Naihatid na ni Pangulong Ferdinand Marcos Jr. ang kaniyang ika-limang State of the Nation Address (SONA) ngayong araw.
Tampok sa kaniyang talumpati ang mga nagawa ng Marcos administration sa nakalipas na isang taon.
Kabilang na rito ang pagpapakulong sa ilang mga indibidwal na nadadawit sa flood control scandal; habang nanindigan ang Pangulo na dapat makasuhan ang kaniyang pinsan at dating House Speaker Martin Romualdez, gaano man ito kasakit sa kaniya.
Iniulat din ng Pangulo ang mga nagawa nitong aksyon sa gitna ng state of energy emergency; mga plano sa pag-amyenda sa EPIRA Law, partikular sa pagtatanggal sa system loss charge, at Ecological Solid Waste Management Act; pagpapalawig sa electric vehicle industry at public transport system; at pagsusulong ng nuclear energy.
Nabanggit din ni Pangulong Marcos ang kahalagahan ng proteksyon sa kabataan kasunod ng madugong pamamaril sa isang paaralan sa Tacloban City at iba pang bantang hatid ng social media.
Isa rin sa mga iniulat ng Pangulo ang pagpapalakas sa sports program at health system ng bansa, tulad ng PhilHealth Yakap Program, pagtatatag ng isang Virology and Vaccine Institute, at ang pagpapatupad ng zero balance billing sa mga ospital ng pamahalaan at ang Medical Assistance to Indigent and Financially Incapacitated Patients (MAIFIP).
Itinampok pa ni Pangulong Marcos ang free trade agreement nito sa United Arab Emirates.
Dinepensahan din ng Pangulo ang paglagda ng Pilipinas sa Pax Silica Initiative, kung saan iginiit niya na maglilikha ito ng mga quality jobs sa mga Pilipino, pabibilisin ang industrial competitiveness ng bansa, at magpapalakas sa ekonomiya.
Nabanggit din niya ang pagpapasinaya sa isang spaceport sa Cagayan.
Itinukoy naman ni Pangulong Marcos ang nagawa ng bansa bilang chair nation ng ASEAN Summit ngayong taon, kung saan nagkaisa ang mga miyembrong bansa nito sa pagpapanawagan sa kapayapaan sa Middle East.
Kumpiyansa rin ang Pangulo na tuloy na ang Bangsamoro parliamentary elections sa darating na Nobyembre.
Sa huli, nanindigan si Pangulong Marcos na “hindi pasisiil” ang Pilipinas sa patuloy na pagbabanta at pangungutya ng China sa West Philippine Sea.
Nagsimula ang SONA sa pamamagitan ng pambansang awit na pinangunahan ng PCSO Chorale, na sinundan naman ng isang awit-panalangin na kinanta ni Reuben Laurente.
Tumagal ng nasa isa’t kalahating oras ang talumpati ng Pangulo, habang nakatala naman ng mahigit siyamnapung palakpak at apat na standing ovation sa buong sakop ng SONA. | Sa panulat ni Anjo Riñon
