Nitong January 15, 2024, nagpaabot ng pagbati sa social media si Pangulong Ferdinand Marcos Jr. kay President-elect Lai Ching-Te bilang bagong pangulo ng Taiwan.
Simple lang ang pagbati ng Pangulo na nagsabing, “We look forward to close collaboration, strengthening mutual interests, fostering peace, and ensuring prosperity for our peoples in the years ahead.”
Agad naman itong kinondena ng China na nagsabing “strongly dissatisfied” sila sa naging pagbati ni Pangulong Marcos. Sinabihan pa ng China ang Pilipinas ng, “not to play with fire.”
Paglilinaw ng Department of Foreign Affairs (DFA), paraan ito ng Pangulo upang magpasalamat sa pagtanggap sa halos 200,000 na overseas Filipino workers (OFWs). Pagbibigay-diin ng DFA, kinikilala ng Pilipinas ang One China Policy.
Sa kabila nito, maraming netizens ang pumabor sa ginawang pagbati ni Pangulong Marcos.
Patunay na maraming Pilipino ang tiwala kay Pangulong Marcos ang inilabas na Tugon ng Masa survey ng Octa Research nitong January 16, 2024. Dito, naipakitang majority ng mga Pilipino ang sumasang-ayon sa pagtugon ng administrasyon sa territorial dispute sa China.
Ayon sa OCTA Research, tinatayang 61% ng adult Filipinos ang sang-ayon sa mga polisiya ng administrasyong Marcos sa WPS para sa fourth quarter ng 2023. Mas mataas ito kumpara sa naitalang 58% noong third quarter at 43% noong second quarter.
Matatandaang ipinagtibay ni Pangulong Marcos ang commitment ng bansa na panatilihin ang kapayapaan at sumunod sa rules-based order sa gitna ng tensyon sa Asya, partikular na sa South China Sea.
Sa isang panayam noong December 16, 2023, sinabi ng Pangulo na patuloy na isinusulong ng Pilipinas ang kapayapaan at pakikipag-ugnayan sa ibang bansa. Siniguro naman niyang hindi kailanman sisimulan ng Pilipinas ang anumang gusot, sa kabila ng tumataas na maritime tensions.
Tiniyak naman ni House Speaker Martin Romualdez na buo ang suporta ng Kamara sa polisiya ni Pangulong Marcos upang depensahan at protektahan ang WPS.
Upang paigtingin ang depensa ng Pilipinas, isinusulong ng administrasyong Marcos ang modernisasyon sa military assets. Titiyakin din nilang may sapat na kasanayan at walang humpay na suporta mula sa bansa ang mga tauhan sa defense sector.
Nais ni Pangulong Marcos na maayos at mapayapang maresolba ang isyu sa WPS. Sa kabila nito, pinapalakas pa rin niya ang depensa ng Pilipinas upang matigil ang harassment ng ibang bansa sa mga mandaragat at maprotektahan ang karapatan ng Pilipinas sa sarili nitong teritoryo.
Sabi nga ni Pangulong Marcos, “We do not seek conflict; but it is our duty as citizens and as leaders to always rise to meet any challenge to our sovereignty in the South China Sea. No country would expect any less. No country would do any less.”