Bumaba ang bilang ng mga kaso ng kidnapping o pagdukot sa bansa ngayong taon ayon sa anti-kidnapping group ng PNP o Philippine National Police.
Batay sa tala, nasa siyam na kaso lamang ng kidnapping ang kanilang naitala sa unang anim na buwan ng taon o mula Enero hanggang Hunyo.
Ayon kay Supt. Abelardo Borromeo, malaki ang ibinaba ng nasabing bilang kumpara sa 29 na kaso na naitala nuong isang taon, 38 kaso nuong 2015 at 49 na kaso nuong 2014.
Mula aniya sa siyam na kaso ng pagdukot ngayong taon, anim na ang nareresolba ng pulisya at tatlo ang itinuturing na live cases .
Habang mula naman sa 16 na indibiduwal na dinukot, walo ang Pilipino, dalawa ang Indian at anim ang Chinese nationals kung saan, dalawa ang nasawi.
By: Jaymark Dagala / Jonathan Andal
Hindi mahalaga para kay Senador Francis Escudero ang madalang na pagpapakita sa publiko ni Pangulong Rodrigo Duterte.
Ayon sa Senador, hindi naman naka-bundy clock ang Pangulo kaya’t hindi ito obligado na magreport araw-araw sa Palasyo basta’t ginagampanan nito ang kaniyang tungkilin sa bayan.
Ginawa ng Senador ang pahayag makaraang sabihin nito na hindi siya madalas magpapakita sa publiko hangga’t hindi natatapos ang kasalukuyang gulo sa Marawi City.
Dagdag pa ni Escudero, dapat masanay na rin aniya ang publiko sa kakaibang personalidad ng Pangulo.
By: Jaymark Dagala / Cely Bueno
Hinimok ni Senador Francis Escudero ang Malakaniyang na linawin hindi kabilang ang mga abusadong pulis sa mga ginarantiyahan ni Pangulong Rodrigo Duterte sa mga kaso at pagkakakulong
Ito’y makaraang muling igiit ng Pangulo na sasagutin at hindi niya hahayaang makulong ang mga pulis na tumutupad lamang sa kanilang tungkulin sa ilalim ng war on drugs ng administrasyon
Ayon kay Escudero, posibleng ginawa lamang ng Pangulo ang pahayag upang maalis ang kaba at pag-aatubili ng ilang pulis na ginagampanan ng maayos ang kanilang tungkulin
Kaya naman, sinabi ng Senador na mahalagang maisakatuparan ang panibagong pagdinig ng Senado upang pagpaliwanagin si Justice Secretary Vitaliano Aguirre hinggil sa ginawang pagpapalabnaw ng kaso laban sa grupo ni Supt. Marvin Marcos na nasa likod ng pagpatay kay dating Albuera Mayor Rolando Espinosa Sr.
By: Jaymark Dagala / Cely Bueno
Isinusulong ni Senador Francis Escudero ang panukalang batas na naglalayong lumikha ng 20 Bilyong Pisong trust fund para sa mga aktibong miyembro ng militar at pulisya na mapapatay o kaya’y masusugatan sa pagganap sa kanilang tungkulin.
Ito’y ayon kay Escudero ay sa harap na rin ng mga kulang na kumpensasyon gayundin ang hindi mahusay na benepisyo ng mga tinatanggap ng mga itinuturing na kawal ng bayan.
Sa ilalim ng Senate Bill 1491 o ang Comprehensive SOCIAL benefit of the Government, layunin nito na gawing institutionalized ang trust fund na itatayo at ide-develop ng Defense Department at ng Department of Interior and Local Government.
Saklaw nito ang mga pangunahing pangangailangan ng pamilya at dependent ng mga sundalo at pulis tulad ng full scholarship, financial, shelter, health at medical care gayundin ang cost of living.
By: Jaymark Dagala / Cely Bueno
Binigyan ng magkahiwalay na iskor ni VACC o Volunteers Against Crime and Corruption Chairman Dante Jimenez ang Pangulong Rodrigo Duterte at ang administrasyong Duterte sa unang taon nito.
Sa panayam ng programang ‘Balita Na, Serbisyo Pa‘ ng DWIZ, sinabi Jimenez na sampu (10) ang kanyang rate sa Pangulong Duterte.
