Posibleng magtalaga ng 100 na magbabakuna ang lokal na pamahalaan ng Marikina na siyang magbabahay-bahay upang bakunahan ang mga Marikeño sa oras na may suplay na ng bakuna vs. COVID-19 sa bansa.
Ayon kay Mayor Marcy Teodoro, bukod sa pagbabakuna sa mga nakatalagang vaccination site, plano nitong magtalaga ng mga ‘mobile vaccinators’ na mag-iikot upang turukan ng bakuna ang mga residente nitong nais mabakunahan ng COVID-19 vaccine.
Aniya, gagamit ng cool packs, temperature monitor at auto-disable syringes ang mga vaccinators upang masiguro ang kalidad, kaligtasan at pagpepreserba sa bakunang ituturok
Paglilinaw naman ni Teodoro, depende pa rin kung matutuloy ang pamamaraang ito sa klase ng bakunang gagamitin, pero aniya’y pinakamahalaga ay ang monitoring pagkatapos na pagbabakuna.
Samantala, nakapag-order na ang Marikina ng 100k doses ng bakuna mula sa Astrazeneca kung saan target nitong mabakunahan ang nasa 84% hanggang 70% na populasyon ng Lungsod na tinatayang may kabuuang bilang na nasa 120k.—sa panulat ni Agustina Nolasco.