Minaliit lang ng pamahalaan ang banta ng BIFF o Bangsamoro Islamic Freedom Fighters laban kay Pangulong Rodrigo Duterte.
Ayon kay Presidential Spokesman Ernesto Abella, hindi kailanman makakukuha ng suporta mula sa mamamayan ang BIFF dahil maging ang Muslim Community ay ayaw din sa kanilang ginagawa.
Malinaw na nagpapapansin lamang ani Abella ang BIFF dahil sa magaling lamang ito sa media manipulation ngunit wala namang matibay na suporta mula sa publiko.
Sa panig naman ng hukbong sandatahan, sinabi ni EASTMINCOM Deputy Commander Brig/Gen. Gilbert Gapay, nakararanas lamang ng matinding dagok ang BIFF dahil sa pinaigting na opensiba ng militar sa lugar kaya’t nabitawan nila ang gayung pahayag.
Kasunod nito, nilinaw din ni Gapay na walang kinalaman sa nangyayaring gulo sa Marawi City ang ginawang pag-atake ng BIFF sa bahagi naman ng North Cotabato kamakailan.
By: Jaymark Dagala / Aileen Taliping
Nilinaw ng Malakaniyang na magmumula pa rin sa pambansang pondo ang gagamiting pagpapatayo sa mga nasirang gusali at imprastraktura sa Marawi City.
Ito’y makaraang maglabas ng paunang 10 Bilyong Pisong pondo ang PAGCOR o Philippine Amusement and Gaming Corporation na siyang gagamitin lamang para sa rehabilitation program sa nasabing lungsod.
Ayon kay Presidential Spokesman Ernesto Abella, sa financial assistance ng Pangulo gagamitin ang social fund ng PAGCOR habang mula sa national budget naman kukunin ang pondo para sa Social Welfare assistance.
Bukas din ang SSS o Social Security System at GSIS o Government Service Insurace System sa pagpo-proseso ng loan para sa mga apektado nilang miyembro sa lungsod.
Babalikatin naman ng NHA o National Housing Authority ang pabahay para sa pamilya ng mga sundalo at pulis na nasawi sa bakbakan .
Habang ang Deped, TESDA at ang 113 SUC’S o State Colleges and Universities ang bahala sa edukasyon ng hanggang dalawa sa mga anak nito.
By: Jaymark Dagala / Aileen Taliping
Pinag-aaralan ni Senador Richard Gordon ang posibilidad na bawasan ang kapangyarihan ng Justice Secretary.
Sa harap na rin ito ng mga kinahaharap na kontrobersiya ni Justice Secretary Vitaliano Aguirre tulad ng pagpapalabnaw sa kaso ng mga pulis na sangkot sa pagpatay kay dating Albuera Mayor Rolando Espinosa.
Ayon kay Gordon, bagama’t nasa pag-aaral pa lamang sila kung maaaring tapyasan ang saklaw ng kalihim hinggil sa paggawa ng desisyon, nasa Pangulo pa rin ang kapangyarihang magtalaga rito.
Gayunman, sinabi ng Senador na kanila munang titingnan kung naaayon ba sa saligang batas ang kanilang plano bago umusad sa susunod na hakbang.
By: Jaymark Dagala / Cely Bueno
Handa na ang mga senador sa kanilang biyahe patungong France para sa isang Parliamentary visit.
Ayon kay Senate President Koko Pimentel, layunin nitong mapatatag ang relasyon sa pagitan ng Frace at Pilipinas na siyang magiging daan para maisaayos ang relasyon ng bansa sa European Union.
Sasamantalahin din aniya nila ang pagkakataon na mapag-aralan ang porma ng pamahalaan ng France na isang parliamentary form ngunit may matatag na Presidency.
Kabilang sa mga kasama ni Pimentel sa biyahe sina Senador Joel Villanueva, JV Ejercito, Senadora Cynthia Villar at Senadora Loren Legarda.
By: Jaymark Dagala / Cely Bueno
Pinag-aaralan pa ng senado kung aling komite ang hahawak sa muling pagbubukas ng imbestigasyon hinggil sa pagpatay kay dating Albuera Mayor Rolando Espinosa Sr.
Ito’y makaraan ang ginawang pagpapalabnaw ng Korte sa homicide mula sa murder ang isinampang kaso laban kay CIDG Region 8 Director Supt. Marvin Marcos at sa 19 na kasamahan nito.