Habang binigyan naman niya ng siyete (7) na grado ang administrasyong Duterte.
Paliwanag ni Jimenez, magkaiba umano ang performance ng Pangulong Duterte sa kabuuang administrasyon.
Dahil umano sa mabagal na aksyon ng lehislatura at hudikatura ng naturang administrasyon, nahihila pababa ang rating ni Pangulong Duterte.
“Sa 1 to 10, scale of 1 to 10, sampu siya pero sa Duterte administration dahil he is the President siyete (7) lang because mabagal ang legislative, mabagal ang judiciary, na-apektuhan si Presidente eh.”
Hinamon rin ni Jimenez ang kongreso na ipasa na ang panukalang pagbabalik ng parusang kamatayan kaugnay na rin sa nangyaring Bulacan massacre noong Martes kung saan pinatay ang mag-iina at isang lola.
Samantala, umapela naman si Jimenez sa publiko na patuloy na suportahan at ipagdasal ang Pangulong Duterte.
By Race Perez | Balita Na, Serbisyo Pa Program (Interview)
Hindi napigilan ni VACC o Volunteers Against Crime and Corruption Chairman Dante Jimenez na magpahayag ng kanyang galit sa nangyaring Bulacan Massacre noong Martes.
Sa panayam ni Jaymark Dagala sa programang ‘Balita Na, Serbisyo Pa’ ng DWIZ, sinabi ni Jimenez na hindi kapani-paniwala na mag-isa lamang na ginawa ng suspek na si Carmelino Navarro Ibañes ang naturang krimen.
Ito ay makaraang mapag-alaman rin umano ng mga otoridad na nagtamo ng 45 saksak ang ina ng tahanan na si Estrella.
Ani Jimenez, mismong ang padre pamilya na si Dexter Carlos Sr. na rin ang naniniwala na may kasama ang umaming suspek.
“Nakita mo yang saksak na yan? Maniniwala kaba diyan na siya laang ang gumawa ng krimen na yan?”
“Sabi nga ni Dexter sa amin, siya ay naniniwala hindi lang yang h***p na Carmelino na yan ang gumawa nyan kasi marami pong pinagdududahan si Dexter na nagungursunada sa asawa niya dahil nag-iigib nga ng tubig”
Ipinabatid rin ni Jimenez na hindi maaaring isara agad ang naturang kaso kahit pa nahuli na ang suspek.
Ito ay dahil hindi pa umano tapos ang imbestigasyon kaugnay sa motibo ng pangri-rape at wala pang lumalabas na resulta sa ginawang eksaminasyon sa mga biktima.
Kasabay nito, pinayuhan ni Jimenez ang mga otoridad na maghinay-hinay sa naturang kaso.
“May balita kami, case is closed daw, oh, ano yan? Bat kayo nag-aapura?”
“Wala pa nag yung forensic examination, wala pa yung case, yung rape motive”
“2 ang ni-rape niya, pinagsasaksak niya. That’s why dapat maghinay-hinay sila, siguraduhin nila.”
Kaugnay nito bibigyan anya ng VACC ng legal assistance at moral support si Carlos.
Gayunpaman, marami pa umano silang dapat linawin sa mga otoridad katulad ng pagbibigay pahayag ng suspek na wala umanong kasamang abogado.
Ani Jimenez, mahalagang malinaw muna ang mga ganitong bagay dahil maaaring magkaroon ng technical problem sa pagresolba ng naturang kaso.
“Tututukan po naming ito, pero may mga bagay pa na dapat maklaro natin sa pulis dahil ang balita namin, eh itong suspek eh di umano’y was not assisted by a lawyer during the giving of statement. So, ‘yan ay baka ma-technicality tayo”
Jimenez sa mga kumukontra sa ‘War on Drugs’ ng Duterte Admin
Binuweltahan ni VACC Chairman Dante Jimenez ang mga kumukontra sa kampanya kontra iligal na droga ng administrasyong Duterte.
Ito ay matapos ang nangyaring Bulacan Massacre kung saan gumagamit umano ng iligal na droga ang umaming suspek ng naturang krimen.
Hinamon naman ni Jimenez si UN o United Nations Special Rapporteur Agnes Callamard na bumalik ng bansa at gumamit ng shabu.
“Hamunin natin siya, pumunta siya dito.”
