Isang mapanganib na taon o dangerous year para sa kababaihan ang unang taon ng panunungkulan ni Pangulong Rodrigo Duterte.
Ito’y ayon kay Sen. Riza Hontiveros, dahil nagmarka rito ang human rights crisis, misogyny o matinding galit sa mga babae at mga kaso ng Extra Judicial Killings.
Kasabay nito, binigyan ni Hontiveros si Duterte ng gradong 8000 hanggang 12,000na kumakatawan sa bilang ng mga napatay sa giyera ng pamahalaan laban sa iligal na droga.
Aniya, ang unang taon ni Pangulong Duterte ay araw ng pag-gunita sa mga naging biktima ng EJK.
Dagdag pa ni Hontiveros, tumindi ang kultura ng sexism at impunity sa Duterte Administration dahil kapansin-pansin aniya ang matinding galit at pagpapahirap sa mga babaeng lider na kritiko ng Pangulo.
Iginiit din ni Hontiveros ang matinding pangangailangan sa mga progresibong kababaihan sa larangan ng politika para mapigilan ang lumalalang kalakaran sa bayolenteng linggwahe tulad ng rape jokes at mga fake news.
By: Krista de Dios
Nagmatigas pa rin ang pamahalaan kaugnay ng panawagan ng Maute Group na mamagitan ang MILF para sa negosyasyon sa nagpapatuloy na krisis sa Marawi City.
Ayon kay Presidential Spokesperson Ernesto Abella, kung may dapat may mamagitan, ito ay ang OPAPP o Office of the Presidential Adviser on the Peace Process.
Gayunman, iginiit ni Abella ang umiiral na no negotiation policy ng pamahalaan kaya nanindigan ang Malakanyang na hindi makikipa-usap sa teroristang grupo.
Aniya, mismong si Pangulong Duterte na ang nagsabing walang puwang sa sibilisadong lipunan ang Maute Terror group na dapat durugin at walang itirang buhay.
By: Krista De Dios / Aileen Taliping
Itinalaga na ni Pangulong Rodrigo Duterte ang 15 mga bagong hukom sa mga Regional Trial Courts at Municipal Court sa Samar at Biliran Leyte.
Batay sa transmittal letter ni Executive Secretary Salvador Medialdea kay Supreme Court Chief Justice Maria Lourdes Sereno, nakasaad ang pagkakatalaga kina Judge Wenefredo Cuaton ng Calubian Leyte RTC branch 22; Judge Georgina Uy Perez para sa Tacloban RTC Branch 45; Judge Lolita Ripalda Mercado para sa Tacloban RTC Branch 46; Judge Maria Corazon Vergara-Naraja para sa Ormoc City RTC Branch 47; at Judge Fabio Albao Jr para sa Sogod, Southern Leyte RTC Branch 39.
Para naman sa mga Municipal Courts, itinalaga sina: Judge Annabelle Donasco-Balledo sa MTC sa Biliran; Judges Florabel Amado-Berino, Herbert Renomeron, Carl Magsoling, Thea Gicela Nueve-Zamora, Jose Julius Obus at Judy Ramos-Navarrosa para sa mga korte sa Leyte at southern Leyte;
At para sa Samar – MTC ay sina Judges Carmelita Manzon Navalfor, Ruth Tan-Ching at Ivy Gariando-Lenzo.
Ang mga nasabing hukom ay dumaan muna sa masusing pagsala ng Judicial and Bar Council bago itinalaga sa mga hukuman sa Visayas Region.
By: Krista De Dios / Bert Mozo
Pinigil ng militar ang siyam na katao, kung saan lima rito ay may apelyidong Maute, sa check point sa Sultan Kudarat sa Maguindanao.
Kinilala ang mga ito na sina Alimatar Guro Maute, Apok Pili Maute, Mohamad Ali Maute, Saida Guro Maute, Amiladen Analo Maute, Mislanao Analo, Aisa Kalthum Sacaria at dalawang menor de edad.
