Nagsampa ang Office of the Ombudsman ng kasong graft at malversation laban sa mag-asawang contractors na sina Curlee at Sarah Discaya, kasama ang ilang opisyal ng Department of Public Works and Highways, kaugnay ng maanomalyang flood control project sa Calumpit, Bulacan.
Batay sa imbestigasyon, ang proyekto ay para sa rehabilitasyon ng river structure sa Bulusan River na ipinatupad ng DPWH Bulacan First District Engineering Office, kung saan lumabas na may mga iregularidad sa pagpapatupad at paggamit ng pondo para sa proyekto.
Ayon sa DPWH, dahil sa sama-samang pagkilos ng mga akusado, nakaranas ng pinsala ang pamahalaan at nakinabang nang hindi nararapat ang contractor na St. Timothy Construction Corporation na kumubra ng 53.9 milyong pisong halaga ng umano’y nawawalang pondo.
Sa kasalukuyan, nasa kustodiya na ng Senado si Curlee Discaya, habang nakakulong naman si Sarah Discaya sa Cebu, dahil sa hiwalay na kasong graft at malversation na may kaugnayan sa umano’y 96.5 milyong pisong “ghost” flood control project sa Davao Occidental. | Sa panulat ni Reabelle Medina.
