Naibalik na sa Bureau of Internal Revenue (BIR) ang selyadong kahon na naglalaman ng tax records ni Vice President Sara Duterte at kanyang asawang na si Atty. Manases Carpio, kahapon, July 7.
Isinagawa ang pagbabalik matapos iutos ni Senate Impeachment Presiding Officer Senador Chiz Escudero na ibalik muna ang mga dokumento, dahil wala pang legal custody ang impeachment court at hindi pa ito namamarkahan bilang ebidensya.
Ayon kay Presiding Officer Escudero, maaari pa ring hilingin ng impeachment court ang pagbubukas at paglalabas ng mga rekord kung kakailanganin sa mga susunod na bahagi ng paglilitis.
Samantala, iginiit ng BIR na ang pagbubukas ng income tax returns ay dapat sumunod sa National Internal Revenue Code na kinakailangang dumaan sa executive session at hindi sa pampublikong pagdinig.| mula sa panulat ni Reabelle Medina