Ayon kay CIDG ARMM regional director Senior/Supt. James Allan Logan, naharang ang siyam habang sakay ng isang Toyota Innova na patungong Cotabato City.
Agad inanyayahan ang mga ito sa opisina ng CIDG–ARMM para sumailalim sa pagtatanong matapos makita sa kanilang mga ID’S ang apelyidong Maute.
Itinanggi rin naman ng mga ito na sila ay kaanak ng Maute brothers na namuno ng kaguluhan sa Marawi City at nagpakita pa ng resibo bilang patunay na kumuha sila ng NBI clearance.
Paglilinaw ni Logan, nais lamang nilang makasiguro na walang kaugnayan sa teroristang grupo ang mga nasabing indibwidal at hindi naman agad inaakusahan.
By Krista De Dios
Ipinagpaliban ng Muntinlupa City Regional Trial Court ang pagbasa ng sakdal laban kay Senator Leila de Lima ngayong araw.
Ito ay kaugnay ng isa sa tatlong kaso ni De Lima na may kinalaman sa umano’y paglanap ng iligal na droga sa New Bilibid Prison.
Ayon Kay Judge Amelia Fabros-Corpuz ng Branch 205, ang nasabing desisyon ay dahil sa nakabinbing oposisyon ni De Lima laban sa kanyang pagkakaaresto.
Kasunod nito muling itinakda ni Corpuz ang arraignment ng senadora Agosto 18.
Si De Lima ay may dalawa pang kinahaharap na kasong illegal drug trade sa sala nina Judge Patria Manalastas-De Leon ng Branch 206 at Judge Juanita Guerrero ng Branch 204.
By Krista De Dios
Aabot sa isang (1) milyong pisong halaga ng mga hinihinalang cocaine at shabu ang nasabat ng mga awtoridad sa isinagawang buy bust operation sa Muntinlupa City.
Ayon kay Muntinlupa Police Chief Senior/Supt. Dante Novicio, naaresto sa nasabing buy bust ang mga suspek na sina Gecena Nuñez at Andrew Nolasco.
Nakuha kina Nuñez at Nolasco ang nasa dalawapu’t talong (23) sachet ng mga hinihinalang cocaine, limang (5) sachet ng shabu at limang libong piso (P5,000).
Nahaharap ang dalawa sa kasong paglabag sa Comprehensive Dangerous Drugs Act of 2002.
By Krista de Dios
Sa isang taon ng administrasyong Duterte, nasaan na nga ba tayo ngayon, at ano na ang ating hinaharap?
“It’s a mix of successes and pitfalls.”
Ito ang assessment ng political analyst at University of the Philippines Professor na si Ranjit Rye sa unang taon sa termino ni Pangulong Rodrigo Duterte.
Aniya may mga inisyatibong sinimulan na ang administrasyon na nagiging positibo naman ang resulta tulad ng peace process, pagbuo ng isang maayos na economic team at mga itinuloy na mga ‘existing policies’ na malaking bagay para sa isang magandang simula.
“Yung pag-host natin ng ASEAN meeting, yung relationship with China at iba pang bansa, andiyan din yung social development policies na nakatutok sa mahihirap, yung pag-fast track at pag-ayos ng prosesong pang-burukrasya at para sa mga OFW nang hindi na masyadong mahirapan, tourism, infrastructure programs, marami kasing insiyatibo at programa na nagsimula pa lang, of course yung initiative towards tax reform medyo controversial pero magandang nasimulan na yan.”
Kasabay nito ay pinapurihan ni Rye ang magandang pinatutunguhan ng ekonomiya ng bansa sa ilalim ng panunungkulan ni Duterte sa kabila ng bumababang halaga ng piso.
“I think medyo klaro na maganda ang grado ng Presidente sa ekonomiya, although tumataas din ang inflation natin pero then again maraming positive, yung investment tumaas, yung jobs medyo positive ang jobs market natin after a long time, at meron siyang programa na infrastructure development na very ambitious, mukhang hopeful ang lahat sa economy side, maganda ang nangyayari, very positive ang outlook.”