Ayon kay Senador Richard Gordon, kaniyang kokonsultahin si Senate President Koko Pimentel kung alin sa kaniyang pinamumunuang Blue Ribbon o Justice Committee ang siyang hahawak ng re-investigation.
Maaari naman kasing magpatawag ng pagdinig ng Blue Ribbon anumang oras kung sila ang aatasan na mag-imbestiga Motu Propio habang kailangan pang hintayin ang muling pagubukas ng sesyon ng Kongreso sa Hulyo kung ang Justice Committee naman ang hahawak nito.
Gayunman, sinabi ni Gordon na kailangan pa munang maghanap ng magandang tiyempo para marinig ng publiko ang paliwanag ng Department of Justice hinggil sa kaso dahil sa mayruon pang krisis na kinahaharap ang bansa partikular na sa Marawi City.
By: Jaymark Dagala / Cely Bueno
Nakatakda nang isumite kay Pangulong Rodrigo Duterte ang inilabas na shortlist ng JBC o Judicial and Bar Council.
Ito’y para pagpilian ni Pangulo ang hahalili kay Supreme Court Associate Justice Bienvenido Reyes na magreretiro sa Hulyo 6 alinsunod sa mandatory retirement age na 70 taong gulang.
Pitong pangalan ang nakapaloob sa nasabing listahan na kinabibilangan ni Court of Appeals Presiding Justice Andres Reyes Jr. na nakakuha ng pitong boto.
Tig-anim na boto naman ang nakuha nila Court of Appeals Associate Justices Rosmari Carandang at Jose Reyes Jr habang tig-limang boto ang nakuha nila Court of Appeals Associate Justices Japar Dimaampao at Apolinario Bruselas Jr.
Pasok din sa nasabing listahan sina C.A. Associate Justice Amy Lazaro – Javier at Centro Escolar University School of Law Vice Dean Rita Linda Ventura – Jimeno.
By: Jaymark Dagala / Bert Mozo
Ipinagtanggol ng IBP o Integrated Bar of the Philippines ang mga mahistrado ng Court of Appeals na pinagpapaliwanag ng Kamara kaugnay sa tinaguriang Ilocos 6.
Ayon kay IBP President Atty. Cherrie Grace Bareng – Asistin, dapat igalang at sundin ng Kamara ang kautusan ng Special 4th division ng Appellate Court na palayain ang mga nasabing opisyal alinusnod sa itinatadhana ng Saligang Batas hinggil sa separation of powers ng bawat sangay ng pamahalaan.
Binigyang diin pa ni Atty. Asistin na dapat maging tapag-tanggol ng rule of law ang lahat ng abugado kabilang na si House Speaker Pantaleon Alvarez na siyang nagpalabas ng show cause order sa mga mahistrado ng C.A.
Nag-ugat ang usapin nang suwayin ng Kamara ang utos ng Court of Appeals na palayain ang Ilocos 6 makaraang ipiit ang mga ito sa Batasan Complex dahil sa pagsisinungaling hinggil sa paggamit ng pondo ng Ilocos Norte Provincial Government mula sa Tobacco Excise Tax.
By: Jaymark Dagala / Bert Mozo
Timbog ang itinuturing na right hand man nang pinaslang na umano’y drug lord na si Melvin Odicta.
Ang suspek na si Rolando Torpio ay inaresto ng mga otoridad sa Villa Arevalo sa Iloilo City sa bisa ng arrest warrant.
Inamin ni Torpio na noong aktibo pa siya sa kalakalan ng illegal drugs ay kumukuha siya ng supply kay Odicta subalit hindi aniya siya kanang kamay ng suspected drug lord.
Sinabi ni Torpio na bagamat dati siyang driver ng taxi ng mga Odicta, hindi totoong sub group leader ito ng sindikato ng iligal na droga.
By Judith Estrada – Larino
Nag-negatibo sa fake grains ang mga sample ng pinaghihinalaang pekeng bigas batay na rin ito sa pagsusuri ng NFA o National Food Authority sa may anim na rice samples.
Dahil dito, sinabi ni NFA Administrator Jason Aquino na malinaw na walang fake rice sa Pilipinas.
Umapela din si Aquino sa publiko na iwasan ang pagpapakalat pa ng mga pekeng balita.
Matatandaang isang pamilya ang nagreklamo na nakabili sila ng pekeng bigas na naging dahilan ng kanilang pagkakasakit.
By Ralph Obina