Binalewala ng pamunuan ng House Committee on Justice ang banta ni Congressman Gary Alejano na iakyat sa ICC o International Criminal Court ang kaso laban sa Pangulong rodrigo Duterte.
Ayon kay Congressman Reynaldo Umali, chairman ng komite, malaya si Alejano na isulong ang kanyang mga paniniwala.
Gayunman, hindi aniya magpapagamit ang Kamara sa kahit na sinumang gustong manira sa Pangulo sa pamamagitan ng isang walang silbing reklamo.
Una nang ibinasura ng komite ni Umali ang impeachment complaint laban sa Pangulong Duterte na inihain ni Alejano.
PAKINGGAN: Bahagi ng pahayag ni Congressman Reynaldo Umali
Samantala, tanging sa ICC o International Criminal Court na lamang puwedeng habulin ang Pangulong Rodrigo Duterte para papanagutin sa mga di umano’y kasalanan nito sa bayan.
Ipinaliwanag ni Magdalo Partylist Representative Gary Alejano na nabasura na impeachment case na siyang natatanging paraan upang mapa panagot ang isang Pangulo sa kanyang mga pagkakasala dito sa Pilipinas.
Ayon kay Alejano, bagamat hindi niya ikinagulat ang pagbasura ng House Committee on Justice sa inihain niyang impeachment complaint, hindi naman niya inakala na ganun kabilis at hindi na idinaan sa tamang proseso ang pagdinig.
PAKINGGAN: Bahagi ng pahayag ni Congressman Reynaldo Umali
By Len Aguirre | Balitang Todong Lakas (Interview) | Ratsada Balita (Interview)
Ibinalita ng Department of Labor and Employment (DOLE) na nasa labindalawang (12) milyong bagong trabaho ang inaasahang magbubukas sa ilalim ng administrasyong Duterte.
Ayon kay Labor Secretary Silvestre Bello III, kasabay ng Golden Age of Infrastructure ay inaasahan ding magiging golden age of jobs, jobs, jobs ang liderato ng Pangulo.
Tiwala si Bello na hindi lamang problema sa unemployment ang mareresolba nito kundi pati na rin ang layunin ng Pangulo na mapauwi na ang mga Overseas Filipino Workers (OFWs) sa iba’t ibang panig ng mundo at dito na lamang mag-hanapbuhay sa bansa.
Iginiit naman ni Socio-Economic Planning Secretary Ernesto Pernia na magandang mapauwi sa bansa ang mga OFW at Pilipinas mismo ang makinabang sa technical skills na mayroon ang mga ito.
By Ralph Obina
Hindi na ipipilit ng Pangulong Rodrigo Duterte ang kahilingang mabigyan ng emergency powers para masolusyunan ang problema sa mabigat na daloy ng trapiko.
Ito ay kahit pa mayroon nang mga nakahanay na infrastructure projects na mayroong kinalaman sa transportasyon at kinakailangan ng Pangulo ang emergency power para mas mabilis na maipatupad ang mga ito.
Sinabi ng Pangulo na bagamat kailangan, batid at nauunawaan niya ang pangamba ng mga mambabatas na maaaring maabuso at magamit sa korapsyon ang dagdag na kapangyarihan.
PAKINGGAN: Bahagi ng pahayag ni Pangulong Rodrigo Duterte
By Katrina Valle | with report from Aileen Taliping (Patrol 23)
Malabo nang umusad ang impeachment complaint laban kay Vice President Leni Robredo.
Ayon kay Kabayan Representative Harry Roque, ito ay matapos wala pang mambabatas na nagpahayag na kanyang ieendorso ang reklamo.
Maaari aniyang hindi na umusad ang reklamo dahil marami pang hinahabol na panukalang batas ang Kamara, kabilang na ang mga napagkasunduang priority bills ng dalawang kapulungan ng Kongreso.
