Tiniyak ng Palasyo ang kahandaan ng pamahalaan sa pagdating ng inaasahang super typhoon Uwan, kasabay ng pagpapatuloy ng relief operations at rehabilitasyon sa mga lugar na sinalanta ng bagyong Tino.
Ayon kay Palace Press Officer Claire Castro, nagpadala na ang pamahalaan ng mga first responders sa mga lalawigang posibleng tamaan ng paparating na bagyo upang matiyak ang maagap na pagtugon sa oras ng pangangailangan.
Kasabay nito, nagpapatuloy din ang pamamahagi ng tulong sa mga residenteng naapektuhan ng nagdaang bagyo, kabilang ang 760 million pesos na financial assistance mula sa Tanggapan ng Pangulo.
