Kinontra ng pamunuan ng Philippine National Police (PNP) ang alegasyon ng National Democratic Front (NDF) na may nilulutong pag-atake laban sa kanilang miyembro at iba pang kritiko ng adminstrasyon.
Ito’y matapos isama ng anti-terrorism council ang NDF sa listahan ng mga terroristang organisasyon na anila’y mahalagang bahagi ng partido komunsita ng Pilipinas.
Ayon kay PNP Chief, Police Gen. Guillermo Eleazar, may batayan at lehitimo ang mga ikinakasa nilang operasyon laban sa mga indibiduwal na tumatayong kinatawan o may kaugnayan sa CPP-NPA.
Itinanggi rin ni Eleazar na gawa-gawa lamang ang mga kasong isinasampa nila laban sa mga naaaresto nilang NDF consultants at iginiit na takot lamang ang mga ito na harapin ang kaso dahil matibay ang hawak nilang mga ebidensya.
