugar, partikular na sa Metro Manila.