Iginagalang ni dating House Speaker at Leyte Rep. Martin Romualdez, ang naging pahayag ni Pangulong Ferdinand Marcos Jr. sa kaniyang naging ikalimang State of the Nation Address (SONA) 2026 kaugnay ng isinasagawang imbestigasyon laban sa mambabatas sa isyu ng flood control projects.
Sa inilabas na pahayag, sinabi ni Romualdez na bagama’t masakit ito para sa kanilang pamilya, hindi siya kailanman humingi ng pabor o espesyal na pagtrato mula sa Pangulo.
Binigyang-diin ng mambabatas na sang-ayon siya sa paninindigan na pairalin ang tamang proseso at hahayaan ang ebidensya ang magsalita.
Iginiit din ni Romualdez na wala siyang ginawang anumang paglabag sa batas at nananatili ang kaniyang paninindigang malinis ang kaniyang konsensya.
Kasabay nito, tiniyak ng kongresista na handa niyang patunayan ang kaniyang pagiging inosente sa pamamagitan ng legal na proseso at anumang imbestigasyong isasagawa ng mga kinauukulang ahensya. | via Geli Mendez (Patrol 30)
