Itinanggi ng Pamahalaang Panlalawigan ng Sorsogon ang mga paratang ng korapsyon sa ilalim ng kanilang dating gobernador na ngayo’y senador na si Francis “Chiz” Escudero.
Ayon sa Sorsogon Provincial Government, natugunan na ang mga audit findings na binanggit sa reklamo ng abogado na si Marvin Aceron.
Nabatid na nagsampa ng mga kasong graft, technical malversation, falsification of public documents at iba pa si Atty. Aceron laban kina Senador Escudero at ilang opisyal kaugnay sa sinasabing maling paggamit ng tatlong daan pitumpu’t dalawang milyong pisong halaga ng pondo ng bayan noong termino nito bilang governor sa Sorsogon.
Ayon sa abogado, nakabatay ang kanyang mga reklamo sa mga natuklasan ng Commission on Audit sa 2021 Annual Audit Report ng Sorsogon.
Samantala, sinabi naman ng Pamahalaang Panlalawigan na ang mga ulat ng COA ay mula sa iba’t ibang Audit Observation Memoranda (AOM) na ibinigay sa mga opisyal ng Province of Sorsogon.
Gayunman, hindi anila tiniyak ng nagrereklamo kung ang kinauukulang personnel ay nasunod at natugunan nang maayos ang mga rekomendasyon ng COA kaugnay ng mga AOM na nakasaad sa 2021 COA Reports.
