Pinakilos na ng Philippine National Police ang intelligence at tracker teams nito para habulin si Sarah Discaya at ilan pang indibidwal na dawit sa sinasabing “ghost” flood control project sa Davao Occidental.
Ayon kay Acting PNP Chief Lieutenant General Jose Melencio Nartatez Junior, kanila nang inihanda at ipinuesto ang sapat na bilang ng mga pulis, at nakipag-ugnayan sa iba pang ahensya upang maisakatuparan ang utos na pag-aresto sa mga sangkot sa anomalya.
Una nang sinabi ng Malacañang na inirekomenda na ng Ombudsman ang paghahain ng kasong malversation through falsification at paglabag sa Republic Act 3019, o Anti-Graft and Corrupt Practices Act, laban sa mga dawit na indibidwal.
Inatasan din ang mga otoridad na hanapin si Discaya at iba pang respondents upang sa sandaling mailabas ang arrest warrant, agad silang maaresto.
Giit pa ng hepe ng pambansang pulisya na, bilang bahagi ng pinalawak na operasyon, pinalakas ng PNP ang ugnayan nito sa NBI, Bureau of Immigration, Philippine Coast Guard, mga otoridad sa paliparan, at mga lokal na pamahalaan, lalo na sa mga lugar na posibleng puntahan o huling nakita si Discaya.
Inalerto rin ang mga barangay at neighborhood watch groups upang tumulong sa pagmamanman at pag-uulat ng anumang mahalagang impormasyon.
—sa panulat ni Anjo Riñon
