Inaasahang mas mababa sa apat na milyong metriko tonelada ang aangkatin na bigas ng bansa sa 2026 habang inaasahang makapagtatala ng record-high na produksyon ng palay ang lokal na sektor.
Ayon kay Agriculture Secretary Francisco Tiu Laurel Jr., tinatayang nasa 3.6 hanggang 3.8 milyong metriko tonelada ang rice imports sa susunod na taon, na sapat upang matugunan ang pangangailangan ng bansa nang hindi naaapektuhan ang farmgate prices ng palay.
Bukod pa rito, posible rin anyang umabot sa 20.3 milyong metriko tonelada ang produksyon ng palay sa susunod na taon.
Bago tuluyang alisin ang four-month import ban sa katapusan ng taon, magsisimula nang magproseso ang Bureau of Plant Industry o BPI ng aplikasyon para sa 500K metric tons ng import clearance, na kailangang dumating bago ang kalagitnaan ng Pebrero upang hindi makasagabal sa anihan.
Kapag muling pinayagan ang importasyon, itataas sa 20 porsyento ang taripa mula sa kasalukuyang 15 percent, at malilimitahan din ang pagpasok ng imported rice sa buong bansa.
Bukod pa rito, hinimok din ni Sec. Tiu Laurel ang mga importer na maghanap ng alternatibong source bukod sa Vietnam, gaya ng Cambodia at Myanmar.
