June 2026

Ikinukunsidera ngayon ng militar na magtayo ng naval operating base sa bayan ng Casiguran, Aurora na  ilang milya lamang ang layo mula sa kontrobersyal na Benham Rise.

Gayunman, nilinaw ni Lt. Gen. Romeo Tanalgo,  Commander ng AFP-Northern Luzon Command na  hindi ang isyu sa Benham Rise ang pangunahing dahilan sa planong pagtatayo ng naval base.

Bago pa man  anya pumutok ang balitang pinasok ng China ang Benham Rise, nasa plano na ng AFP ang pagtatayo ng base militar malapit sa naturang karagatan na bahagi ng teritoryo ng Pilipinas.

Pero dahil na rin sa isyung ito naniniwala si Tanalgo na mapabibilis ngayon ang konstruksyon ng nasabing military facility.

Sa ngayon ay wala ng na-momonitor ang AFP na Chinese Vessel na umaaligid sa Benham Rise at tuloy-tuloy ang pagpapatrulya doon ng military.

Kaugnay dito, tagumpay na nagtapos ang Balikatan Exercises sa Casiguran, Aurora.

Ayon  kay Maj.  Frank Sayson,  tagapagsalita ng Balikatan 2017 para sa Pilipinas, kuntento ang mga opisyal  ng Departments of National Defense at   Foreign Affairs sa nasaksihan nilang humanitarian assistance and disaster response na siyang highlight ng aktibidad.

Napatunayan anya nila na kakayaning tumugon ng pwersa ng militar sa oras nang matinding sakuna.

Nasa 1500 Pilipino at Amerikano ang lumahok sa balikatan sa Aurora na nakatakdang  magtapos sa mayo 18.

By: Drew Nacino / Jonathan Andal

Inaasahan  na ng Malakanyang na hindi makaka-first base  ang impeachment complaint na inihain laban kay Pangulong Rodrigo Duterte.

Ito ang reaksyon ni  Chief Presidential Legal Counsel, Atty. Salvador Panelo matapos  ibasura ang reklamo ni Magdalo Partylist Rep. Gary Alejano laban sa Pangulo.

Ayon kay Panelo, paulit-ulit na niyang sinabi sa mga interview na hindi maka-uusad ang impeachment complaint dahil ang mga alegasyon ay ibinatay sa mga tsismis.

Ang iba aniyang  bintang ay pawang kasinungalingan at ang reklamo ay may layuning siraan ang reputasyon ni Pangulong Duterte.

Malinaw ayon kay Panelo na nais lamang makakuha ng libreng publisidad si Alejano nang isampa ang impeachment complaint laban sa Presidente.

By: Drew Nacino / Aileen Taliping

Tiniyak ng Malakanyang na hindi mababaon sa utang ang Pilipinas sa gitna ng isinusulong na “build build build project” ng Duterte Administration.

Sa harap na rin ito ng pangambang  malubog sa utang ang bansa sa oras na ilarga na ang mga major infrastructure project ng administrasyon.

Ayon kay Trade and Industry Secretary Ramon Lopez, sa katunayan ay  kikita pa  ang gobyerno sa mga ipapatayong proyekto.

Bagaman kukunin ang ibang gastusin sa pamamagitan ng loan  kung saan  80 percent ay manggagaling sa local at 20 percent ay mula sa foreign debt, tiyak anyang mababawi ito ng sobra pa, pabor sa pamahalaan.

Sa sandaling matapos ang mga infrastructure project, sinabi ni Lopez na maaari nila itong ibenta sa pribadong sektor ng may sapat na interes  at kikita pa ang gobyerno mula sa mapagbebentahan.

By: Drew Nacino / Aileen Taliping

Nahaharap sa panibagong asunto sa Sandiganbayan ang isa sa mga pangunahing akusado sa 2009 Maguindanao Massacre.

Kinasuhan ng Ombudsman sa Sandiganbayan si dating Maguindanao Governor Sajid Ampatuan dahil sa umano’y maanomalyang transaksyon noong siya pa ay nanunungkulan bilang gobernador.

Lumalabas na nakipagsabwatan si Ampatuan para makabili ang provincial government ng samu’t saring food supplies mula sa Henry Merchandising na nagkakahalaga ng mahigit 16 Milyong Piso.

Si Sajid Ampatuan, anak ng yumaong si Andal Ampatuan Sr. ay nahaharap sa kasong paglabag sa Republic Act 3019 o Anti-Graft and Corrupt Practices Act, Malversation of Public Funds, at 34 counts ng Falsification of Public Documents.

By: Meann Tanbio