Lumantad sa Criminal Investigation and Detection Group-National Capital Region o CIDG-NCR ang isang mag-asawa kaugnay sa kaso nang pagpaslang kay Carl Angelo Arnaiz.
Ayon sa mag-asawang kapwa tricycle drivers, nagbaba lamang sila ng isang pasahero sa Torcillo St. sa Quezon City pasado alas-3:00 ng madaling araw noong August 18 nang makita nilang tumatakbo ang ilang kalalakihan habang paliko na sila ng C-3 Road.
Nakita anila ang isang lalaking nakasuot ng itim na black jacket at dalawang mas malalaking lalaking humahabol dito at sumisigaw na mga pulis sila.
Sinabi ng mag-asawang testigo na nakita nila ang lalaking naka-black jacket na unang nagpaputok sa mga humahabol sa kaniya at tumigil sila sa isang lugar at nagtago sa kanilang tricycle habang nakakarinig pa rin ng palitan ng putok ng baril.
Sampung minuto matapos ang barilan, inihayag ng mag-asawa na lumabas na sila ng kanilang tricycle at may mga pulis na sa lugar kung saan nakita nilang nakahandusay na ang lalaking naka-black jacket.
Nalaman na lamang anila nila sa mga balita na ang nakasuot ng black jacket ay ang binatang si Arnaiz.
—-
