Umakyat na sa 375 ang bilang ng mga nasasawi, isang buwan mula nang sumiklab ang bakbakan sa Marawi City.
Ayon kay AFP o Armed Forces of the Philippines Public Affairs Office Chief Col. Edgard Arevalo, dalawang sundalo ang pinakabagong nadagdag sa listahan.
Ito aniya ang dahilan kaya’t sumampa na sa 69 ang nalagas sa panig ng pamahalaan habang tinatayang nasa halos 300 o nasa 280 ang nasawi sa panig ng mga terorista.
Habang nakapako na sa 26 ang bilang ng mga sibilyang pinatay ng mga miyembro ng ISIS-inspired Maute Terror Group.
By Jaymark Dagala / with report from Jonathan Andal (Patrol 31)
Ikinalungkot ng Malacañang ang pagkakaipit ng dalawang sibilyan sa nangyaring bakbakan sa pagitan ng militar at ng BIFF o Bangsamoro Islamic Freedom Fighters sa North Cotabato.
Batay sa inilabas na final report ng pamahalaan, isang sibilyan ang nasawi habang isa ang nasugatan sa nangyaring engkuwentro habang nailigtas naman ang 30 na binihag ng mga bandido.
Ayon kay Presidential Spokesman Ernesto Abella, isa ang nasawi at dalawa ang nasugatan sa panig ng militar habang anim naman ang nasawi at walong (8) iba pa ang sugatan sa panig ng BIFF.
Dahil sa pangyayari, napilitang magsilikas ang may 367 residente ng Barangay Malagakit sa bayan ng Pigcawayan dahil sa takot na maipit sa bakbakan.
By Jaymark Dagala / with report from Aileen Taliping (Patrol 23)
Doble higpit ang seguridad na ipatutupad ng militar sa buong Mindanao sa Lunes, Hunyo 26 kasabay ng pagdiriwang ng Eid’l Fitr.
Ayon kay EASTMINCOM o Eastern Mindanao Command Deputy Commander Brig. General Gilbert Gapay, walang magbabago sa ipinatutupad nilang seguridad sa Mindanao simula nang ideklara ang Martial Law noong isang buwan.
Maliban sa pagtitiyak sa seguridad ng mga lugar na pagdarausan ng pagdiriwang, paiigtingin din ang mga checkpoints at security patrol upang walang makalusot na masasamang elemento na nagtatangkang maghasik ng gulo.
Kasunod nito, nakikipag-ugnayan na ang militar sa Muslim communities sa Mindanao upang magkatuwang silang babalangkas ng mga mas istriktong hakbang at umaasa silang magiging ligtas at mapayapa ang nasabing araw.
By Jaymark Dagala / with report from Aileen Taliping (Patrol 23)
Tinatayang nasa 40 dayuhang terorista ang binabantayan ngayon ng mga awtoridad makaraang makumpirma ang pagpasok nito sa bansa.
Ito ang inihayag ni EASTMINCOM o Eastern Mindanao Command Deputy Commander Brig/Gen. Gilbert Gapay, batay na rin sa nakalap nilang intelligence reports.
Ayon kay Gapay, tukoy na ang pagkakakilanlan ng mga nasabing terorista mula sa Malaysia, Indonesia, Saudi Arabia at Pakistan na kasapakat ng Maute Terror Group.
Karamihan aniya sa mga ito ay nakapuslit gamit ang backdoor channels sa Mindanao kung saan hindi masyadong nababantayan dahil sa lawak ng coastline ng Mindanao.
By: Jaymark Dagala / Aileen Taliping
Napigilan ng pamahalaan ang pagtatangka ng mga teroristang grupo na makapagtatag ng sariling probinsya ng Islamic State sa Pilipinas partikuar sa Marawi City.
Ito ang pahayag ng Malakaniyang kasunod ng unang buwang anibersaryo ng pagdideklara ni Pangulong Rodrigo Duterte ng Martial Law sa Mindanao.
Ayon kay Presidential Spokesman Ernesto Abella, nakamit ng pamahalaan ang pangunahing layunin sa pagdideklara ng batas militar at iyon ay supilin ang pagkalat ng terorismo sa bansa.
Gayunman, hindi masabi ni Abella kung palalawigin o aalisin na ang martial law sa sandaling matapos na ang 60 araw na itinatakda ng saligang batas.
Ipinauubaya na ng Palasyo sa Defense Department o sa hukbong sandatahan ang rekumendasyon kung may pangangailangan pang palawigin o hindi na ang martial law sa Mindanao.
By: Jaymark Dagala / Aileen Taliping
Suportado ng Malakaniyang ang mungkahi ni Senador Richard Gordon na gawing tourist hub ang Marawi City sa sandaling matapos na ang krisis at maibalik na sa normal ang sitwasyon duon.
Ayon kay Presidential Spokesman Ernesto Abella, mismong ang Department of Tourism na ang nagsabi na may malaking potensyal ang Marawi dahil maganda ang lugar para sa mga turista.
Maganda rin aniya ang klima sa lungsod gayundin ang mga tanawin dito partikular na ang Lake Lanao maliban pa sa mayamang kultura ng mga taga-ruon.
Kasunod nito, umaasa ang palasyo na maisama sa rehabilitation, recovery at reconstruction program ng Marawi ang tourism masterplan para maging tourist destination.
By: Jaymark Dagala / Aileen Taliping
Bukas ang Malakaniyang sa alok ng pamahalaan ng Australia na magpadala ng dalawang military surveillance aircrafts upang mapadali ang paglutas sa Marawi Siege.
Ayon kay Presidential Spokesman Ernesto Abella, wala aniyang problema sa pamahalaan ang alinmang tulong basta’t ito’y naaayon sa saligang batas.
Kasalukuyan nang nakikipag-ugnayan ang defense department sa kanilang Australian counterparts hinggil sa alok na tulong.
Una nang nagpaabot ng tulong ang Amerika sa pamamagitan ng surveillance at technical support sa kasagsagan ng bakbakan sa Marawi City.
By: Jaymark Dagala / Aileen Taliping
Hinimok ni Special Assistant to the President Christopher Bong Go ang mga kritiko ni Pangulong Rodrigo Duterte na tumulong na lamang sa halip na manira.
Ito ang inilabas na pahayag ng kalihim sa pambihirang pagkakataon sa harap na rin ng walang tigil na pagpuna at birada sa mga ginagawa ng Pangulo.
Ayon kay Go, hindi talaga mawawala ang mga nais manira sa Pangulo at tila hindi na makapaghintay pa na matapos ang termino ng punong ehekutibo sa 2022.
Giit pa ni Go, mayorya ng mga Pilipino ang naghalal sa Pangulo kaya’t dapat itong bigyan ng pagkakataon para makapagsilbi sa bayan.
Kasunod nito, nagpasalamat si Go sa mga masugid na tagasuporta ng Pangulo at tiniyak na hindi sila mabibigo dahil pagsusumikapan ng Pangulo na maglingkod sa sambayanang Pilipino.
By: Jaymark Dagala / Aileen Taliping
