May maganda at masamang epekto ang pagbibitiw nina dating Executive Secretary Lucas Bersamin at dating Budget Secretary Amenah Pangandaman.
Sa gitna ito ng sinasabing katiwalian sa mga flood control projects at mga rebelasyon ni dating Congressman Zaldy Co sa pagsingit ng bilyon-bilyong piso sa 2025 National Budget.
Ayon sa political analyst na si Dr. Dennis Coronacion, ipinapakita ng pagbibitiw nina Bersamin at Pangandaman na seryoso ang Malacañang sa paglilinis sa hanay nito pagdating sa paglaban sa katiwalian.
Gayunman, mahihirapan naman anya ang pangulo at administrasyon nitong maghanap ng kapalit na kasing-sipag o kasing-ganda ng credentials ng dalawang nalagas na miyembro ng gabinete at makabangon mula sa negatibong epekto ng rigodon.
Nangangamba rin si Coronacion sa maaaring maging pananaw ng publiko na inutil ang pamahalaan sa garapalang katiwalian kung hindi tatanggapin ng pangulo ang resignation nina Bersamin at Pangandaman.
