Drew Nacino

Tinatayang 122,000 bakanteng trabaho ang nakahanda sa job at business fairs sa araw ng kalayaan na inorganisa ng Department of Labor and Employment.

Ayon kay DOLE-Region 3 Assistant Director Alejandro Inza Cruz, maglalagay sila ng 23 sites sa buong bansa para sa Independence Day Job and Business Fairs.

Nasa siyamnapu’t limang libo anya sa mga oportunidad na ito sa trabaho ay lokal, habang mahigit dalawampu’t pitong libo sa ibang bansa.

Karamihan sa mga bakanteng overseas jobs ay para sa mga nurse, factory worker, household worker, karpintero, electrician, máson at cleaners sa Middle East, Asia, Europe at Australia.

Samantala, magre-recruit din ng mga manggagawa sa naturang event ang ilang ahensya ng gobyerno.

Suportado ng Task Force Mapalad (TFM) na samahan ng agrarian reform beneficiaries ng mga magsasaka, ang plano ng Department of Agrarian Reform (DAR) na ipatupad ang mga mega-farm project nito at ibaba ang presyo ng bigas sa P20 kada kilo.

Inihayag ng TFM na dapat na agad na ayusin ni DAR Undersecretary Bernie Cruz ang konsepto, na nangangailangan ng pagsasama-sama ng maliliit na lote ng sakahan sa mega farms para sa produksyon ng palay.

Naniniwala si Lanie Factor, National Deputy Coordinator ng TFM, na magkakaroon ng “political will” ang  susunod na administrasyon upang ipatupad ang programa at dapat bilisan ng DAR ang pamamahagi ng lupang sakop ng comprehensive agrarian reform program.

Dapat din anyang hanapin ng kagawaran ang magkadikit na lugar na 150,000 hectares at agad na ipamahagi ang daan-daang libong ektarya ng lupang hindi pa rin naililipat sa mga magsasaka sa ilalim ng carp.

Samantala, iginiit ni Factor na dapat tutulan ng DAR ang reclassification ng lupa dahil maraming mga sakahan na ang binili ng mga real estate developer at ginawang mga subdivision, mall o memorial park.

Tiniyak ng Department of Social Welfare and Development sa publiko na may sapat silang resources para tulungan ang mga apektado ng pagputok ng bulkang Bulusan sa Sorsogon.

Ito’y kahit nag-uwian na sa kani-kanilang bahay ang mga residenteng naapektuhan.

Ayon kay DSWD Spokesperson Irene Dumlao, aabot na sa P390,000 na halaga ng family food packs at hygiene kits ang naipamahagi na sa Juban, Sorsogon.

Hanggang nito anyang Miyerkules, Hunyo a – 8, nasa P5 million na halaga ng supply ng pagkain ang naka-standby sakaling kailanganin ang additional food packs.

Una nang inihayag ng NDRRMC na inaasahan na nilang makababalik na rin sa kani-kanilang bahay ang mga apektadong residente ngayong Linggo.

Aprubado na ang increase sa daily minimum wage sa Region 9 o Zamboang Peninsula.

Ito, ayon sa Department of Labor and Employment, ay alinsunod sa wage order ng Regional Tripartite Wages and Productivity Board – 9.

Sa naturang kautusan, P35 ang dagdag sa arawang sahod ng mga non-agricultural at agricultural workers kaya’t magiging P351 na ang daily minimum wage rate sa rehiyon.

Samantala, ang mga manggagawa sa mga establisyimento na mayroong sampu hanggang tatlumpung manggagawa ay tatanggap ng adjusted daily minimum wage rate na P338 mula sa P303.

Para sa mga manggagawa sa sektor ng agrikultura at retail at service establishments na may mas mababa sa sampung manggagawa, ang wage hike ay ibibigay sa dalawang bahagi — P20 kapag epektibo na ang kautusan at P15 sa October 1.

Posibleng mas maramdaman ang epekto ng krisis sa pagkain sa bansa sa ikalawa hanggang sa huling bahagi ng taon.

