Magsasama sa isang bagong pelikula sina Dingdong Dantes at Anne Curtis.
Sa ginawang anunsyo ng Viva Films at N2 Productions, pagbibidahan ng dalawa ang pelikulang may working title na ‘Sid and Aya’.
Maliban sa impormasyong hindi love story ang pelikula, wala pang karagdagang detalye ang inilabas ng pamunuan ukol sa proyekto.
Kasabay nito ay nagsimula na rin si Anne na magtrabaho para sa isa pang pelikula, ang ‘Buy Bust’ sa ilalim ng direksyon ni Erik Matti.
Ayon sa aktres kinailangan niyang mag-aral ng martial arts para sa kanyang action role sa pelikula kung saan makakasama niya ang Fil-American MMA fighter na si Brandon Vera.
Busy rin si Anne sa iba pang proyekto at preparasyon para sa inaabangang kasal nito sa boyfriend na si Erwan Heussaff.
Photo: neil_arce / Instagram
Pinaplantsa na ng gobyerno ang ilalargang dalawampung (20) bilyong pisong master plan para sa muling pagbangon sa Marawi City.
Ayon kay DPWH o Department of Public Works and Highways Secretary Mark Villar, nais ng Pangulo na agad na ipatupad ang rehabilitation plan sa syudad sa oras na matapos na ang bakbakan ng sudnalo at Maute group.
Aniya, mahigpit ang naging bilin ng Pangulo na hindi na dapat maulit sa Marawi ang naging kamalian at kabagalan sa pagtatayo ng pasilidad sa Eastern Visayas matapos itong tamaan ng bagyong Yolanda.
Kaugnay nito, layon ng DPWH na mapasok ang syudad upang magkaroon ng assessment sa danyos ng imprastraktura sa buong syudad.
Sinabi pa ni Villar na prayoridad ngayon ay ang paglalagay ng mga evacuation facilities para tumugon sa mga pangangailangan ng mga bakwit.
By Rianne Briones
Napigilan ng mga awtoridad ang tangkang pag-atake ng isang lalaki sa isang mosque sa Paris, France.
Ayon sa ulat, sakay ng kanyang sasakyan ay binalak ng lalaki na araruhin ang mga tao sa harap ng mosque ngunit napigil ito ng mga concrete barrier sa na nakalinya sa lugar.
Agad na inaresto ang suspek at iniimbestigahan na ng mga awtoridad kung may kaugnayan sa terorismo ang naturang insidente.
By Rianne Briones
Pinag-iingat ng FDA o Food and Drug Administration ang publiko laban sa paggamit at pagbili ng hindi rehistradong pamatak sa mata.
Ayon sa FDA, walang certificate of product registration ang eye drop na ‘dok apo better vision’.
Dahil dito, hindi dumaan sa kaukulang pagsusuri ng FDA ang naturang produkto kaya’t hindi masisiguro ng ahensya ang kalidad at kaligtasan nito.
Kaugnay nito, ipinagbawal na ng FDA ang paggawa, pag-angkat, pagbenta at pamamahagi ng naturang pamatak sa mata.
By Rianne Briones
Kinasuhan na ang suspek sa pagmamaslang sa isang pamilya sa San Jose del Monte City sa Bulacan.
Ayon kay San Jose del Monte City Police acting Chief Police Supt. Fitz Macariola, nahaharap sa kasong murder at rape ang suspek na si Carmelino Ibañez, 26-anyos, isang construction worker.
Aniya, ang pag-amin mismo ng suspek ang naging batayan para sa naturang reklamo.
Isinailalim na drug test ang salarin matapos nitong aminin na gumamit siya ng droga kaya nagawa ang krimen.
Batay pa sa naging salaysay ni Ibañez ay mayroon pang dalawa pang sangkot sa naging pamamaslang sa pamilya Carlos at panghahalay sa maybahay na si Estrella at ina nitong si Auring.
Humingi naman ng paumanhin ang suspek nang magkaharap sila ng padre de pamilyang si Dexter Carlos.
By Rianne Briones
Photo: Police Regional Office 3 / via CNNPH
Sasalubungin ng kilos protesta ng ilang militanteng grupo ang unang anibersaryo sa puwesto ni Pangulong Rodrigo Duterte ngayong araw na ito.
Mag-ra-rally ang grupong KMP o Kilusang Magbubukid ng Pilipinas at Unyon ng mga Manggagawa sa Agrikultura sa harap ng Camp Aguinaldo mamayang alas-8:30 ng umaga.
Ayon kay KMP Secretary General Antonio Flores, dismayado sila sa unang taon ng Pangulo dahil hindi ito nagpakita ng political will at sinseridad para tugunan ang matagal nang hangad ng mga magsasaka na tunay na repormang pang-agraryo.
Nabigo rin umano ang Pangulo na maibalik sa mga mangniniyog ang Coco Levy funds, magkaroon ng libreng irigasyon at social justice sa mga magsasaka.
Puro lamang umano salita ang Pangulo sa sinasabi nitong ipinapatupad na independent foreign policy.
By Rianne Briones
Binuweltahan ni VACC o Volunteers Against Crime and Corruption Founding Chairman Dante Jimenez ang mga kritiko ng war on drugs ng Administrasyong Duterte.
ito’y makaraang mabunyag na lango sa ipinagbabawal na gamot ang suspek sa Bulacan Massacre kung saan, ginahasa at tinadtad pa ng saksak ang dalawa sa limang biktima nito.
Sa panayam ng Programang Balita na, Serbisyo pa Kay Jimenez, hinamon din nito si United Nations Special Rapporteur Agnes Callamard na bumalik sa Pilipinas para makita ang tunay na sitwasyon kaugnay sa war on drugs ng pamahalaan.
Pakingan: bahagi ng panayam kay VACC Founding Chairman Dante Jimenez sa panayam ng DWIZ
By: Jaymark Dagala / BNSP / Race Perez
Tiniyak ng VACC o Volunteers Against Crime and Corruption na tutulungan nila ang Padre de Pamilyang si Dexter Carlos na makamit ang hustisya sa sinapit ng kaniyang pamilya.
Ito ang inihayag sa programang Balita Na, Serbisyo Pa ni VACC Founding Chairman Dante Jimenez makaraang mahulog na sa kamay ng batas ang isa sa mga suspek sa nangyaring massacre sa San Jose Del Monte City sa Bulacan na si Carmelino Ybaniez.
Kasunod nito, sinegundahan ni Jimenez ang duda ni Carlos hinggil sa pinalulutang ng pulisya na mag-isa lamang si Ybaniez nang mangyari ang karumal-dumal na krimen .
Pakingan: bahagi ng panayam kay VACC Founding Chairman Dante Jimenez sa panayam ng DWIZ
Kasunod nito, kinontra rin ni Jimenez ang pahayag ng pulisya na sarado na ang kaso dahil lamang sa may nahuli nang suspek at pinayuhan ang PNP na maghinay-hinay.
Pakingan: bahagi ng panayam kay VACC Founding Chairman Dante Jimenez sa panayam ng DWIZ
By: Jaymark Dagala / BNSP / Race Perez
