Maihahambing na sa pagkawasak ng Syria, Aleppo, Mosul at iba pang mga bansang may digmaan sa Gitnang Silangan ang ilang mga barangay sa Marawi City.
Ayon kay Brig. General Restituto Padilla, maliban sa binobomba ng militar ang mga lugar na ito dahil pinagkukutaan ng Maute-ISIS, nag-iiwan rin aniya ng bomba ang mga terorista sa bawat bahay o gusali na kanilang nililisan.
Sinabi ni Padilla na ito ang dahilan kayat matinding pag-iingat rin ang ginagawa nila ngayon dahil ayaw nilang malagay sa alanganin ang kanilang mga kasamahang sumasabak sa laban.
“Ang iniiwanan nilang gusali ay hindi libre sa anumang maaaring makasakit, pag umalis sila sa isang gusali, iniiwanan nila ng patibong yan, mga IED, mga pasabog at ano pang puwedeng makaantala sa galaw ng militar, kadalasan malakas ang inilalagay upang mapatay kung sino man ang papasok doon.” Ani Padilla
Battle zone visit
Samantala, tutol ang ground commanders ng Armed Forces at PNP o Philippine National Police sa Marawi City na dumalaw doon ang Pangulong Rodrigo Duterte sa mga panahong ito.
Ayon kay Padilla, Spokesman ng AFP, mas makabubuti kung magtutungo ang Pangulo sa Marawi kapag natapos na ng militar ang operasyon kontra Maute-ISIS.
Una nang sinabi ng Pangulo na nais niyang magtungo sa Marawi City ngayong anibersaryo ng pag-upo niya bilang Pangulo subalit handa niyang sundin ang magiging rekomendasyon ng militar.
“Alam naman po kasi ng ating mahal na Pangulo na meron pa tayong mga ginagawang operasyon kung gusto niya pong bumisita nirerespeto po niya yung kinakailangang nating gawin, mas mainam na tapusin muna natin ito bago po tayo magkaroon ng pagdalo ng mahal na Pangulo.” Pahayag ni Padilla
By Len Aguirre | Ratsada Balita (Interview)
Nakahanda na di umano ang tatlo (3) sa mga istrakturang inilagay ng China sa pinagtatalunang bahagi ng South China Sea para sa deployment ng mga gamit pandigma.
Tinukoy ng AMTI o Asia Maritime Transparency Initiative ang mga inilagay na tila base militar ng China sa Fiery Cross Reef na nasa Spratly Islands, Subi at Mischief Reef.
Ayon sa AMTI, batay sa ginawa nilang pag-analisa sa mga satellite photographs, halos kumpleto na ang naval, air, radar at defensive facilities sa tatlong base militar ng China sa South China Sea.
Umaabot na anila sa labing dalawa (12) ang istraktura sa Fiery Cross Reef at ilan dito ang may retractable na bubong na puwedeng paglagyan ng missile launchers.
Sinabi ng AMTI na anumang oras sa susunod na mga araw ay maaaring mag-deploy na sa Spratlys ang China ng military assets kabilang na ang combat aircraft at mobile missile launchers.
By Len Aguirre
Sugatan ang hindi bababa sa apat (4) katao sa aksidente sa isang coal fired power plant sa Tampa, Florida.
Ayon sa ulat, nangyari ito sa Bend Power Station kung saan dalawa (2) sa mga biktima ang nagtamo ng sunog sa katawan.
Agad namang isinugod sa pagamutan ang mga nasaktang empleyado ng planta habang nagpapatuloy naman ang rescue operations ng mga awtoridad.
Hindi pa matiyak sa ngayon kung anong uri ng aksidente ang nangyari sa naturang planta.
By Ralph Obina
Tiniyak ng China ang tuloy tuloy na tulong sa Pilipinas upang masawata ang terorismo sa bansa partikular sa Mindanao.
Ayon kay Foreign Minister Wang Yi, ang naunang ipinadalang armas ng China sa gobyerno ng Pilipinas ay masusundan pa.
Sinabi ng opisyal na bagamat hindi kalakihan ang bilang ng mga armas na kanilang naunang naibigay ay simbolo aniya ito ng panibagong yugto ng ugnayan ng Pilipinas at China.
Samantala, maliban sa terorismo, nagpahayag din ng commitment ang China ng pagtulong sa pagsugpo sa iligal na droga sa Pilipinas.
By Ralph Obina
Niyanig ng magnitude 4 na lindol ang bayan ng Naguilian sa La Union.
Ayon sa PHIVOLCS o Philippine Institute of Volcanology and Seismology naitala ang pagyanig kaninang alas-12:17 ng madaling araw.
Tectonic ang origin ng nasabing lindol na may lalim na 16 na kilometro.
Wala namang inaasahang pinsala at aftershocks ang nasabing pagyanig.
Nilinaw ni Asia’s Song Bird Regine Velasquez-Alcasid na hindi siya lilipat ng network.
Ito ay matapos muling pumirma ng kontrata sa Viva.
Ayon kay Regine, hindi management contract ang kanyang pinirmahan sa Viva dahil ang kanyang kapatid na si Cacai Velasquez-Mitra pa rin ang kanyang tumatayong manager.
Aniya, mga proyekto sa Viva lamang ang kabilang sa kontrata tulad na lamang ng pag-record ng bagong album, paggawa ng konsyerto at pelikula.
Pag-amin pa ni rin meron pa rin siyang kontrata sa GMA na mag-iexpire pa sa Enero ng susunod na taon.
Pabiro ring sinabi ng Asia’s Song Bird na wala na siyang paglalagyan sa Channel 2 at baka sa bubong na lamang kung lilipat ito.
Sa kasalukuyan ay napapanood si Regine sa GMA Network sa bilang si Sandawa sa fantaseryeng Mulawin versus Ravena.
Nagsimula na rin ang songbird na mag recording ng kanyang bagong album at maghanda para sa kanyang concert sa MOA Arena sa Oktubre.
By Krista de Dios c
Ikinagalak ng Pilipinas ang pagkilala ng Amerika sa pagsisikap ng bansa sa kampanya nito laban sa human trafficking.
Ito ay matapos na muling makuha ng Pilipinas ang rank na tier 1 sa inilabas na TIP o Trafficking in Persons Report of 2017 ng US State Department.
Ayon sa DFA, pagpapatunay lamang ito na epektibo ang ginagawang pagkilos ng pamahalaan laban sa human trafficking.
Nangako naman ang DFA na ipagpapatuloy ng bansa ang pakikipagtulungan nito sa domestic at international partners para mas mapalakas pa ang laban sa human trafficking alinsunod sa pamatayan ng tip.
By Rianne Briones
