Seryoso ang administrasyon ni Pangulong Ferdinand Marcos Jr. sa pagpapatupad ng mga hakbang upang matugunan at mapagaan ang epekto ng climate change sa bansa.
Ipinaliwanag ni Palace Press Officer Atty. Claire Castro na nakatuon ang mga inisyatibo ng Department of Science and Technology sa paggamit ng makabagong teknolohiya upang tulungan ang mga sektor na madalas maapektuhan ng pagbabago ng klima.
Kabilang dito ang automated irrigation system na may kakayahang mag-imbak ng tubig upang magamit sa panahon ng tagtuyot, at ang smart farming initiative na gumagamit ng teknolohiya para mapabuti ang produksyon at matiyak ang seguridad sa pagkain.
Binanggit din ni Usec. Castro ang National Adaptation Plan na naglalayong palakasin ang kakayahan ng mga komunidad na makaangkop sa mga pagbabago sa klima, partikular na sa mga rehiyong mataas ang panganib sa pagbaha, tagtuyot, at iba pang kalamidad.
Anya, patuloy ang koordinasyon ng iba’t ibang ahensya upang maisakatuparan ang mga programang ito, habang hinihintay pa ang final update tungkol sa pagbuo ng Department of Water Resources, isa sa mga pangunahing hakbangin ng administrasyon upang masolusyunan ang matinding problema sa pagbaha at kakulangan sa tubig.