Mataas din ang ibinigay na grado ni Rye sa Pangulo na aabot sa 8 hanggang 9 pagdating sa mga basic services at paglaban sa katiwalian, samantalang 7 hanggang 8 naman pagdating sa giyera kontra krimen.
Gayunman binanggit din ni Rye ang ilang kontrobersiyang bumalot sa pag-upo sa puwesto ni Duterte lalo na ang madugong giyera kontra droga ng gobyerno.
“Andiyan yung war on drugs, maraming namatay, bumaba yung crime rate pero controversial talaga yan, andiyan din yung style ng Presidente, yung salita niya so laging may mix talaga yan.”
Pasado man para kay Rye ang laban ng Duterte administration kontra iligal na droga sinabi nitong kinakailangang ayusin pa ang nasabing kampanya.
“Siyempre papasa yan pero kailangang ibalanse yung law enforcement at human rights protection, yan ang challenge talaga sa gobyerno, pero malaki ang impact niyan sa pagbaba ng krimen, andiyan naman ang mga survey na suportado ang programa although may mga puna at kailangan lang ayusin ang programa.”
Idinagdag din ni Rye ang mga repormang dapat tutukan ng administrasyon dahil marami rin namang pagkukulang ang administrasyon sa kabuuan.
“Meron pa ring corruption eh, kailangang i-accelerate yung bureaucratic reforms, kailangan yung criminal justice system ma-reporma para bumilis ang mga kaso, pasado naman ang Presidente diyan kasi may mga inisyatiba nang sinimulan kagaya ng pag-simplify ng proseso sa government offices, red tape at pagtanggal sa puwesto sa mga corrupt officials.”
Ayon kay Rye, nailatag na ng maayos ng Pangulo ang mga nais niyang mangyari sa bansa, ang kailangan na lamang ay magandang pagpapatupad ng mga ito.
“Normal yan sa isang administrasyon, may hit and miss yan, pero para sa akin on the whole maganda ang unang taon, kailangan lang mag-focus on implementation, so kung may BUILD, BUILD, BUILD dapat may IMPLEMENT, IMPLEMENT, IMPLEMENT, we have to focus on that kasi mataas ang expectation ng taong bayan, na may mailalatag na magagandang programa at solusyon sa mga araw-araw na problema natin.” Pahayag ni Rye
Assessment ng ilang mga kasalukuyan at nagdaang opisyal ng pamahalaan
Binigyan ni Senate Majority Floor Leader Tito Sotto si Pangulong Rodrigo Duterte ng “8” na grado at sinabing kuntento siya sa naging performance ni Pangulong Duterte sa unang taon nitong panunungkulan. Anya, sa unang taon pa lamang ay naging matindi na ang hakbang ng Pangulo para labanan ang iligal na droga at banta ng terorismo sa bansa na aniya’y hindi ginawa ng nakalipas na administrasyon.
Para naman kay Senate President Koko Pimentel, isang ‘fundamental change’ ang ginawa ng Pangulo sa bansa.
Giit ni Pimentel kinakamayan na natin ang mga bansang hindi napapansin noon, katulad ng China at Russia na anya’y isang malaking pag-unlad sa relasyon sa pagitan ng Pilipinas at iba pang bansa sa mundo.
Dagdag pa ni Pimentel kung meron mang dapat pagtuunan pa ng pansin ang Duterte administration sa susunod na taon nito, ito ay ang pagpapatupad ng mga infrastructure projects at peace and order.
Samantala, nagbigay din ng komento si dating Congressman at National Security Adviser Roilo Golez hinggil sa mga naging hakbangin ng pamahalaan sa isyu ng agawan ng teritoryo sa West Philippine Sea kung saan inihayag nito na habang tuloy ang diplomatic at economic engagement ng Pinas sa China ay huwag din sanang kalimutan na ipaglaban ang ating karapatan partikular sa teritoryo.
Paliwanag ni Golez, sa mata ng International Law, pagmamay-ari ng Pilipinas ang West Philippine Sea kaya ito ang dapat panghawakan ng kasalukuyang administrasyon.
