Masusing inaalam ng Bureau of Immigration ang mga sinasabing insidente ng paglahok ng ilang dayuhan sa kilos-protesta na idinaos noong Nobyembre a-trenta.
Ayon kay Immigration spokesperson Dana Sandoval, layunin ng imbestigasyon na matukoy kung may anumang paglabag sa batas ang mga banyagang kasangkot sa nasabing kilos-protesta.
Ito’y matapos namataan ang ilang mga dayuhan sa Recto Avenue at Luneta na nakikilahok sa mga protesta.
Ipinaliwanag din ni Sandoval na, batay sa Philippine Immigration Act, mahigpit na ipinagbabawal ang pakikilahok ng mga dayuhan sa anumang political activity sa bansa.
Samantala, naitala na rin ng BI sa mga nagdaang taon ang ilang kaso ng mga dayuhang na-deport matapos sumali sa mga protesta habang sila ay nasa Pilipinas.
