Pagkakalooban ng fully-furnished condo unit ng Megaworld ang bawat atletang Pilipino na makapag-uuwi ng gintong medalya mula sa Paris Olympics.
Sa isang pahayag, binanggit ng kompanya na ang condo unit na ibibigay ay mula sa kanilang 5–hectare McKinley Hill Township sa BGC, Taguig City.
Ayon kay Megaworld president Lourdes Gutierrez-Alfonso, ang hakbang na ito ay bilang pakilala nila sa mga atleta na makapag-uuwi ng gintong medalya.
Nabatid na ang McKinley Hill ay isa lamang sa apat na Megaworld township developments sa Fort Bonifacio.
Matatagpuan naman dito ang tanyag na Venice Grand Canal na madalas pinapasyalan at dinarayo ng mga tao.
Napag-alaman na nasa 22 ang mga atletang Pinoy na sumasabak ngayon sa Olympic Games.
