Labing dalawang bagong tulay ang target na maitayo ng DPWH o Department of Public Works and Highways sa Metro Manila upang makabawas sa matinding trapik gayundin sa pang araw – araw na kalbaryo ng mga pasahero.
Ayon kay DPWH Sec. Mark Villar, ilalagay ang mga tulay sa ibabaw ng Pasig River na magdudugtong sa hilaga at katimugang bahagi ng Metro Manila at pinaglaanan ng mahigit 100 Bilyong Pisong pondo mula sa mahigit 400 Bilyong Pisong budget ng ahensya para sa taong ito.
Giit ni Villar, aabot sa 2.4 na bilyong Piso ang nalulugi sa bansa araw-araw dahil sa matinding trapik batay na rin sa ginawang pag-aaral ng JICA o Japan International Cooperation Agency.
Kabilang sa mga nakalinyang proyekto ay ang North Luzon Expressway Harbor Link at NLEX-SLEX Connector Road na siyang magdurugtong mula hilaga at katimugang Luzon na hindi na dumaraan sa mga pangunahing lansangan sa Metro Manila tulad ng EDSA at C-5.
By: Jaymark Dagala / Aileen Taliping
Kinontra ng Malakaniyang ang batikos ng human rights watch na maihahalintulad sa kalamidad sa aspeto ng karapatang pantao ang unang taon ni Pangulong Rodrigo Duterte sa puwesto.
Ayon kay Presidential Communications Asst/Sec. Ana Marie Banaag, hindi katanggap tanggap ang naging komento ng nasabing grupo dahil naninindigan si Pangulong Duterte sa pagsusulong ng tunay na pagbabago sa bansa .
Hindi aniya hinayaan ng administrasyon na masira at mabalewala ang buhay ng milyun-milyong Pilipino mula sa iligal na droga na hindi nagawan ng paraan ng nakalipas na administrasyon.
Wala aniyang isa punto tatlong milyong sumuko sa war on drugs ng pamahalaan mula sa mahigit 62,000 anti-drug operations sa loob ng isang taon kung napagtuunan ito ng pansin ng nakalipas na administrasyon.
By: Jaymark Dagala / Aileen Taliping
Binuwag na ng Malakaniyang ang QUEDANCOR o Quedan and Rural Credit Guarantee Corporation na isang GOCC o Government Owned and Controlled Corporation na nilikha para magbigay pautang sa mga nasa sektor ng agrikultura.
Pirmado ni Executive Secretary Salvador Medialdea ang Memorandum Order Number 13 na nag-uutos sa pagbuwag o paglulusaw sa QUEDANCOR.
Sinasabing isa sa mga batayan ng pagbuwag sa QUEDANCOR ay ang kabiguan nitong kumite, duplication of funds at pagiging non – operational nito.
May binuong technical working group ang Departments of Agriculture, Finance at Budget gayundin ang Landbank para sa pagpapatupad ng nasabing kautusan.
Tiniyak naman ng palasyo na mabibigyan ng karampatang kumpensasyon ang mga apektadong empleyado ng nasabing korporasyon.
By: Jaymark Dagala / Aileen Taliping
Aprubado na ng NEDA o National Economic and Development Authority ang 11 pangunahing proyekto ng Administrasyong Duterte.
Ito’y ayon kay Presidential Communications Asst/Sec. Marie Banaag matapos ang ginawang board meeting ng NEDA nuong Martes na pinangunahan ni Pangulong Rodrigo Duterte.
Kabilang sa mga ito ay ang Mindanao Railway Project; Malolos-Clark Railway Project; Cavite Industrial Area Flood Risk Management Project; Clark International Airport Expansion Project at Education Pathways to Peace sa mga conflict affected areas sa Mindanao.
Gayundin ang bagong Communications, Navigation and Surveillance at Air Traffic Management System Project; LRT Line 1 North Extension Project o ang Common Station; Arterial Road Bypass Project Phase 2; Kilawa Dam Project at ang Chico River Pump Irrigation Project.