“Wala pa pong na-iinitiate ng impeachment complaint laban kay Vice President Leni dahil wala pa pong miyembro ng Kamara ang nag-endorso, lumalabo na po ngayon kasi nakita na natin kung paano maaaksaya ang oras at resources ng Kamara samantalang nagmamadali tayo sa pagpasa ng mga batas, isa na nga diyan ang Universal Health Care.” Pahayag ni Roque
Possible ethics complaint vs. Alejano
Samantala, binigyang diin ni Kabayan Representative Harry Roque na hindi dapat minamaliit ang proseso ng impeachment.
Kasunod ito ng planong pagsasampa ng reklamo sa ethics committee laban kay Magdalo Representative Gary Alejano dahil sa kawalan niya ng personal na kaalaman sa mga akusasyong nakapaloob sa impeachment complaint kontra sa Pangulong Rodrigo Duterte.
Sinabi ni Roque na kanilang susuriin kung maaaring kasuhan ng perjury si Alejano at kung papaano ito mapapanagot.
“Pati ang mga alegasyon niya doon sa kanyang impeachment complaint ang hindi naman pala sa kanyang sariling personal knowledge, samantalang sinabi niya sa verification niya na meron siyang personal na knowledge, Hindi dapat minamaliit ang proseso ng impeachment dahil ito po’y napaka-importante, institutional mechanism para mapanagot ang pinakamatataas na mga opisyales ng bansa.” Ani Roque
Iginiit din ni Roque na dumaan sa wastong proseso ang impeachment complaint ni Alejano at nagkataon lamang na walang tumayo sa kanyang mga ipiniresentang ebidensya.
PAKINGGAN: Bahagi ng pahayag ni Congress Harry Roque
By Katrina Valle | Ratsada Balita (Interview)
Kinondena rin ng United Nations o UN ang panibagong missile test na inilunsad ng North Korea.
Batay sa inilabas na statement ng 15-member council, iginiit nito sa Pyongyang na huwag nang magsagawa pang muli ng missile test kundi ay mahaharap ang NoKor sa panibagong sanction.
Matatandaang Linggo nang maglunsad ng panibagong rocket ang Pyongyang na bumagsak sa kanlurang bahagi ng karagatang sakop ng Japan.
By Ralph Obina
Handa na si Rafael Nadal sa French Open matapos na mapasakamay ang kampeonato sa Madrid Open sa naging laban kay Dominic Thiem.
Dahil sa nasabing panalo kaagad umakyat sa ika-apat na ranking si Nadal.
Marami umanong tennis experts ang tiwalang makukuha ng 30-anyos na tennis star ang kampeonato sa French Open dahil sa magkakasunod na panalo nito sa clay court sa Monte Carlo, Barcelona at Madrid Open.
Ang 14-time major champion ay bigo pang manalo sa ATP Tournament mula pa noong nakalipas na taon sa panalo nito sa Barcelona at itinuturing na paboritong manalo sa Rome at French Open.
By Judith Larino
Nailipat na sa Camp Bagong Diwa sa Taguig City si Janet Lim Napoles mula sa Correctional Institute for Women kaninang pasado alas-4:00 ng madaling araw.
Kasunod na rin ito ng kautusan ng Sandiganbayan First Division matapos mapawalang sala ng Court of Appeals si Napoles sa kasong serious illegal detention.
Iginiit ni Sandiganbayan First Division Acting Chairperson Geraldine Econg na walang ebidensya si Napoles na hindi siya magiging ligtas sa Camp Bagong Diwa kayat walang dahilan para dalhin siya sa NBI o National Bureau of Investigation.
Una nang hiniling ni Napoles na mai-custody sa NBI dahil sa banta sa kanyang buhay.
Sinabi pa ni Econg na hindi kasama sa mandato ng NBI na isailalim sa safekeeping ang mga detainee na naghihintay ng kanilang paglilitis tulad nang tinaguriang pork barrel queen.
Kaugnay nito, lalo pang hinigpitan ng BJMP o Bureau of Jail Management and Penology ang seguridad sa Camp Bagong Diwa.
Agad isinailalim sa physical exams at booking procedure si Napoles bago siya ihatid sa female dormitory.
Muli ring ipinaliwanag kay Napoles ang mga alituntunin ng BJMP.
By Rianne Briones / with report from Jelbert Perdez
