Lumabas sa imbestigasyon ng Independent Commission for Infrastructure na wala silang finding o conclusion ng pagiging “guilty” o “liable” ni dating House Speaker at Leyte Rep. Martin Romualdez sa maanomalyang flood control project.
Nakasaad ito sa isang publikong kopya ng referral ng ICI sa Office of the Ombudsman na nagrekomendang imbestigahan si Rep. Romualdez.
Naniniwala ang ICI na mas “equipped” ang Ombudsman na tukuyin kung may administratibo o kriminal na pananagutan si Rep. Romualdez sa ilalim ng Anti-Graft and Corrupt Practices Act.
Kalakip ng referral ang affidavit ni Rep. Romualdez na isinumite noong Oktubre a-trese at ang transcript ng stenographic notes, video at audio recording ng imbestigasyon ng ICI.
Umaasa naman ang kampo ni Rep. Romualdez na magsasagawa ng independent, mabusisi at objective na pagsusuri ang Ombudsman sa mga isinumiteng ebidensya.