Giit ni Banaag, inaasahang makapagbibigay ito ng mga dagdag na trabaho para sa mga Pilipino sa sandaling masimulan na ang mga proyekto upang maging daan para sa lalong pagsulong ng Pilipinas.
By: Jaymark Dagala / Aileen Taliping
Ibinasura ng DOJ panel of prosecutors ang isinampang kasong rebelyon laban sa limang empleyado ng UCPB o United Coconut Planters Bank.
Ito’y makaraang makumpiskahan ang mga ito ng mga tauhan ng Philippine Coast Guard ng perang nagkakahalaga ng halos 33 Milyong Piso sa Port Macabalan sa Cagayan de Oro City.
Batay sa inilabas na resolusyon, nilinis sa reklamong rebelyon ang mga empleyadong kinilalang sina Rhodelle Nagac na siyang operations manager ng UCPB sa Velez Branch sa Cagayan de Oro City; ang Bank Teller na si Rolando Limbo Jr; Branch Manager na si Maria Cecilia Lim at ang mga security guard na sina Leonilo Enterina at Reynaldo Puyos.
Ayon sa panel of prosecutors, walang sapat na ebidensya na magdiriin sa lima hinggil sa nasabing kaso dahil hindi rin sapat ang mga intelligence report na inilatag ng coast guard para pagbatayan ng probable cause.
By: Jaymark Dagala / Bert Mozo
Pinayagan na umano ng Korte Suprema ang hirit ng DOJ o Department of Justice na ilipat sa Metro Manila ang mga pagdinig kaugnay sa kasong rebelyon laban sa mga nasa likod ng madugong pag-atake sa Marawi City.
Ayon sa source ng DWIZ sa hudikatura, napagkaisahan ng mga mahistrado “in principle” na ilipat na lamang ang lugar ng paglilitis kung saan, tinitingnan ngayon ang Camp Bagong Diwa sa Taguig.
Sinabi pa ng source sa DWIZ Patrol na mismong si Chief Justice Maria Lourdes Sereno ang naatasang magpa-ikot ng draft resolution hinggil sa mechanics ng change of venue.
Magugunitang agad umapela si Justice Secretary Vitaliano Aguirre makaraang ibasura nito ang hirit ng kalihim na dalhin sa Luzon o Visayas ang paglilitis dahil sa usapin ng seguridad sa halip, inilipat iyon sa Cagayan de Oro City na hindi kalayuan sa Marawi.
By: Jaymark Dagala / Bert Mozo
Inaasahang magsusumite na ng kani-kanilang opinyon ngayong araw ang mga mahistrado ng Korte Suprema at inaasahang magbobotohan na ito sa Hulyo 04.
Ito’y kaugnay sa inihaing petisyon sa high tribunal na kumukuwesyon sa pagdideklara ni Pangulong Rodrigo Duterte ng Martial Law sa Mindanao.
Ayon sa source ng DWIZ, hanggang ngayong araw na ito napagkasunduan ng mga mahistrado sa kanilang En Banc session para magsumite ng kani-kanilang opinyon.
Magugunitang napagkasunduan din sa isinagawang En Banc session na si Associate Justice Mariano Del Castillo ang naatasang magponente o sumulat ng desisyon hinggil sa usapin.
By: Jaymark Dagala / Bert Mozo
Tumulak na patungong Marawi City ang halos 300 pulis mula sa Luzon para humalili sa kanilang mga kasamahan sa lugar.
Ayon kay PNP Spokesman C/Supt. Dionardo Carlos, kailangan ng mga bagong tropa sa Marawi para makapagpahinga naman ang mga pulis na unang ipinadala ruon.
Isang buwan nanatili sa Marawi City ang unang ipinakalat ng pulisya upang tumulong sa peace and order situation sa lugar habang nagpapatuloy ang bakbakan sa pagitan ng militar at ng teroristang Maute.
Kung ang militar ang siyang humaharap sa mga terorista, sinabi ni Carlos na ang tungkulin naman ng mga pulis ay panatilihin ang seguridad sa mga lugar na nalinis na ng mga sundalo gayundin ang pagsasagawa ng checkpoint duon.
By: Jaymark Dagala / Jonathan Andal
