Nanindigan ang Kalipunan ng Damayang Mahihirap o Kadamay na hindi sila aalis sa mga inokupang pabahay ng National Housing Authority o NHA sa Pandi, Bulacan.
Sa panayam ng DWIZ, sinabi ni Gloria Arellano, tagapagsalita ng Kadamay na pinanghahawakan nila ang pahayag ng Pangulong Rodrigo Duterte noon na ipamigay na sa mga miyembro ng Kadamay ang mga housing unit na dapat sana’y para sa mga pulis at sundalo.
“Inaantay namin yung pag-aayos na sinasabi nila eh hindi naman pag-aayos ang sinasabi nila kundi ito’y parang pagpapa-alis sa amin, ‘yun ang naramdaman namin.” Ani Arellano
Ipinabatid ni Arellano na aabot sa mahigit 5,000 housing units ang inookupa ngayon ng kanilang mga miyembro na aabot naman sa 8,000 indibiduwal.
“Hindi natin alam kung ano ang ginagawa ng NHA, dati nagtakda na sila ng mga pag-aayos doon pero isang beses lang silang bumaba, hindi na naulit sa 6 na pabahay po dapat.” Dagdag ni Arellano
Aniya ang ipinagtataka nila ay kung bakit tila iba ang pag-trato ng NHA sa mga miyembro ng Kadamay.
Ayon kay Arellano marami nang pagkakataon na humiling sila ng dayalogo sa NHA pero hindi sila nito hinaharap.
“Mahihirap naman po ang mga ito, bakit hindi na lang po ayusin, parang sinasabi nila ay meron na kasing mga nakaano diyan na mga maralita din tulad ninyo, eh bakit hindi pag-aayos ang ginagawa nila, pag-aaway-awayin pa ang mga maralita. Paano kami makapag-aayos, laging wala, hindi kami hinaharap, nung December 18 nga lang po nakatakda yung pagpunta ng NHA Bulacan sa mga area namin, ive-verify na daw ganun pero isang bahay lang ang kanilang napuntahan, hindi namin alam eh sinisilip lang nila ang kahinaan ng mga maralita at ito ang ibabanat sa amin.”
“Ngayon kapag sinasabi nilang ‘no negotiation’ na daw po, ano ba talaga ang gusto ng gobyerno, mag-ayos o manggulo?” Pahayag ni Arellano
Pinabulaanan din ni Arellano ang mga ulat na nagpapa-renta at ibinenta ng ilan sa kanilang mga miyembro ang mga inokupang pabahay at bagkus sinabing bawal ito sa kanilang panuntunan.
“Hindi totoo yan, may isang pangyayari lang na inamin niya talaga dahil yun nga po’y isang mahirap na mahirap din at walang pera, tumulong siya sa kanyang kapit-bahay dahil na-ospital yung anak, nag-sangla lang po, ngayon patakaran na yan ng Kadamay na bawal po yun sa amin, maraming bawal.” Paliwanag ni Arellano
Kasabay nito ay nanawagan din si Arellano na sana’y kabitan na ng ilaw at tubig ang mga inokupang pabahay dahil aniya’y isang taon nang nagtitiis ang mga nakatira doon na maayos namang naghahanap-buhay.
“May mga nagta-tricycle, may mga manggagawa sa mga rice mill, may mga pumapasok din sa pabrika, naglalako ng isda, tahimik naman po sila doon, nagtitiis lang na walang ilaw at tubig magmula nung nag-occupy kami ay hiling namin na sana makabitan ng tubig at ilaw, hindi naman po hinihingi, babayaran naman po.” Ani Arellano
Hiling ni Arellano sana’y ayusin na lang ng gobyerno ang aniya’y maraming mga nakatiwangwang na housing units sa bansa para mapakinabangan at hindi maaksaya ang mga pabahay para sa mga Pilipino.
By Aiza Rendon / Balitang Todong Lakas (Interview)