Humarap ang Philippine delegation sa kinatawan ng European Union o EU sa Brussels, Belgium noong nakaraang linggo para magpaliwanag sa isyu ng EJKs o extrajudicial killings sa bansa.
Ito ay matapos ang pagsalang ng delegasyon sa United Nations Human Rights Council kung saan iniulat ang estado ng Human Rights sa Pilipinas.
Sinabi ni Assistant Secretary Epimaco Densing na sa pagharap sa EU ay muling iginiit ng bansa na hindi state sponsored ang EJK.
Nilinaw ng grupo na ang utos ng Pangulo ay dumipensa ang mga pulis sakaling manlaban ang mga drug suspect.
Nagpahayag umano ng pagkaalarma ang EU kasunod ng mga naririnig na negatibong balita partikular ang inihayag ni Vice President Leni Robredo sa UN.
Nitong Marso ay nagbabala na ang EU na papatawan ng trade sanction ang Pilipinas dahil sa pagtaas ng bilang ng mga namamatay kasabay ng anti-illegal drug campaign ng gobyerno.
By Rianne Briones
Balik-bansa na si Pangulong Rodrigo Duterte matapos ang anim (6) na araw na pagbisita nito sa Cambodia, Hong Kong at China.
Dumating ang Pangulo sa Davao International Airport bago mag alas-3:00 ng umaga.
Sa arrival speech ng Pangulo, partikular na ibinida nito ay magiging benepisyo ng bansa sa plano ng China na One Belt, One Road.
PAKINGGAN: Bahagi ng pahayag ni Pangulong Rodrigo Duterte
Ipinagmalaki pa ng Pangulo ang dagdag na pondo mula sa China para sa tuloy-tuloy na infrastracture projects sa bansa kasunod ng pagkikita nila ni Chinese President Xi Jinping.
PAKINGGAN: Bahagi ng pahayag ni Pangulong Rodrigo Duterte
Tinukoy din ng Pangulo na positibong hakbang ang itutulak na bilateral consultation mechanism ng Pilipinas at China upang mapayapang maresolba ang usapin sa pinag-aagawang teritoryo sa West Philippine Sea.
PAKINGGAN: Bahagi ng pahayag ni Pangulong Rodrigo Duterte
By Rianne Briones
Tinuldukan na ni mega star Sharon Cuneta ang iba’t ibang isyung ikinakabit ngayon sa kanya.
Kabilang na riyan ang isyu na baon na ito sa utang at ang umano’y nagkakalabuang relasyon nila ni Senador Kiko Pangilinan dahil sa third party.
Paglilinaw ni Shawie, hindi totoong wala na siyang pera.
Iginiit nito na ang kanyang pera ay nasa mga investment at hindi dahil sa namumulubi na siya.
Kung totoo aniyang wala na siyang pera ay hindi na aniya siya sana nakakapagtravel pa sa abroad sakay ng first class na eroplano.
Kasabay nito, pinabulaanan din ng mega star ang mga malisyosong balita na may relasyon ang kanyang asawa sa kapwa senador na si Risa Hontiveros.
Matatandaang kumalat pa ang larawan ng dalawang (2) senador na magka-holding hands pagkalabas ng PNP Custodial Center nang bisitahin noon si Senadora Leila de Lima na kalauna’y napatunayan ding edited ang naturang larawan.
By Ralph Obina
Inilarga na ng mga kumpanya ng langis ang panibagong price hike sa gasolina.
Unang nagpatupad ng dagdag trenta sentimos (P0.30) sa gasolina ang Flying V, epektibo alas-12:01 kaninang hatinggabi.
Dagdag trenta sentimos (P0.30) din ang ipatutupad ng Jetti, Petron, PTT, Seaoil, Eastern Petroleum at Phoenix Petroleum, epektibo epektibo kaninang alas-6:00 ng umaga.
Wala namang paggalaw sa presyo ng diesel at kerosene.
By Drew Nacino
Humihirit ng dagdag-singil sa Toll Regulatory Board o TRB ang pamunuan ng North Luzon Expressway o NLEX.
Dagdag bente syete sentimos (P0.27) sa kada kilometro sa closed system o mula Bocaue hanggang Dau o Sta. Ines ang hiling ng NLEX sa TRB.