Ito ang ibinabala ng Department of Agriculture matapos ang pahayag ng United Nations na maaaring tumagal ng ilang taon ang global food crisis kung hindi matutuldukan ang giyera sa Ukraine.

Ayon kay Agriculture Undersecretary Fermin Adriano, asahan na ang sobrang nipis ng supply ng pagkain, partikular ng trigo lalo’t hindi naman nakapag-tanim at nakapag-ani partikular sa Russia at Ukraine, na nangungunang wheat supplier.

Pinayuhan naman ni Fermin ang susunod na administrasyon na tutukan nang maigi ang naka-umang na krisis lalo’t inaasahang matindi ang magiging epekto nito sa ekonomiya na nagsisimula pa lamang bumangon mula sa Covid-19 pandemic.

Muling pinayuhan ng Department of Health ang publiko na sumunod sa minimum health standards kasama ang pagsusuot ng angkop na face mask at pagbabakuna at boosters upang mapababa ang Covid-19 cases, lalo’t may mga na-detect na bagong subvariant.

Sa kabila ito ng desisyon ng Cebu Provincial Government na gawin na lamang “optional” ang pagsusuot ng face mask sa outdoor open space maliban kung ang isang indibidwal ay may simtomas ng Covid-19.

Ayon sa DOH, suportado ng siyensya ang paggamit ng face masks sa pagbawas ng hawaan hindi lamang sa covid-19 kundi sa iba pang infectious at respiratory diseases, tulad ng monkeypox sakaling makapasok ito sa bansa.

Ipinunto ng kagawaran na ang mga kasalukuyang protocol ng IATF ay nagbibigay-daan lamang para sa mga partikular na pagkakataon kung kailan maaaring tanggalin ang face mask, tulad ng kapag kumakain.

Binigyang-diin ng DOH na nananatili ang banta ng Covid-19 at hindi pa tapos ang pandemya at maaari pa ring makakuha ng virus ang mga tao, lalo na ang mayroong mga mahinang immune system.

Naaresto na ang sinasabing suspek sa pagpatay at panggagahasa umano sa isang graduating college student sa Bacacay, Albay.

 Kinilala ni Bacacay Municipal Police Chief, Maj. Irvin Bellen ang suspek na si Ariel Marbella, 24 anyos na nasakote sa bulubunduking bahagi ng Barangay Hindi, dakong alas dose ng tanghali kahapon.

 Ayon kay Bellen, mismong mga residente ang tumulong upang matunton si Marbella.

 Dati na anyang may kasong robbery si Marbella noong 2019 pero nakipag-areglo.

 Nitong Lunes nang madiskubre sa madamong bahagi ng Purok Tres ang biktimang si Rhea Boneo, 22 anyos na ginilitan at punit-punit ang damit.

 Ga-graduate sana si Boneo ng Cum Laude sa kursong accountancy sa Divine Word College sa Legazpi City.

 Nahaharap naman ang suspek sa kasong rape with homicide, habang inaalam na rin ng pulisya ang posibleng pagkaka-kilanlan  ng iba pang persons of interest.

 Hindi na palalawigin ng Commission on Elections (COMELEC) ang deadline ng pagpa-file ng Statement of Contribution and Expenditures (SOCE) ng mga kandidato at party-list groups na lumahok sa 2022 elections.

 Ito ang nilinaw ni COMELEC Director for Education and Information James Jimenez matapos ang deadline ng pagsusumite ng SOCE, kahapon.

 Gayunman, mayroon pang hanggang anim na buwan ang mga nanalo sa May 9 polls para sa late filing.

 Ang problema lamang anya sa late filing ay hindi maaaring umupo sa kanilang pwesto ang mga nanalong kandidato hangga’t hindi nagsusumite ng SOCE.

 Muling pina-alalahanan ng poll body official ang mga kandidato na iwasan ang naka-ugaliang late filing ng SOCE dahil maaari itong magresulta sa disqualification sa paghawak ng anumang public office.