“Mag droga, mag-shabu siya rito.”
Matatandaang nagpahayag ng pagtutol si Callamard sa ‘war on drugs’ ng administrasyon dahil wala naman umanong masamang epekto ang paggamit ng iligal na droga.
Pagbabalik ng usaping Death Penalty
“Ilang massacres pa ang dapat nating hintayin?”
Ito ang iniwang tanong ni VACC Chairman Dante Jimenez sa panayam ng DWIZ kaugnay sa pagbabalik ng usaping death penalty.
Anya, ang nakakalungkot sa usaping ito, kung hindi lalabas sa media ay hindi rin umano pag-uusapan sa kongreso.
Katulad na umano nitong lumabas na Bulacan massacre.
Kaugnay nito, nakiusap si Jimenez sa kongreso na ipasa na ang panukalang pagbabalik ng parusang kamatayan.
“Unang-una, matagal ko nang hinahamon ang kongreso na… pwede ba ipasa niyo na ang death penalty? Ilang massacre pa ba hihintayin niyo para ipasa ‘yan?”
Dapat na anyang ipasa ng kongreso ang naturang panukala base na rin sa mga sinabi ng Pangulong Rodrigo Duterte noong kampanya.
Dagdag pa ni Jimenez, hindi dapat maudlot ang pagpapasa nito dahil lamang sa ayaw ng simbahang katoliko.
Samantala, pinasaringan ni Jimenez ang Simbahang Katoliko na pumunta sa mga biktima ng Bulacan Massacre at bendisyunan ang mga ito nang walang bayad.
“Bakit hindi kayo pumunta doon? Bendisyunan ninyo ang mga patay dun. Baka singilin niyo pa yung pagbendisyon ninyo sa mga patay?”
By Race Perez | Balita Na, Serbisyo Pa Program (Interview)
Simple lamang na ipagdiriwang ng Palasyo ang unang anibersaryo ni Pangulong Rodrigo Duterte sa pwesto.
Ayon kay Communications Secretary Martin Andanar, may inihanda silang documentary na pinamagatang Change 365 – Comfortable Life for All.
Ang naturang dokyu ay ipapalabas sa PTV, Radyo ng Bayan at iba pang attached agencies.
Tampok aniya dito ang isang taong pages-serbisyo ni Pangulong Duterte para makita ang tunay na sitwasyon ng mga kababayan nating Pilipino.
“Magsisimula po ito ngayong darating na Biyernes, 7:00 ng gabi sa lahat ng document networks, yun po yung plano natin.”
“Ito ay isang programa na ipapalabas nating…na live, live po yung programa pagkatapos po eh, meron pong recorded na documentaries na ipapalabas natin”
By Ralph Obina
Namahagi ng emergency cash assistance ang DSWD o Department of Social Welfare Development sa may limandaang (500) pamilyang inilikas sa Marawi City.
Ayon sa DSWD, bawat rehistradong pamilya ay makakatanggap ng isanlibong piso (P1,000.00).
Ipinabatid ng DSWD na may aasahan pang karagdagang apat na libo (P4,000.00) sa susunod na mga linggo ang mga bakwit ng Marawi.
Kasabay nito, inamin ng DSWD na noong Ramadan pa dapat naipamahagi ang unang isanlibong piso ngunit hindi lang anila nakahabol.
By Ralph Obina
Itinanghal nang World’s Sexiest Woman ang kapamilya aktres na si Nadine Lustre.
Ito ay matapos na manguna ang aktres sa isinagawang online poll ng FHM Mens’ Magazine.
Si Nadine ay nakakuha ng mahigit sa apatnaraan at siyamnaput isang libong (491,000) boto o 9.85%.
Pumangalawa naman si Kim Domingo na nakakuha ng 9.03% o mahigit apatnaraan at limampung libong (450,000) boto.
Nasa 3rd spot naman si Rhian Ramos at pang-apat ang sexiest noong nakaraang taon na Jessy Mendiola.
Pasok din sa Top 10 sina Ellen Adarna, Jennelyn Mercado, Angel Locsin, Liza Soberano, Maine Mendoza at Solenn Heussaff.
Matatandaang, si Nadine ay isa sa front runner simula nang mag-umpisa ang botohan.
By Krista De Dios