Inaasahang sesertipikahang urgent ni Pangulong Rodrigo Duterte ang panukalang batas na naglalayong amyendahan ang procurement law para mapahintulutan ang mas mabilis na pagbili ng bakuna kontra COVID-19 ng mga local government units (LGU).
Ayon kay Sen. Juan Miguel Zubiri, isasama rin sa Senate Bill 2042 ang paglalaan ng pondo para sa indemnification.
Isa kasi aniya sa rekisito ng mga manufacturer ng bakuna kontra COVID-19 ay dapat may indemnification fund o batas ang pagbebentahan nila ng bakuna.
Ani Zubiri, ayaw kasi ng mga manufacturer na magkaroon sila ng responsibilidad sa mga makakaranas ng side effect sa bakuna.
Dahil dito, ipapaloob ang panukalang indemnification fund kung saan ang ilalaang pondo para dito ay maaaring kunin sa contingency fund ng pamahalaan.
Target itong maipasa ng Senado ngayong buwan.
