Nakatakda nang ilabas ng Commission on Elections o Comelec ngayong linggo ang desisyon nito kaugnay sa kasong kinasasangkutan ni Senador Francis “Chiz” Escudero, na sinasabing tumanggap ng campaign donations mula sa kontratistang si Lawrence Lubiano.
Ito ang kinumpirma ni Comelec Chairman George Erwin Garcia matapos maisumite ng Political Finance and Affairs Department ang kanilang rekomendasyon kay Commissioner Rey Bulay, na commissioner-in-charge sa kaso.
Matatandaang inamin ni Senador Escudero na tumanggap siya ng nasa 30 million pesos na halaga ng campaign donations mula kay Lubiano na presidente ng Centerways Construction Development Inc.
Kinumpirma rin ni Lubiano sa pagdinig ng Kamara ukol sa mga flood control projects na siya nga ang nagbigay ng donasyon, ngunit iginiit niyang ito ay personal niyang kontribusyon at hindi galing sa kanyang kompanya.
