Kumpiyansa ang Team Pacquiao na mananaig ang bilis at karanasan ni Senator Manny Pacquiao sa kanilang bakbakan sa ring ni Australian boxer Jeff Horn.
Ayon kay Coach Freddie Roach, wala na siyang mahihingi pa kay Pacman at handang-handa na ito sa kanilang sagupaan.
Una nang sumalang si Pacquiao sa anim na rounds ng sparring sa Pacman Wild Card Gym sa General Santos City.
Dito ay ipinamalas ng Pambansang Kamao ang kanyang power at kombinasyon na nais makita ni Roach mula sa eight-division world champion para sa kanilang upakan ni Horn sa Hulyo 2.
Isiniwalat ni Roach na pinatumba ni Pacquiao nang dalawang beses ang kanyang Mexican sparring partner kaya’t kuntento at masaya siya ngayong nasa ‘attack mode’ na ang Pinoy ring icon.
Nagsisilbi namang main sparring partner ni Pacquiao si Australian George Kombosis na kababayan ni Horn.
By Jelbert Perdez
Tiniyak ng pamahalaan na sapat pa ang pondo ng pamahalaan para tugunan ang pangangailangan ng mga apektadong residente na lumikas mula sa kaguluhan sa Marawi City.
Ayon kay DSWD o Department of Social Welfare and Development Secretary Judy Taguiwalo wala pang natatanggap na foreign aid ang Pilipinas.
Iginiit ni Taguiwalo na wala rin namang pangangailangan para sa anumang ayuda na galing sa ibang bansa dahil sa kontrolado pa ng pamahalaan ang sitwasyon.
Batay sa tala ng DSWD, nasa mahigit tatlong libong (3,000) pamilya ang nagpasyang lumikas dahil sa mahigit isang buwan nang bakbakan sa Marawi City.
By Ralph Obina
Narito ang malalimang pag-SIYASAT sa adiksyon sa pagsusugal.
PAKINGGAN:
Pinondohan ng Islamic State ang mga terorista sa mahigit isang buwan nang bakbakan sa Marawi City.
Ayon kay AFP Chief General Eduardo Año, ito ay sa pamamagitan ng Malaysian militant na si Mahmud Bin Ahmad na napatay din ng militar noong Hunyo 7.
Sinabi ni Año na nasa animnaraang libong (600,000) dolyar ang ipinaraan ng ISIS kay Mahmud para sa armas, pagkain at iba pang suplay na kinailangan ng mga umatake sa Marawi.
Naniniwala din ang opisyal na galing sa droga ang ibinibigay na pondo ng ISIS.
89 foreign terrorists
Samantala, tinatayang walumpu’t siyam (89) na umano’y dayuhang terorista ang nakakalat na sa iba’t ibang lugar sa Mindanao, kabilang ang Marawi City.
Sa ulat ng Kyodo News, ito’y batay sa intelligence report ng PNP o Philippine National Police.
Sinasabing kabilang sa hinihinalang foreign terrorists ang dalawampu’t walong (28) Indonesians, dalawampu’t anim (26) na Pakistanis, dalawampu’t isang (21) Malaysians, apat (4) na Arabs, tatlong (3) Bangladeshis, isang “Indian-Singaporean” at isang Singaporean.
Ang limang (5) iba pang dayuhan ay inaalam pa umano kung ano ang kanilang nationality.
Isiniwalat ng Kyodo News na inilahad din ng pamahalaan ang katulad na figures sa pakikipagpulong nito sa foreign ministers at mga kinatawan ng Malaysia at Indonesia.
Kasama umano sa entry points na dinaanan ng mga teroristang dayuhan ay ang Sulawesi Island sa Indonesia hanggang sa makarating sa Sarangani Province.
Ang iba pang ruta na maaaring dinaanan ng mga ito ay ang Sandakan, Malaysia patungo sa Tawi-Tawi at mula sa Borneo patungong Palawan.
Nakasaad din sa police intelligence report na tinatayang 250 hanggang 300 militants na kasapi ng Islamic state-inspired Maute Group ang kasalukuyang nasa Marawi City at pinaniniwalaang katuwang nila ang mga dayuhan.
By Ralph Obina / Jelbert Perdez
Pinayuhan ng National Food Authority o NFA ang publiko na bumili lamang ng bigas sa mga accredited retailers upang makasigurong ligtas ang kanilang kinokonsumong bigas.
Sa harap ito ng reklamo hinggil sa umano’y fake rice na kalaunay napatunayan din ng ahensya na walang pekeng bigas batay sa kanilang ginawang pagsusuri sa mga rice samples.
Ayon sa NFA, mainam din kung bumili ng bigas sa mga suki o pinagkakatiwalaang mga tindahan.
Sinabi pa ng ahensya na ugaliin ding kilatisin ang mga bibilhing bigas at tiyaking walang amoy ang mga ito.
Anumang kahinahinala o kakaibang amoy sa bigas ay maaaring ipasuri sa NFA Food Development Center.
By Ralph Obina
Malaking tulong para sa Eastern Mindanao Command ang ipadadalang dalawang surveillance aircraft ng Australia.
Ayon kay EASTMINCOM Deputy Commander General Gilbert Gapay, hindi lamang ito makakatulong sa operasyon ng militar sa Marawi City kundi maging sa mga ginagawang hakbang ng AFP o Armed Forces of the Philippines sa iba pang bahagi ng Mindanao.
Gayunman, hindi pa batid ng AFP ang tiyak na petsa kung kailan darating ang spy planes ng Australia.
Una rito, itinuturing ng Australia malaking banta sa kanilang interes at seguridad ang nangyayaring terorismo sa Marawi na gawa ng ISIS.
By Ralph Obina
Patay ang apatnapu (40) katao habang halos isangdaang (100) iba pa ang nasugatan sa apat na magkahiwalay na pambobomba at pamamaril sa tatlong malalaking lungsod sa Pakistan.
Sa Quetta City, unang umatake ang isang suicide bomber na lulan ng isang sasakyan na may kargang bomba at nang sumabog ito ay labing-dalawa (12) katao ang nasawi kung saan dalawampu (20) ang nasugatan.
Makalipas ang ilang oras, niyanig naman ng magkakasunod na pagsabog ang isang palengke sa lungsod ng Parachinar na ikinasawi ng dalawampu’t apat (24) katao.
Ayon kay Government Administrator Zahid Hussain, karamihan sa mga nakatira sa nabanggit na lugar ay Shiite Muslims.
Pinagbabaril naman ng mga armadong lalaki ang isang grupo ng mga pulis malapit sa isang restoran sa Karachi kung saan apat (4) sa mga ito ang namatay.
Agad namang inako ng Pakistani Taliban ang mga naturang pag-atake.
By Jelbert Perdez
*EPA Photo
Ibinunyag ni Shara Chavez ang dahilan kung bakit sila naghiwalay ng singer na si Jovit Baldivino.
Sa programang “Tonight with Boy Abunda,” sinabi ni Shara na masakit sa kanya ang paghihiwalay nila ni Jovit pero kailangan aniya itong gawin.
Ipinahiwatig ni Shara na nagsusugal si Jovit at may ibang kinahuhumalingang babae.
Si Shara ay dating fan ni Jovit hanggang sa magkamabutihan sila at nabiyayaan pa sila ng anak na lalaki na ngayo’y isang taong gulang na.
By Jelbert Perdez
