Tumaas ang bilang ng mga gumagamit ng iligal na droga sa maraming lugar sa bansa.
Batay ito sa survey ng Social Weather Stations o SWS sa huling quarter ng 2017.
Itoy kung saan maraming pamilya mula sa Luzon, Visayas at Mindanao ang nagsabing tumaas ang presensya ng mga adik sa iligal na droga sa kani-kanilang mga lugar.
Lumalabas na sa Luzon, tumaas ng labing isang (11) porsyento ang presensya ng mga adik kung saan naitala ang apatnapu’t limang (45) porsyento mula tatlumpu’t tatlong (33) porsyento noong Setyembre ng nakaraang taon.
Sa Visayas naman, nakapagtala ng apatnapu’t tatlong (43) porsyento sa presensya ng mga adik na mas mataas ng tatlong (3) porsyento kumpara sa mga nagdaang survey habang tumaas din ng tatlong (3) porsyento sa Mindanao na nasa tatlumpung (30) porsyento mula sa dalawampu’t pitong (27) porsyento noong Setyemre 2017.
Samantala, bumaba naman ang presensya ng mga adik sa Metro Manila na nasa limampung (50) porsyento mula sa dating animnapu’t dalawang (62) porsyento.
Ang naturang survey ay isinagawa noong Disyembre 8 hanggang 16 ng nakaraang taon sa may isanlibo at dalawandaang (1,200) respondents.
—-