Ayon sa Manila North Tollways Corporation o MNTC, gusto nilang bawiin ang 2.9 billion pesos na gastos sa pagpapagawa ng lagpas limampung (50) kilometrong bagong lane mula Santa Rita hanggang San Fernando pabalik dagdag pa ang walong (8) kilometrong bagong lane mula Balem hanggang Mabalacat, Pampanga.
Sa oras na aprubahan, magiging 238 pesos na ang toll fee mula Bocaue hanggang Dau o Sta. Ines mula sa dating 218 pesos.
Ang hirit na dagdag singil ay hiwalay pa sa tatlong (3) nakatenggang petisyon na toll rate hike ng MNTC.
By Drew Nacino
Muling sasalang si Social Welfare Secretary Judy Taguiwalo sa pagdinig ng CA o Commission on Appointments bukas, May 17.
Sa pagharap ni Taguiwalo ay inaasahang pagbobotohan na rin ng mga miyembro ng CA ang kanyang kumpirmasyon.
Sa huling pagdalo ni Taguiwalo sa CA ay inulan ng batikos si Senador Tito Sotto nang tawagin nitong ‘na-ano’ lang ang Kalihim dahil sa pagiging single parent nito ngunit kinalaunan ay nag-public apology rin.
Kabilang si Taguiwalo sa miyembro ng gabinete ni Pangulong Rodrigo Duterte na nagmula sa National Democratic Front o NDF.
By Rianne Briones
Isinailalim na sa state of emergency ang Sanaa, Yemen dahil sa cholera outbreak.
Tinatayang dalawanlibo animnaraan (2,600) na ang nagkakasakit kabilang ang halos isandaan dalawampung (120) namatay sa simula noong Abril 27.
Ayon sa Health Ministry ng Yemen, isa ng seryosong problema ang cholera outbreak lalo’t mahigit walong libo limandaang (8,500) hinihinalang kaso ng nabanggit na sakit ang naitala sa labing-apat (14) na lalawigan.
Pinangangambahang magsiksikan sa mga ospital ang tinamaan ng cholera kaya’t nangangailangan na ng international aid ang Yemen.
Isa sa mga dahilan ng paglala ng sitwasyon ang nagpapatuloy na bakbakan na naging sanhi pagkaputol ng water supply.
By Drew Nacino
Pinayuhan ng Malakanyang si Magdalo Partylist rep. Gary Alejano na magtanim na lamang ng mga puno sa probinsiya at tigilan na ang panggigigil kay Pangulong Rodrigo Duterte.
Kasunod ito ng pahayag ng mambabatas na i-aakyat niya ang ibinasurang reklamo laban sa pangulo sa International Criminal Court o I.C.C.
Ayon kay Chief Presidential Legal Counsel, Atty. Salvador Panelo, makatutulong pa si Alejano sa pangangalaga sa kalikasan kapag nagtanim ng mga puno sa halip na bumuo ng gubat ng kasinungalingan laban kay Pangulong Duterte.
Matapos ibasura ang impeachment complaint sa kamara laban sa punong ehekutibo, inihayag ni Alejano na hindi siya titigil sa kanyang hangarin na mapanagot si Duterte kaya’t idudulog na niya ang reklamo sa I.C.C.
Nauna ng inihayag ng mga Kongresista na insufficient in substance ang inihaing impeachment complaint laban sa Presidente kaya’t ibinasura agad ang reklamo.
By: Drew Nacino / Aileen Taliping
Ginamit ng Pilipinas ang isa sa dalawa nitong strategic sealift vessel na BRP Tarlac, dalawang landing craft units at dalawang UH-1d Helicopters.
Sa panig naman ng America, ibinida nila ang black hawk helicopter ng U.S. Army at Osprey Aircraft ng U.S. air force.
Sa halip na armas, kahon-kahong tubig, pagkain at gamot ang dala ng mga sundalong Amerikano at Pilipino pagbaba nila mula sa barko at eroplano.
Nagsagawa rin ang militar ng medical mission, dental check up at operation tuli sa mga residente ng Casiguran sa Dibacung Elementary School.
By: Drew Nacino / Jonathan Andal