Pumalo na sa mahigit P4-B ang naitalang pinsala sa imprastraktura bunsod ng pananalasa ng bagyong Ulysses.
Ayon kay Public Works and Highways Sec. Mark Villar, 52 road sections ang hindi pa rin madaanan dahil sa landslide, makapal na putik, mga nagtumbahang puno at pagbaha.
Mula sa nabanggit na bilang, 14 sa mga ito ay mula sa Cordillera, isa sa Ilocos Region, 13 sa Cagayan Valley, 8 sa Central Luzon, 7 sa Calabarzon, 8 sa Bicol Region at isa sa Eastern Visayas.
Nasa 19 na major roads naman ang limitado lamang ang mga sasakyang maaaring dumaan habang 40 mula sa kabuuang 92 napinsalang kalsada ang nalinis na.
Puspusan ang ginagawang clearing operation ng mga tauhan ng DPWH sa mga apektadong kalsada kaya’t inaasahang mabubuksan na ito muli sa trapiko simula ngayong araw ng Sabado.