Naniniwala ang grupong Kontra Daya na hindi pa sarado ang issue kaugnay sa campaign donations ni senador Francis “Chiz” Escudero na ibinigay ng isa sa mga government contractor na dinadawit sa maanomalya umanong flood control projects.
Ito ang inihayag ni Kontra Daya convenor Danilo Arao matapos itigil ng Comelec ang motu proprio investigation nito laban kay Centerways Construction and Development Incorporated president Lawrence Lubiano dahil sa kakulangan ng ebidensya.
Una nang umamin si Lubiano na personal niyang kakilala at kaibigan si Escudero pero nanggaling sa sarili niyang bulsa ang idinonate na 30 million pesos para sa kampanya ng senador noong 2022 national elections.
Gayunman, nilinaw ni professor Arao na hindi pa ligtas sa mga posibleng asunto ang mambabatas dahil naka-depende pa ito kung may magsasampa ng kaso laban sa kanya.
Samantala, nakukulangan si Arao sa naging desisyon ni Comelec commissioner Rey Bulay na nanguna sa imbestigasyon.
—sa panulat ni Anjo Riñon
