Iginiit ng kampo ni Leyte 1st District Rep. Martin Romualdez na walang basehan ang pagtawag sa kanya bilang “mastermind” sa umano’y anomalya sa flood control projects.
Ayon kay Atty. Elaine Atienza, spokesperson ni Romualdez, mali ang pahayag ng Ombudsman na may “functional control” umano ang dating House Speaker sa proseso ng national budget.
Paliwanag ni Atienza, hindi kontrolado ng iisang tao o opisina ang budget process dahil dumadaan ito sa iba’t ibang hakbang at sangay ng gobyerno, kabilang ang Malacañang, Kamara, at Senado.
Binigyang-diin din niya na hindi kayang diktahan ng House Speaker ang Senado, Pangulo, o ibang opisyal sa pagpasa ng budget.
Nanawagan naman ang kampo ni Romualdez ng patas at maingat na pagtingin sa isyu, at sinabi na dapat nakabatay sa ebidensya ang pananagutan at hindi sa haka-haka lamang.
