Kinilala ng Malacañang ang napakahalagang papel ng bulubundukin ng Sierra Madre sa kasagsagan ng pananalasa ng Super Typhoon Uwan.
Ito’y matapos nitong muling patunayan ang kakayahan nitong humarang sa matinding hagupit ng hangin at ulan lalo na sa bahagi ng Luzon.
Sinabi ni Palace Press Officer Undersecretary Claire Castro na matagal nang nakikita ng pamahalaan ang benepisyong dulot ng kabundukan sa kaligtasan ng mamamayan tuwing may malalakas na bagyo.
Ayon kay Usec. Castro, hintayin na lamang ang pahayag ng Pangulo hinggil sa mga posibleng hakbang upang higit pang mapangalagaan at maprotektahan ang Sierra Madre bilang natural na depensa ng bansa laban sa kalamidad.