Bagaman nananatili ang suporta ni dating Pangulong Fidel Ramos kay Pangulong Duterte, nanindigan pa rin ito na mas matimbang pa rin ang interes ng taumbayan.
Binatikos ng dating punong ehekutibo ang malaking bilang ng delegasyong binitbit ng Pangulong Rodrigo Duterte sa state visit nito sa Russia.
Giit ng dating Pangulo, hindi dapat isinama lahat ng Pangulong Duterte ang halos lahat ng matataas na opisyal ng pamahalaan na dapat sana’y nagkokontrol sa sitwasyon habang nagkakagulo sa Marawi City.
Ayon kay Ramos, hindi pa naman ito ang unang pagkakataon na may banta ng karahasan sa bansa gaya ng nangyari noong bakbakan sa Butig, Lanao del Sur.
Matatandaang kasama sa biyahe ng Pangulo pa Russia sina Defense Secretary Delfin Lorenzana, National Security Council Secretary Hermogenes Esperon, AFP Chief of Staff Eduardo Año at PNP Chief Ronald ‘Bato’ Dela Rosa.
*********
Muli nating balikan ang ilang mahahalagang kaganapan sa isang taong panunungkulan ng isa sa pinaka-popular at kontrobersyal na umupong pangulo ng Pilipinas…Si Rodrigo Roa Duterte.
Unang taon, tila isang ‘roller coaster ride’
Tumanggi si Pangulong Rodrigo Duterte na bigyan ng assessment ang kanyang naging unang taon sa puwesto.
Ayon kay Duterte, gagawin lamang niya ito kapag natapos niya ang kanyang termino.
Ngunit humirit ang Pangulo na kung hindi na niya aabutin ito ay sana ay maging parehas naman ang publiko sa kanilang gagawing assessment sa kanyang naging serbisyo.
Tinawag naman ng Pangulo na tila-roller coaster ride ang kanyang isang taon dahil sa high and lows na nangyari sa kanyang administrasyon.
At ngayon, sa darating na ikalawang State of the Nation Address ng Pangulo ngayong Hulyo, ano pa ang inaasahan mo sa kanyang administrasyon sa mga susunod na taon?
By Aiza Rendon and Ira Y. Cruz
Pasok na sa semifinals ng Eastbourne International si Novak Djokovic.
Ito ay makaraang idispatsa ng Serbian tennis star ang kalabang si Donald Young sa iskor na 6-2 at 7-6.
Susunod na makakalaban ni Djokovic ang Russian na si Daniil Medvedev na tumalo naman kay Fourth Seeded Steve Johnson.
Si Djokovic ay kasalukuyang hawak ang ika-apat na pwesto sa world tennis rankings.
By Ralph Obina
Ipinagmalaki ng Malacañang ang pagiging masigasig at abala ni Pangulong Rodrigo Duterte sa unang taon nito sa puwesto.
Ayon kay Communications Secretary Martin Andanar, nasa isanlibo tatlongdaan at limampu’t lima (1,355) ang naging aktibidad ng Pangulong Duterte sa buong isang taon nito.
Malayo aniya ito sa unang taon ng nakaraang administrasyon.
Kung tutuusin ayon kay Andanar ay wala halos pahinga ang Pangulong Duterte.
“Ano ba yung naging activity noong nakaraang administrasyon, para sa mga kababayan natin meron tayong 116 resting days, ang bawat Pilipino na nagtatrabaho legally we can rest for 116 days, alam niyo ba kung ilang days lang ang ginamit ng Presidente sa 116? 76 lang.” Ani Andanar
Kaya paki-usap ni Andanar sa publiko, huwag nang intrigahin kung nawawala ang Pangulo at bigyan aniya ng laya ang presidente na makapagpahinga.
“Para sa mga kababayan natin, siguro bigyan natin ng liway ang Pangulo na magpahinga kasi limang taon pa po ang susuungin ng Pangulo marami pang problema sa bansa ang kailangan na ayusin.” Pahayag ni Andanar
By Ralph Obina | Karambola (Interview)
Newer Posts